រតនគិរី៖ ក្រុមហ៊ុនវិនិយោគមួយឈ្មោះ រ័ត្ន សាខន ដែលមានទីតាំងនៅឃុំសេដា ស្រុកលំផាត់ បានប្រមូលដឹកឈើហុបមិនស្របច្បាប់ពីតំបន់ផ្សេងៗយកទៅកែច្នៃលក់ធ្វើអាជីវកម្មដោយជ្រកក្រោមច្បាប់ដីសម្បទានសេដ្ឋកិច្ច។
ប្រភពពីប្រជាពលរដ្ឋនៅស្រុកលំផាត់បានអោយដឹងថា នៅដើមឆ្នាំនេះខាងក្រុមហ៊ុនរ័ត្នសាខនបានទៅបំផុសប្រជាពលរដ្ឋនៅតាមមូលដ្ឋានឲ្យទៅកាប់ឈើល្អៗក្នុងតំបន់ព្រៃដែលគ្រប់គ្រងដោយសហគមន៍ និងមន្ទីរបរិស្ថានខេត្តដែលមានទីតាំងជាប់ដីសក្រុមហ៊ុននោះ គឺដើម្បីបន្លំថាជាឈើរបស់ពួកគេ។
ប្រភពបានបន្តទៀតថា ក្រោយពីគេកំណត់បានឈើល្អៗតាមតម្រូវការហើយនោះខាងក្រុមហ៊ុនឲ្យកម្លាំងដើរកាត់ផ្តួលឈើនោះដួលពេញព្រៃរួចចាំឱកាសស្ងាត់គេយករថយន្តស្ទួចធុនធំចូលដឹកយកឈើនោះជាបន្តបន្ទាប់ចូលរោងចក្រអារលក់ធ្វើអាជីវកម្មដោយពុំមានការត្រួតពិនិត្យពីមន្ត្រីជំនាញ។
ជាក់ស្តែងកាលពីថ្ងៃទី២៨ ខែមីនា កន្លងទៅមានរថយន្តកែច្នៃធុនធំចំនួន២គ្រឿងបានផ្ទុកឈើហុបពេញដឹកចេញពីព្រៃសហគមន៍ភូមិកែងសាន់ ក្នុងភូមិសេដា ស្រុកលំផាត់ ឆ្ពោះទៅចូលក្នុងបរិវេណរោងចក្រអារឈើរបស់ក្រុមហ៊ុនមួយនេះ។
ស្របពេលនោះ មានបុរសម្នាក់ថាខ្លួនងជាតំណាងឲ្យក្រុមហ៊ុនបានប្រាប់អ្នកសារពត៌មាន នៅខាងមុខរោងចក្រថា ឈើនោះទិញពីប្រជាពលរដ្ឋរួចមួយសន្ទុះក្រោយមកគេថា ជាឈើប្រមូលបានពីជនល្មើសនៅតាមតំបន់អនាធិបតេយ្យគឺមានច្បាប់ចេញដោយអាជ្ញាធរខេត្ត។
លោក អង់ ប៊ុនថៀង មេឃុំសេដាបានប្រាប់អ្នកសារពត៌មានឲ្យដឹងតាមទូរស័ព្ទថាកាលពីថ្ងៃទី៣០ ខែមីនា ឆ្នាំ២០១៧ រឿងក្រុមហ៊ុនរ័ត្ន សាខន ទោះមានច្បាប់ ឫអត់ច្បាប់គេធ្វើមិនដែលប្រាប់យើងក្នុងនាមជាអាជ្ញាធរមូលដ្ឋានឲ្យបានដឹងឡើយ។
លោកមេឃុំបានឲ្យដឹងទៀតថា កន្លងមក ខាងក្រុមហ៊ុនប្រមូលឈើនៅព្រៃសហគមន៍និងតំបន់ដែនជម្រកសត្វព្រៃប្រាប់តែមន្ត្រីជំនាញប៉ុន្មាននាក់ទេ ដោយសំអាងថាឈើប្រមូលបានក្នុងតំបន់ដីសម្បទាន។ បើអ្នកកាសែតបានឃើញសកម្មភាពដឹកឈើហើយនោះគួរតែសួរទៅមន្ត្រីបរិស្ថានទៅគេជាអ្នកគ្រប់គ្រងដែនជម្រកសត្វព្រៃនោះស្រាប់។
លោក កែប កត់ នាខណ្ឌរដ្ឋបាលព្រៃឈើខេត្តរតនគិរីកាលពីថ្ងៃទី៣០ ខែមីនា អ្នកសារពត៌មានបានព្យាយាមសុំការបំភ្លឺរឿងក្រុមហ៊ុនរ័ត្ន សាខន ដែលប្រមូលឈើមិនស្របច្បាប់នៅភូមិសាស្ត្រដូចខាងលើប៉ុន្តែលោកថាជាប់រវល់ប្រជុំ។
នៅថ្ងៃដដែលនោះដែរ នាយរងខណ្ឌរដ្ឋបាលព្រៃឈើខេត្តរតនគិរីម្នាក់បានបញ្ជាក់ថាក្រុមហ៊ុនរ័ត្នសាខន គេកំពុងរត់ការច្បាប់នៅត្រឹមថ្នាក់ខេត្តដើម្បីប្រមូលដឹកយកឈើអនាធិបតេយ្យពីតំបន់ផ្សេងៗចូលរោងចក្ររួចគេឲ្យខាងមេព្រៃចុះទៅពិនិត្យវាស់វែងដើម្បីបង់ព័ន្ធ។ ក្រោយពីបង់ពន្ធរួចទើបអនុញ្ញាតិឲ្យក្រុមហ៊ុនអារច្រៀកកែច្នៃឈើនោះ។
នាយរងខណ្ឌរដ្ឋបាលព្រៃឈើបានបញ្ជាក់ឲ្យដឹងទៀតថាក្រុមហ៊ុនរ័ត្នសាខនៅមុនពេលមិនទាន់បានច្បាប់ផងគេបានឆ្លៀតឲ្យកម្មករធ្វើសកម្មភាពដឹកយកឈើពីក្នុងព្រៃមកអារលក់រកប្រាក់ចែកគ្នាដាក់ហោប៉ៅទៅហើយ។ រហូតបែកការត្រូវកម្លាំងរាជអាវុធហត្ថចុះទៅចាប់រថយន្តដឹកឈើមួយគ្រឿងរបស់ក្រុមហ៊ុននោះបញ្ជូនទៅជំនាញហើយដាក់ទៅតុលាការនៅមិនទាន់ដោះស្រាយបញ្ចប់រឿងនៅឡើយទេ។
លោក សយ សូណា ប្រធានមន្ទីរកសិកម្មខេត្តរតនគិរីកាលពីថ្ងៃទី៣០ ខែមីនា ឆ្នាំ២០១៧ បានបញ្ជាក់ប្រាប់អ្នកសារពត៌មានថាឈើដែលក្រុមហ៊ុនរ័ត្នសាខនប្រមូលចូលរោងចក្រនោះគឺក្នុងដែនជម្រកសត្វព្រៃលំផាត់ដែលគ្រប់គ្រងដោយមន្ទីរបរិស្ថានខេត្ត។
លោកប្រធានមន្ទីរកសិកម្មបានបញ្ជាក់ឲ្យដឹងទៀតថា ក្រុមហ៊ុននេះមានសិទ្ធិប្រមូលយកតែឈើដែលនៅក្នុងបរិវេណដីសម្បទានរបស់ខ្លួនតែប៉ុណ្ណោះ។ យើងមិនយល់ទេបើមានករណីដូចការលើកឡើងខាងលើនោះគឺខុសច្បាប់ហើយ។
កន្លងមក ក្នុងនាមយើងជាប្រធានមន្ទីរកសិកម្មខេត្តបានចុះទៅដល់ទីតាំងក្រុមហ៊ុននោះធ្វើការសួរនាំផ្លូវច្បាប់ដើម្បីចុះបញ្ជីដីជាថ្មី ប៉ុន្តែអ្នកដែលប្រចាំការនៅក្រុមហ៊ុនមិនដែលមានទំនាក់ទំនងល្អគឺគមិនសហការជាមួយយើងឡើយ។រហូតមកដល់ពេលនេះក្រុមហ៊ុនរ័ត្នសាខននោះនៅមិនទាន់ចុះបញ្ជីដីឲ្យបានត្រឹមត្រូវនៅឡើយទេ។
លោកផុន ខេមរិន្ទ ប្រធានមន្ទីរបរិស្ថានខេត្តរតនគិរីនៅថ្ងៃទី៣០ ខែមីនា ឆ្នាំ២០១៧ អ្នកសារពត៌មានបានទំនាក់ទំនងសុំការបំភ្លឺជុំវិញករណីដែលក្រុមហ៊ុនរ័ត្នសាខនដឹកជញ្ជូនឈើចេញពីក្នុងតំបន់អភិរក្សសត្វព្រៃលំផាត់នោះតែទូរស័ព្ទរោទ៍ជាច្រើនដងតែពុំមានអ្នកទទួល។
មន្ត្រីបរិស្ថានស្រុកលំផាត់ម្នាក់បានទទួលស្គាល់ថាក្រុមហ៊ុនរ័ត្នសាខនកន្លងមកធ្លាប់បានលួចឆ្មក់កាប់ឈើយកឈើពីក្នុងដែនជម្រកសត្វព្រៃលំផាត់ដោយពុំមានច្បាប់អនុញ្ញាតឡើយ។ មនុស្សដែលបម្រើការនៅក្រុមហ៊ុននោះមួយចំនួនមិនសូវឲ្យតម្លៃដល់មន្ត្រីបរិស្ថានទេគេធ្វើអ្វីៗតាមតែចិត្តគេ។
លោក ញឹម ផែន អភិបាលរងខេត្តរតនគិរីទទួលបន្ទុកវិស័យព្រៃឈើនៅថ្ងៃទី៣០ ខែមីនា ឆ្នាំ២០១៧ សារពត៌មានយើងបានព្យាយាមសុំការពន្យល់ករណីដែលក្រុមហ៊ុនរ័ត្នសាខន បានអះអាងថាអាជ្ញាធរខេត្តបានអនុញ្ញាតឲ្យគេដឹកជញ្ជូនយកឈើអនាធិបតេយ្យពីភូមិសាស្ត្រស្រុកលំផាត់នោះដើម្បីធ្វើអាជីវកម្មប៉ុន្តែទូរស័ព្ទរបស់លោកពុំមានអ្នកលើក៕
ជីវ៉ា
