កែប ៖ នៅព្រឹកថ្ងៃទី០៦ ខែមេសា ឆ្នាំ២០១៧នេះ នៅសាលប្រជុំធំ នៃសាលាខេត្តកែប បានធ្វើសន្និបាត បូកសរុបសមិទ្ធផល ការងាររបស់ក្រុមប្រឹក្សាឃុំ សង្កាត់អាណតិ្តទី៣(២០១២-២០២៧)ក្រោមវត្តមានដ៏ខ្ពង់ខ្ពស់ ឯកឧត្តម កែន សត្ថា អភិបាលនៃគណៈអភិបាលខេត្តកែប ឯកឧត្តម សំ សារូប ប្រធានក្រុមប្រឹក្សាខេត្ត ហែរហមដោយអស់លោកជាអាជ្ញាធរគ្រប់លំដាប់ថ្នាក់ ព្រមទាំងថ្នាក់ដឹកនាំនៃមន្ទីរស្ថាប័នទូទាំងខេត្ត មេឃុំ ចៅសង្កាត់ និងមន្ត្រីជាន់ខ្ពស់ របស់កងកំលាំងប្រដាប់អាវុធគ្រប់អង្គភាពផងដែរ។
ក្នុងខណៈនោះ លោកមេឃុំ ក៏ដូចជាចៅសង្កាត់ នៃតំបន់និមួយៗរបស់ខេត្តកែប ក៏បានរាយការណ៍ និងធ្វើបទបង្ហាញ ស្តីពីសកម្មភាព ព្រមជាមួយនឹងសមិទ្ធផលសំខាន់ៗនានាក្នុងរយៈកាល ៥ ឆ្នាំ កន្លងមកផងដែរ។
ថ្លែងក្នុងពិធីបូកសរុបសមិទ្ធផលនេះ ឯកឧត្តម កែន សត្ថា បានគូសបញ្ជាក់ថា តាមរយៈ នៃការធ្វើបទបង្ហាញដោយលោកមេឃុំ ចៅសង្កាត់ អំពីសមិទ្ធផលសំខាន់ៗដែលក្រុមប្រឹក្សាឃុំ សង្កាត់អាណតិ្តទី៣ សម្រេចបានកន្លងមក សូមកោតសរសើរ និងវាយតម្លៃខ្ពស់ចំពោះសមិទ្ធផលសម្រេចបានទាំងនេះ ហើយវាពិតជាបានឆ្លើយតបទៅនឹងបញ្ហា និងតម្រូវការជាក់ស្តែងរបស់ប្រជាពលរដ្ឋតាមមូលដ្ឋានយ៉ាងពិតប្រាកដ ។
រាល់សមិទ្ធផលសំខាន់ៗ ដែលក្រុមប្រឹក្សាឃុំ សង្កាត់អាណតិ្តទី៣សម្រេចបានទាំងនេះ គឺបានកើតឡើងដោយមានការចូលរួមចំណែកយ៉ាងសកម្មពីអាជ្ញាធរគ្រប់លំដាប់ថ្នាក់ មន្ទីរ អង្គភាព អង្គការ NGOs សហគមន៍ ពិសេសប្រជាពលរដ្ឋ ដែលជាម្ចាស់មូលដ្ឋានផ្ទាល់ ។ ជាមួយនេះ យោងតាមច្បាប់ស្តីពីការគ្រប់គ្រងរដ្ឋបាលឃុំ សង្កាត់ ក្នុងការអនុវត្តតួនាទី បម្រើកិច្ចការមូលដ្ឋាន រដ្ឋបាលឃុំ សង្កាត់បានយកចិត្តទុកដាក់ខ្ពស់ក្នុងការអនុវត្តគោលនយោបាយភូមិ ឃុំមានសុវត្ថិភាព ដោយធានាបាននូវសន្តិសុខ សណ្តាប់ធ្នាប់ របៀបរៀបរយសាធារណៈបានល្អប្រសើរ និងធានាស្ថិរភាពដល់ប្រជាពលរដ្ឋគ្រប់តំបន់ ។ លើកិច្ចការអភិវឌ្ឍន៍ សេដ្ឋកិច្ច សង្គមកិច្ច និងការលើកម្ពស់អប់រំសុខភាព និងជីវភាពរស់នៅរបស់ប្រជាពលរដ្ឋ រដ្ឋបាលឃុំ សង្កាត់បានកសាងគម្រោង ជាច្រើនដូចជា ផ្លូវលំ ស្ពាន លូ ទ្វារទឹក ប្រឡាយ អណ្តូងទឹក រួមជាមួយនឹងការបណ្តុះបណ្តាលជំនាញផ្សេងៗ ការបង្កើតមតេយ្យសហគមន៍ ការការពារថែរក្សាបរិស្ថាន ធនធានធម្មជាតិ វប្បធម៌ ពិសេស ការដោះស្រាយទាន់ពេលវេលា ជូនប្រជាពលរដ្ឋ ដែលជួបគ្រោះមហន្តរាយផ្សេងៗ នៅក្នុងមូលដ្ឋាន ។ល។ ដែលធ្វើឱ្យជីវភាព និងសុខមាលភាព របស់ប្រជាពលរដ្ឋមានភាពប្រសើរជាងមុន និងបានកាត់បន្ថយ នូវការធ្វើចំណាកស្រុកដោយខុសច្បាប់ ឆ្លើយតបទៅនឹងផែនការអភិវឌ្ឍន៍រយៈពេល៥ (២០១២-២០១៧) របស់រដ្ឋបាលឃុំ សង្កាត់ ដែលបានដាក់ចេញប្រកបដោយបរិយាប័ន្ន និងសមធម៌សង្គម ។ ក្នុងតួនាទីជាភ្នាក់ងារតំណាងរដ្ឋ រដ្ឋបាលឃុំ សង្កាត់ បានអនុវត្តប្រកបដោយការទទួលខុសត្រូវខ្ពស់ទៅតាមច្បាប់ ព្រះរាជក្រឹត្យ អនុក្រឹត្យ ប្រកាសនិងលិខិតបទដ្ឋានពាក់ព័ន្ធនានា ។
ជាមួយនេះដែរ អង្គសន្និបាត ក៏បានពិភាក្សានិងរកដំណោះស្រាយទៅលើបញ្ហាប្រឈម ដែលកើតមានឡើងក្នុងអាណតិ្តទី៣ របស់ក្រុមប្រឹក្សាឃុំ សង្កាត់ ដើម្បីជាបទពិសោធន៍ និងគន្លឹះ សម្រាប់ជាត្រីវិស័យយកទៅអនុវត្តនៅអាណតិ្តទី៤បន្តទៀត។
បន្ទាប់ពីបិទសន្និបាត បូកសរុបសមិទ្ធផលការងារ ឯកឧត្តម អភិបាលខេត្តកែប ក៏បានប្រគល់ប័ណ្ណសរសើរជូនដល់លោកមេឃុំ ចៅសង្កាត់ និងមន្ត្រីដែលអនុវត្តន៍ការងារបានល្អប្រសើរផងដែរ ៕
ណារិទ្ធ
