ខេត្តរតនគិរី៖ ក្នុងឆ្នាំ២០១៦ ករណីគ្រោះថ្នាក់ចរាចរណ៍នៅក្នុងខេត្តរតនគិរី កើតឡើងចំនួន ១២២ លើក មនុស្សស្លាប់ចំនួន ៤៤ នាក់ ៧០%ជាអ្នកបើកបរម៉ូតូ របួសធ្ងន់ ៨៥ នាក់ របួសស្រាលចំនួន ១០១ នាក់ ។ ក្នុងនោះ៥ថ្ងៃមានមនុស្សស្លាប់០១ នាក់ ។
ចំនួននេះបើប្រៀបធៀបជាមួយឆ្នាំ២០១៥មានការថយចុះ តែក្នុងរយៈពេលដើមឆ្នាំ២០១៧នេះ ករណីគ្រោះថ្នាក់ចរាចរណ៍មានការកើនឡើងគួរឲ្យកត់សម្គាល់វិញ នេះបើតាមរបាយការណ៍របស់អនុគណៈកម្មាធិការសុវត្ថិភាពចរាចរណ៍ផ្លូវគោកខេត្តរតនគិរី ដែលបានប្រារព្វពិធីសន្និបាតបូកសរុបលទ្ធផលការងារឆ្នាំ២០១៧ នាព្រឹកថ្ងៃទី៣០ ខែមីនា ឆ្នាំ២០១៧ នេះ ដែលប្រព្រឹត្តទៅក្រោមអធិបតីភាពលោកស្រី កែវ សាវឿន អភិបាលខេត្តស្តីទី ។
ករណីគ្រោះថ្នាក់ភាគច្រើនបន្តឡើងដោយបើកបរដោយមានជាតិស្រវឹង ១៦% មិនគោរពសិទ្ធគ្នា២០% ប្រជែងក្នុងស្ថានភាពគ្រោះថ្នាក់ ១៦% និងបញ្ហាផ្សេងៗទៀត ក្នុងនោះជនរងគ្រោះភាគច្រើនស្លាប់ដោយសារបើកបរមិនពាក់មួកសុវត្ថិភាព ។
ក្នុងគោលដៅកាត់បន្ថយឲ្យបាននូវអត្រាស្លាប់ និងគ្រោះថ្នាក់ចរាចរណ៍ អនុគណៈកម្មាធិការសុវត្ថិភាពចរាចរណ៍ផ្លូវគោកខេត្តរតនគិរី បានដាក់ចេញនូវទិសដៅសំខាន់ៗចំនួន ៣គឺ បង្កើនសុវត្ថិភាពយានយន្ត ប័ណ្ណបើកបរ និងការគ្រប់គ្រង និងវាយតម្លៃលើសុវត្ថិភាពដឹកអ្នកដំណើរ និងទំនិញ ។
ទន្ទឹមនឹងនោះស្នើសុំឲ្យអ្នកបើកបរទាំងអស់ចូលរួមគោរពច្បាប់ចរាចរណ៍ពាក់មួកសុវត្ថិភាព ដាក់ខ្សែក្រវ៉ាត់ មិនត្រូវបើកបរក្នុងស្ថានភាពស្រវឹង និងគោរពរពសិទ្ធបើកបរគ្នាទៅវិញទៅមកគ្រប់ពេលបើកបរ ៕
