ខេត្តប៉ៃលិន ៖ បន្ទាប់ពីភ្លៀងធ្លាក់ជោគជាំស្ទើររាល់ថ្ងៃ អស់រយៈពេលជាង១សប្តាហ៍ រហូតមកដល់ពេលនេះ ទឹកស្អុយសារធាតុពុលដំឡូងមី បានហូរចេញពីស្តង់មួយកន្លែង ដែលមាន យីហោ ”ក្រុមហ៊ុនខ្មែរវិនិយោគកសិកម្ម” ស្ថិតនៅភូមិកូនខ្លុង សង្កាត់អូរតាវ៉ៅ ក្រុងប៉ៃលិន បានធ្វើឱ្យប៉ះពាល់យ៉ាងធ្ងន់ធ្ងរ ដល់ការរស់នៅរបស់ប្រជាពលរដ្ឋជាច្រើនគ្រួសារ រួមទាំងប៉ះពាល់ដល់វិហារអ៊ិស្លាម១កន្លែងផងដែរ ។
បញ្ហាក្លិនស្អុយនេះ ធ្វើឱ្យមនុ ស្សក្មេងចាស់ ប្រុសស្រី មានអាការឈឺក្បាល វិលមុខ និងខ្លះទៀត កើតជម្ងឺផ្តាសាយ រលា កបំពង់ក មើលមិនជាសះស្បើយនោះឡើយ ។ តែគេមិនធ្លាប់ឃើញមានអាជ្ញាធរ ឬមន្ត្រីនៃមន្ទីរបរិស្ថានណាម្នាក់ ចុះទៅត្រួតពិនិត្យ រៀបចំដោះស្រាយជូនពួកគាត់នោះទេ ដោយចេះតែបណ្តែតបណ្តោយពីមួយថ្ងៃទៅមួយថ្ងៃ ធ្វើឱ្យប៉ះពាល់កាន់តែធ្ងន់ធ្ងរ រហូតដល់អ្នកខ្លះ ស្នាក់នៅក្នុងផ្ទះជួបជុំគ្រួសារលែងសុខសាន្តបន្តទៀត ។
ប្រភពព័ត៌មានពីបុរសម្នាក់ ឈ្មោះ មហាម៉ាត់ អាយុ៥៤ឆ្នាំ ជាខ្មែរអ៊ិស្លាម ដែលកំពុ ងស្នាក់នៅថែទាំព្រះវិហារ ក្បែរស្តង់ដំឡូងមីខាងលើ បានរៀបរាប់ឱ្យដឹងថា បន្ទាប់ពីភ្លៀងធ្លាក់ជាប់ៗគ្នា អស់រយៈពេលជាង១អាទិត្យនេះ ធ្វើឱ្យសមាជិកព្រះវិហារ ខ្មែរអ៊ិស្លាម មានការលំបាកក្នុងការចូលរួមថ្វាយបង្គំព្រះ ។ លោកបន្តទៀតថា ជាពិសេស ខណៈលោកគ្រូធំៗ ចង់មកពីភ្នំពេញចូលរួមថ្វាយបង្គំនៅទីនោះដែរ តែដោយសារធុំក្លិនស្អុយខ្លាំងពេក ក៏ប្តូរទៅកន្លែងផ្សេងវិញ ព្រោះខាងខ្មែរអ៊ិស្លាម ត្រូវការអនាម័យក្លិនក្រអូប មិនត្រូវការស្អុយបែបនេះទេ ។ លោកក៏មានសំណូមពរឱ្យអាជ្ញាធរភូមិ សង្កាត់ ក្រុង ខេត្ត ទាំងអស់ មេត្តាចុះទៅរៀបចំស្តង់ដំឡូងមីខាងលើ នេះឱ្យបានល្អផង កុំឱ្យទឹកស្អុយសារធាតុគីមីដំឡូងមី ហូរទៅក្បែរព្រះវិហារពួកគាត់ថ្វាយបង្គំព្រះបន្តទៀត ។
ប្រជាពលរដ្ឋជាច្រើនគ្រួសាររស់នៅក្បែរស្តង់ពោតដំឡូងមីខាងលើបានរិះគន់ថា ដំ ឡូងមីពិតជាបង្កផលប៉ះពាល់ធ្ងន់ធ្ងរ ដល់សុខភាពផ្លូវដង្ហើម មិនគួរណាអាជ្ញាធរមូលដ្ឋានអ នុញ្ញាតិឱ្យក្រុមឈ្មួញសង់ស្តង់មួយនេះក្បែរភូមិ ពោលគឺក្បែរផ្ទះរបស់ពួកគាត់នោះទេ ។ ពួកគាត់បន្តទៀតថា នៅរដូវប្រាំងកំទេចធូលីដំឡូងមីបានហុយចូលផ្ទះ បង្កឱ្យទៅជាកន្ទួលរមាសដល់មនុស្សក្មេងចាស់ ដេកមិនសុខឡើយ រីឯនៅរដូវវស្សាវិញ ពេលទឹកដំឡូងមីហូរចូលស្រះ ឬប្រឡាយក្បែរផ្ទះ ធ្វើឱ្យស្អុយទ្រាំមិនបាន បង្កទៅជាពុល ឈឺក្បាលវិលមុខ និងហូបអាហារស្ទើរតែមិនចូលផងដែរ ។ ម្យ៉ាងវិញទៀត ទឹកស្អុយនេះ ធ្វើកូនតូចៗ របស់ពួកគាត់ឈឺរាល់ថ្ងៃ និងធ្វើឱ្យពួកគាត់រកលុយកាក់ទិញថ្នាំមើលជម្ងឺមិនទាន់នោះឡើយ ដោយណាមួយរកលុយសម្រាប់ទិញអាហារ និងមួយផ្នែកទៀតយកទៅព្យាបាលជំងឺ ។ ដូច្នេះការរកលុយរាល់ថ្ងៃអត់មានសល់អ្វីសម្រាប់ទុកផ្គត់ផ្គង់គ្រួសារពេលក្រោយឡើយ ។
ពួកគាត់រិះគន់ទៀតថា មិនគួរអាជ្ញាធរយល់ព្រមឱ្យអ្នកមានលុយមានអំណាចចូលទៅធ្វើស្តង់ដំឡូងមីនៅក្បែរផ្ទះរបស់ពួកគាត់ទាល់តែសោះ គួរតែធ្វើឱ្យឆ្ងាយពីលំនៅឋានរបស់មនុស្សរស់នៅរាល់ថ្ងៃវិញ ។ ម្យ៉ាងវិញទៀត ពេលសត្វមាន់ទាផឹកទឹកស្អុយនៅក្នុងប្រឡាយនោះ បណ្តាលឱ្យងាប់អស់ និយាយរួមទៅចិញ្ចឹមអ្វីមិនសល់សម្រាប់ទទួលទាននោះឡើយ ។ បើភ្លៀងជោ គជាំវិញ នៅក្នុងប្រឡាយទឹកស្អុយនោះ មានសុទ្ធតែដង្កូវ វាររវីមរវាមគួរឱ្យខ្ពើមយ៉ាងខ្លាំង ។
ពាក់ព័ន្ធទៅនឹងបញ្ហានេះ លោក ស៊ុន យី អភិបាលក្រុងប៉ៃលិន បានឱ្យដឹងថា ខាង លោកអត់ដឹងរឿងនេះទេ ហើយបើសិនជាមានករណីស្អុយទឹកដំឡូងមីមែន ខាងលោកនឹង ចាត់ឱ្យមន្ត្រីក្រោមឱវាទចុះទៅត្រួតពិនិត្យ ។
ចំណែកលោក គឹម សុខា ប្រធានមន្ទីរបរិស្ថាន ខេត្តប៉ៃលិន បានឱ្យដឹងដែរថា ខាងលោកក៏អត់ទាន់ទទួលបានដំណឹងណាមួយពីប្រជាពល រដ្ឋដែរ ។ តែខាងលោកនឹងចុះទៅប្រាប់ឱ្យម្ចាស់ស្តង់រៀបចំកកាយកាកសំណល់ទាំងនោះ ចេញ ហើយរៀបចំធ្វើយ៉ាងណា ដើម្បីកុំឱ្យបន្តស្អុយប៉ះពាល់ដល់ប្រជាពលរដ្ឋនៅក្នុងភូមិនោះទៀត ៕
ដោយ ៖ នីយ៉ា
