កំពត ៖ នេះជាលើកទី២ ហើយដែលនារីវ័យក្មេងម្នាក់ប៉ងធ្វើអត្តឃាតដោយលោតទឹកសំលាប់ខ្លួនតែមិនបានសម្រេច ហើយករណីប៉ុនប៉ងបញ្ចប់ជីវិតនេះក៏បានធ្វើឱ្យសមត្ថកិច្ចឈឺក្បាលវិលមុខផងដែរ ព្រោះតែនារីចិត្តធំជាងប៉ែតខាងលើក្រាញននៀលមិនចង់ឱ្យមានអ្នកណាជួយអន្តរាគមន៍ឡើយ ។
ហេតុការណ៍ភ្ញាក់ផ្អើលខាងលើបានកើតឡើងនៅវេលាម៉ោង១៣និង១៥នាទីរសៀល ថ្ងៃទី១៧ខែមីនា ឆ្នាំ២០១៧ត្រង់ចំណុចកណ្តាលស្ពានថ្មីឆ្លងព្រែកខេត្តកំពត។
ទោះជាយ៉ាងណា នារីវ័យក្មេងនេះក៏ត្រូវបានក្រុមសមត្ថកិច្ចចាប់ក្រៀកបញ្ចូលក្នុងរថយន្តដើម្បីយកទៅសាកសួររកមូលហេតុដែលបណ្តាលឱ្យនាងចេះតែប៉ងលោតទឹកសម្លាប់ខ្លួនយ៉ាងនេះ។
សមត្ថកិច្ចបានអះអាងថា យុវតីចិត្តស្លុយម្នាក់នេះឈ្មោះ យិន សំណាង អាយុ១៧ឆ្នាំ ដោយនាងពុំបានប្រាប់ពីអាសយដ្ឋាននៅឯណាទេ ហើយការប៉ុនប៉ងលោតទឹកធ្វើអត្តឃាតនេះបានកើតឡើង២លើកមកហើយ តែនៅកន្លែងផ្សេងគ្នា ។
សមត្ថកិច្ចរៀបរាប់ថា កាលពីប៉ុន្មានថ្ងៃមុននារីវ័យក្មេងខាងលើក៏បានឡើងលើរបាស្ពានកំពតចាស់(ស្ពានឥន្ទនូ)បំរុងលោតសំលាប់ខ្លួនដែរ ប៉ុន្តែត្រូវបានសមត្ថកិច្ចនិងក្រុមអ្នកដំណើរជួយអន្តរាគមន៍នាំចុះមកវិញដោយសុវត្ថិភាព ហើយសមត្ថកិច្ចក៏បានយកទៅណែនាំរួចឱ្យត្រឡប់ទៅផ្ទះវិញ ស្រាប់តែមិនបានប៉ុន្មានថ្ងៃផងក៏ជិះកង់មកឈប់នៅកណ្តាលស្ពានបំរុងឡើងបង្កាន់ដៃស្ពាន គាប់ជួនសមត្ថកិច្ចជិះល្បាតឃើញទាន់ ក៏ជួយសង្គ្រោះម្តងទៀតទៅ តែនេះជាលើកទីពីរ ចុះបើនារីខាងលើនៅតែគិតខ្លីដោយចង់បញ្ចប់ជីវិតលើកទីបីឬទីបួនទៀតនោះប្រហែលជាស្រេចលើយមរាជជាអ្នកកំណត់ទៅចុះ។
ឥឡូវនេះ សមត្ថកិច្ចកំពុងនាំយកយុវតីចិត្តខ្លាំងទៅសាកសួររកមូលហេតុហើយ តើនាងខូចចិត្តដោយសាររឿងអ្វីឱ្យប្រាកដទៅ បានជាមិនចង់រស់បែបនេះ ស្រួលៗតិចលោនារីខាងលើមានសតិមិនគ្រប់ក៏អាចថាបាន៕
ណារិទ្ធ
