ខេត្តកំពត ៖ ស្នងការដ្ឋាននគរបាលខេត្តកំពត សហការជាមួយកំលាំងប៉ូលិសនៃអធិការដ្ឋាននគរបាលស្រុកកំពង់ត្រាច បានឃាត់ខ្លួនជនសង្ស័យម្នាក់ដែលជាមន្ត្រីនគរបាលនៃស្នងការនគរបាលខេត្តកំពតពីបទចែកចាយថ្នាំញៀន។
ប្រតិបតិ្តការនេះបានប្រព្រឹត្តឡើងនៅថ្ងៃទី17ខែមករា ឆ្នាំ2017វេលាម៉ោង16រសៀល ស្ថិតក្នុងភូមិថ្កូវ ឃុំឬស្សីស្រុកខាងលិច ស្រុកកំពង់ត្រាច ខេត្តកំពត ពោលគឺក្រោយពីចប់ការប្រជុំក្នុងស្នងការដ្ឋាននគរបាលខេត្តកំពតនាព្រឹកថ្ងៃដដែលនេះ។
ទាក់ទិននឹងបទល្មើសខាងលើ លោកឩត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពតបានបញ្ជាក់យ៉ាងម៉ឺងម៉ាត់ថា លោកមិនយោគយល់រសល់ទង្វើរបស់មន្ត្រីនគររូបនេះទេ ហើយលោកនឹងលុបឈ្មោះមន្ត្រីដែលប្រព្រឹត្តបទល្មើសគ្រឿងញៀនចេញពីក្របខ័ណ្ឌនគរបាលជាតិ ។
លោកក៏បានបង្ហើបផងដែរថា ជនសង្ស័យជាមន្ត្រីប៉ូលិសខាងលើមានឈ្មោះ ទូច សុមុទ្ទ ភេទប្រុស អាយុ45ឆ្នាំ ជាមន្ត្រីនគរបាលប្រចាំច្រកទ្វារតន់ហន់នៃឃុំព្រែកក្រឹស ស្រុកកំពង់ត្រាច។លោកស្នងការបានឱ្យដឹងផងដែរថា ក្នុងពេលឃាត់ខ្លួន កំលាំងក៏បានឆែកឆេររកឃើញវត្ថុតាងថ្នាំញៀនមួយចំនួនធំទៀតផង ដោយគ្រឿងញៀនទាំងអស់នេះសមត្ថកិច្ចបានបញ្ជូនទៅកាន់ស្នងការដ្ឋានសំរាប់ធ្វើកំណត់ហេតុបញ្ជូនទៅតុលាការ។
បច្ចុប្បន្នជនសង្ស័យជាមន្ត្រីប៉ូលិសរួមទាំវត្ថុតាងគ្រឿងញៀនសមត្ថកិច្ចកំពុងសាងសំណុំរឿងបញ្ជូនទៅសាលាដំបូងខេត្តកំពតចាត់ចែងតាមនិតិវិធីហើយ៕
