ខេត្តរតនគិរី៖ ប៉េអឹមខេត្តស្ទឹងត្រែង ស្នាក់ការលេខ៧៨១ បង្ក្រាបរថយន្តដឹកឈើប្រណិត១គ្រឿង ដែលបានដឹកចេញពីស្រែសាមី ស្រែគរជារៀងរាល់ថ្ងៃចូលមកក្រុងបានលុង ហើយដឹកទៅលក់បន្តនៅប្រទេវៀតណាម ត្រូវបានកម្លាំងប៉េអឹមស្នាក់ការខាងលើដេញចាប់បាន ត្រង់ចំណុចស្ថិតនៅភូមិ៣ឃុំក្រពាំងក្រហមស្រុកកូនមុំខេត្តរតនគិរី រថយន្តបាឡែនដឹកឈើប្រណិតប្រភេទធ្នុងពេញប្រៀប ចេញពីព្រំប្រទល់ខេត្តស្ទឹងត្រែង ត្រូវបានកម្លាំងប៉េអឹមស្នាក់ការ៧៨១ ធ្វើការបង្ក្រាបបាននៅក្បែរស្នាក់និងជិតស្នាក់ការប៉េអឹម ទិសក្របីជ្រុំ ដែលមានឈ្មោះហួរជាមេស្នាក់នោះ ហើយលោក ហ៊ួរ នេះមិនដែលចាប់បានឈើមួយឡានទេ ព្រោះគាត់ជាអ្នករកស៊ីឈើនៅតំបន់នោះដែរ ។
ប្រភពប្រជាពលរដ្ឋនៅក្បែរស្នាក់ការលោកហ៊ួរនោះបានឲ្យដឹងថាជារៀងរាល់ថ្ងៃគេឃើញរថយន្តតូចធំ ស៊េរីទំនើបៗដឹកឈើសឹងតែរូងផ្លូវទៅហើយ គាត់មិនដែលឃើញលោកហ៊ួរ ជាមេប៉េអឹមទិសនោះចាប់ឡានមួយណាទេ គឺបានត្រឹមតែដាក់ខែ-ថ្ងៃ ធ្វើមានធ្វើបានតែប៉ុណ្ណោះ ហើយឈើទាំងនេះត្រូវដឹកឆ្លងកាត់មេប៉េអឹមស្រុកកូនមុំជារៀងរាល់ថ្ងៃដែរ តែលោករស់ វណ្ណា មេប៉េអឹមស្រុកកូនមុំមិនចាប់ ហើយអង្គុយលាបាតដៃយកតែលុយប៉ុណ្ណោះ ។ ហេតុការណ៍បង្ក្រាបរថយន្តដឹកឈើនេះនៅវេលាម៉ោង៨នឹង១៨យប់ថ្ងៃទី២៨ខែមិថុនាឆ្នាំ២០១៦ កម្លាំងប៉េអឹមចាប់រថយន្តខាងលើនេះម៉ាកបាឡែនពណ៍ទឹកប្រាក់ពាក់ស្លាកលេខភ្នំពេញ២x១៣៦៥។
លោកអនុសេនីយ៍ឯក ហង្ស វុទ្ធី ជាជំនួយការស្នាក់ការ៧៨១បានឲ្យដឹងថា បានរកឃើញស្លាកលេខមួយទៀតនៅក្នុងរថយន្តដឹកបទល្មើសដែលមានលេខ ភ្នំពេញ២z.៦០៦១។
បច្ចុប្បន្ន កម្លាំងប៉េអឹមបញ្ជូនមកឲ្យជំនាញរដ្ឋបាលព្រៃឈើផ្នែកលំផាត់ចាត់ការបន្តតាមនិតិវិធីច្បាប់ព្រៃឈើ ៕
សន ចាន់ឌី
