(បន្ទាយមានជ័យ)៖ ឧត្តមសេនីយ៍ទោ សេង ធារិន មេបញ្ជាការរងយោធភូមិភាគទី៥ និងជានាយសេនាធិការ រួមជាមួយ ឧត្តមសេនីយ៍ទោ សិទ្ធ ឡោះ ស្នងការនគរបាលខេត្តបន្ទាយមានជ័យ ឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថបន្ទាយមានជ័យ នឹងក្រុមការងារចម្រុះ នៅល្ងាចថ្ងៃទី២១ ខែធ្នូ ឆ្នាំ២០២០នេះ បានអញ្ជើញចុះត្រួតពិនិត្យការងារ តាមខ្សែបន្ទាត់ព្រំដែនទិស១ បន្ទាយមានជ័យ ជា ពិសេសបានណែនាំឲ្យពលករទើបមកពីថៃ ត្រូវចូលរួមការពារកូវីដ១៩។
ក្នុងឱកាសចុះត្រួតពិនិត្យតាមខ្សែបន្ទាត់ព្រំដែនទិសទី១ បន្ទាយមានជ័យ ឧត្តមសេនីយ៍ទោ សេង ធារិន បានបានក្រើនរំលឹកដល់ពលករដែលឆ្លងដែនមកនាពេលនេះ ត្រូវបន្តអនុវត្តតាមការណែនាំរបស់ក្រសួងសុខាភិបាល គឺពាក់ម៉ាសរក្សាគម្លាតសង្គម គម្លាតសុវត្ថិភាព ១ម៉ែត្រកន្លះឡើងទៅ ឧស្សាហ៍លាងដៃសម្អាតជាមួយអាល់កុល សាប៊ូ ជែលឲ្យបានញឹកញាប់ និងត្រូវយកចិត្តទុកដាក់តាមដានសុខភាព ហើយធ្វើចត្តាឡីស័ក ឲ្យបានត្រឹមត្រូវ តាមការណែនាំរបស់ក្រសួងសុខាភិបាល។ បើមានបញ្ហាសុខភាពសូមទាក់ ទងទៅគ្រូពេទ្យដែលប្រចាំការ ឬទាក់ទងទៅលេខ១១៥ ជាបន្ទាន់។
សូមបញ្ជាក់ថា គិតត្រឹមម៉ោង ៥ល្ងាចនេះ ពលករខ្មែរដែលឆ្លងដែនចូលមកទឹកដីកម្ពុជាតាមច្រកអូរបីជាន់ មានចំនួនសរុប ១៨៣នាក់ ហើយត្រូវបានកម្លាំងកងទ័ពដឹកជញ្ជូនមកកាន់មណ្ឌលសុខភាពទី១ ជិតរង្វង់មូលប៉ោយប៉ែត ដើម្បីយកសំណាក់ នឹងធ្វើចត្តាឡីស័ក។ នៅព្រលប់ថ្ងៃទី២០ ខែធ្នូ ឆ្នាំ២០២០ ប្រមុខដឹកនាំរាជរដ្ឋាភិបាលកម្ពុជា សម្តេចតេជោ ហ៊ុន សែន បានផ្ញើសារពិសេស និងបន្ទាន់មួយជូនបងប្អូនប្រជាពលរដ្ឋកម្ពុជា ពាក់ព័ន្ធនឹងស្ថានភាពជំងឺកូវីដ-១៩ នៅក្នុងប្រទេសថៃ។
សម្តេចតេជោ ហ៊ុន សែន សូមអំពាវនាវដល់ពលករខ្មែរដែលកំពុងធ្វើការនៅប្រទេសថៃ សូមកុំមានភ័យខ្លាចអំពីបញ្ហានេះ និងសូមបន្តរស់នៅនិងធ្វើការនៅទីនោះ ព្រមទាំងគោរពតាមការណែនាំរបស់អាជ្ញាធរថៃ។
ក្រសួងការងារ និងបណ្តុះ បណ្តាលវិជ្ជាជីវៈ នៅថ្ងៃទី២១ ខែធ្នូ ឆ្នាំ២០២០នេះ បានចេញសេចក្តីជូនដំណឹងស្តីពីវិធាន ការការពារបងប្អូនពលករ ដែលកំពុងស្នាក់នៅ និងធ្វើការនៅប្រទេសថៃ ព្រមទាំងការផ្អាកបញ្ជូនពលករ MOU និងពលករតាមរដូវកាលទៅធ្វើការ ងារនៅប្រទេសថៃជាបណ្តោះ អាសន្ន ក្នុងអំឡុងពេលការរាតត្បាតជំងឺកូវីដ-១៩ នៅខេត្តសាមុតសាខន។
សូមបញ្ជាក់ថា អាជ្ញាធរសុខាភិបាលថៃបានប្រកាសនៅថ្ងៃទី២១ ខែធ្នូ ឆ្នាំ២០២០ នេះថា អ្នកឆ្លងជំងឺ COVID- 19 ថ្មីៗសរុប ៣៨២នាក់ទៀត ត្រូវបានរកឃើញបន្ថែមទៀត ដោយក្នុងចំណោមអ្នកឆ្លងទាំងនោះ ភាគច្រើនបំផុតគឺជាពលករចំណាកស្រុក ដែលស្ថិតនៅក្នុងខេត្ត សាមុត សាខន (Samut Sakhon) ភាគនិរតីប្រទេសថៃ។ នេះបើតាមការចេញផ្សាយ នៅមុននេះបន្តិចដោយសារព័ត៌មាន CNA។
កាលពីថ្ងៃអាទិត្យម្សិលមិញ អាជ្ញាធរសុខាភិបាលថៃបានប្រកាសថា ពួកគេនឹងធ្វើតេស្តលើមនុស្សសរុប ១០,០០០ នាក់ បន្ទាប់ពីការផ្ទុះករណីឆ្លង COVID-19 យ៉ាងគំហុកចំនួនជាង ៥០០នាក់ ដែលពាក់ព័ន្ធនឹងកន្លែងលក់អាហារសមុទ្រមួយ នៅក្នុងខេត្ត Samut Sakhon។ សម្រាប់ខេត្តនៅស្ថិតនៅក្បែរខាងដូចជា សាមុត សុងក្រាម (Samut Songkhram) និង ណាខន ផាធំ ( Nakhon Pathom) ក៏មានអ្នកជាប់ពាក់ព័ន្ធ ដែលត្រូវប្រមូលយកទៅធ្វើតេស្តរក COVID-19 ផងដែរ។
គួរបញ្ជាក់ថា គិតត្រឹមថ្ងៃចន្ទ ទី២១ ខែធ្នូ ឆ្នាំ២០២០នេះ ប្រទេសថៃមានករណីឆ្លងជំងឺ COVID-19 សរុប ៥,២៨៩ ករណី ក្នុងនោះស្លាប់ ៦០នាក់ និងជាសះស្បើយវិញ ៤,០៥៣នាក់៕
