ខេត្តសៀមរាប ៖ នារីម្នាក់ត្រូវបាន គេប្រទះឃើញ ចងករ សម្លាប់ខ្លួន នៅតំបន់អង្គរ ខេត្តសៀមរាប ត្រង់ចំណុច ផ្លូវទៅ អង្គរវត្ត ចំងាយ៣០០ម៉ែត្រ នៅខាងជើង កន្លែងឆែកសំបុត្រភ្ញៀវ ចូលខាងកើត ផ្លូវចំងាយ១០០ម៉ែត្រ ស្ថិតនៅក្រុមទី១៥ ភូមិមណ្ឌល់បី សង្កាត់ស្លក្រាម ក្រុង-ខេត្តសៀមរាប។
មន្ត្រីនគរបាលនៅកន្លែងកើតហេតុបានឲ្យដឹងថា នារីដែលចងកធ្វើអត្តឃាតខាងលើនេះមានឈ្មោះ ងួន មុន្នីរ័ត្ន អាយុ២៤ឆ្នាំ មានស្រុកកំណើតនៅភូមិពេងមាសត្បូង ឃុំស្ពឺ ស្រុកចំការលើ ខេត្តកំពង់ចាម។ បច្ចុប្បន្នស្នាក់នៅបន្ទប់ជួយភូមិបឹងដូនប៉ា សង្កាត់ស្លក្រាម ក្រុង-ខេត្តសៀមរាប មានមុខរបរជាបុគ្គលិកខារ៉ាអូខេ និងរៀនអ៊ុតសក់នៅពេលថ្ងៃ ។
មន្ត្រីដដែលបានបន្តថា នារីរងគ្រោះពិតជាបានចងក សម្លាប់ខ្លួនពិតប្រាដកមែនដោយមូលហេតុមានបញ្ហាក្នុងគ្រួសារ(ម្ដាយឈឺធ្ងន់អត់មានប្រាក់មើល) មិនមែនជាករណីឃាតកម្មទេ។ក្រុមគ្រួសារនៃសពបានរៀបរាប់ប្រាប់សមត្ថកិច្ចថាប៉ុន្មានថ្ងៃមុននេះ នាងមានទឹកមុខស្រពន ដោយបានប្រាប់បងប្អូនថា ម្តាយខ្ញុំឈឺនៅឯកស្រុក។
សូមបញ្ជាក់ផងដែរថា នារីរងគ្រោះប្រហែលជាលេបថ្នាំប៉ារ៉ាហើយបានចងកសម្លាប់ខ្លួនពីព្រោះនៅកន្លែងកើតហេតុឃើញមានសំបកថ្នាំប៉ារ៉ាចំនួន០៣បន្ទះ និងរបស់របរមួយចំនួនទៀត។
បច្ចប្បន្ន សពជនរងគ្រោះត្រូវបានកម្លាំងនគរបាលប្រគល់ជូនក្រុមគ្រួសារយកទៅធ្វើបុណ្យតាមប្រពៃណី នៅវត្តពោធិលង្កា ៕
ដោយ ៖ លុចណាម
