ខេត្តបន្ទាយមានជ័យ ៖ ក្រុមអ្នករកស៊ីដឹកទំនិញ បានឲ្យដឹងថា នៅលើកំណាត់ផ្លូវជាតិលេខ៥ ត្រង់ចំណុចក្រោម ដើមចន្ទគិរី ស្ថិតនៅភូមិគោកទម្លាប់ ឃុំអូរស្ងួត ស្រុកមង្គលបុរី ខេត្តបន្ទាយមានជ័យ មានមន្ត្រីនគរបាល ប្រឆាំងបទល្មើសសេដ្ឋកិច្ចខេត្ត ជាច្រើននាក់ ជាមួយនឹងមធ្យោបាយរថយន្ត ដាក់ធ្វើជាកុងត្រូលជជុះ សម្រាប់កាក់រថយន្ត ឲ្យចូលបង់ប្រាក់ និងទាមទារ ទៅតាមទំនើងចិត្ត។ ទីតាំងខាងលើនេះ ពួកគេបានឈរជើង ២៤ម៉ោងលើ ២៤ម៉ោង ដូច្នេះរថយន្តដឹកទំនិញ ត្រូវតែចូលបង់ប្រាក់ប្រចាំខែ និងបង់សម្រាប់ក្បាលឡាន ដើម្បីចៀសផុត ពីការប្រដេញបង្ក្រាប។
ក្រុមអ្នករកស៊ីដឹកទំនិញ បានត្អួញត្អែរពីផលលំបាក របស់ពួកគាត់ ពាក់ព័ន្ធទៅនឹងការរំខាន ពីសំណាក់ក្រុមនគរបាល ប្រឆាំងបទល្មើសសេដ្ឋកិច្ច ខេត្តបន្ទាយមានជ័យ ក៏ដូចជា ប៉ូលីសសេដ្ឋកិច្ចក្រសួង ដែលតែងតែ តម្រូវឲ្យ ពួកគាត់បង់ប្រាក់ តាមតែទំនើងចិត្តរបស់ពួកគេ ហើយក៏មានការត្រៀម រថយន្តប្រដេញប្រៀបដូចជា បង្ក្រាបបទល្មើសឧក្រិដ្ឋ ដោយមិនសំដៅ ទៅលើទំនិញគេចពន្ធ ឬស្របច្បាប់នោះឡើយ ។
ក្នុងនោះ គេឃើញសមត្ថកិច្ច ប្រើប្រាស់រថយន្ត ម៉ាកកាមរី ពណ៌ខ្មៅ ពាក់ស្លាកលេខ កណ្តាល ២ A ៣២៣៨ ទុកសម្រាប់ប្រដេញ ទៅលើក្រុមឈ្មួញ ដែលដឹកទំនិញឆ្លងកាត់ ហើយភ្លេច ចូលបង់លុយក្បាលឡាន ។
គួររំលឹកថា ករណីខាងលើនេះ ត្រូវបានគណៈបញ្ជាការឯកភាពខេត្ត ហាមឃាត់ និងលុបបំបាត់ ដើម្បីសន្តិសុខ សណ្តាប់ធ្នាប់ និងវិន័យថ្លៃថ្នូររបស់កងកម្លាំង ប៉ុន្តែសមត្ថកិច្ច ដែលបាននិងកំពុង ឈរជើងនៅទីនោះ បាននិងកំពុងអនុវត្ត ប្រាសចាកពីភារកិច្ច តួនាទី ក្នុងនាមជាអ្នកបង្ការ បង្ក្រាប ស៊ើបអង្កេត តាមដាន រាល់បទល្មើសសេដ្ឋកិច្ច ក៏ដូចជាការនាំចូល នូវចំណីអាហារមានជាតិពុល ។
ក្រុមអ្នករកស៊ីដឹកទំនិញ បានសំណូមពរ ឲ្យសាម៉ីអង្គភាព ក៏ដូចជាអាជ្ញាធរខេត្ត មេត្តាចាត់វិធានការ លុបបំបាត់ចំពោះ ភាពមិនប្រក្រតី ទាំងនេះផង ។ ប្រភពខ្លះ បានបញ្ជាក់ថា ទីតាំងកុងត្រូលជជុះខាងលើ ពិបាកក្នុងការលុបបំបាត់ ស្របពេលដែលលេចឮថា ថ្នាក់លើក៏ទទួលបាន ផលប្រយោជន៍ ពីមន្ត្រីទាំងនោះ ឬក៏និយាយដោយខ្លីថា អ្នកដែល ដាក់កុងត្រូលជជុះនោះ ប្រៀបដូចជាអ្នកទិញប៉ុស្តិ៍ ដូច្នេះពួកគាត់ត្រូវបង្ខំចិត្ត កាត់កេរ្តិ៍កាត់ខ្មាស់ ហ៊ានបំពានទៅនឹង ការហាមឃាត់ របស់អាជ្ញាធរខេត្តដើម្បីទាញយកនូវ ប្រភពសេដ្ឋកិច្ច សម្រាប់ឆ្នាំងបាយ បុគ្គលខ្លួនឯងផង និងសម្រាប់តម្រូវការ ថ្នាក់លើផង ក៏អាចថាបាន ៕
