ក្រោយពីទទួលបានសិទ្ឋក្នុងការគ្រប់គ្រងដីព្រៃឈើក្នុងខេត្តមណ្ឌលគិរី ពីក្រសួងកសិកម្មថ្មីៗកន្លងទៅនេះ គេសង្កេតឃើញថា មន្ត្រីរបស់មន្ទីរបរិស្ថានខេត្តបានកំពុង បញ្ចេញកណ្តាប់ដៃដែកបង្ក្រាបបទល្មើសព្រៃឈើ យ៉ាងមមាញឹក ខណៈរថយន្តដឹកឈើខុសច្បាប់ចំនួន៧គ្រឿង ត្រូវបានចាប់បង្ក្រាបជាបន្តបន្ទាប់ក្នុងខែមិថុនា នេះ។
ករណីថ្មីដែលមន្ត្រីបរិស្ថានទើបប្រតិបត្តិការកាលពីវេលាម៉ោង២នឹង៣០នាទីរសៀល ថ្ងៃទី២១ មិថុនា ២០១៦ នៅចំនុចគីឡូម៉ែត្រ១៥៩(កន្លែងកិនថ្ម)ក្នុងភូមិសាស្ត្រឃុំអូរអាម ស្រុកកែវសីមា គឺរថយន្តកាមរីគូថហើម ពណ័ខ្មៅ អត់ស្លាកលេខមួយគ្រឿង ត្រូវបាន ចាប់បង្ក្រាបភ្លាមៗនៅពេលដែលឈ្មួញកំពុងដឹកជញ្ជូន លើផ្លូវជាតិលេខ៧៦ពីស្រុកអូររាំង ឆ្ពោះទៅស្រុកកែវសីមា។
លោក រ័ត្ន សុវណ្ណ ប្រធានដែនជម្រកសត្វព្រៃកែវសីមា បានឲ្យដឹងថា នៅពេលកម្លាំងកំពុងចុះល្បាតតាមដងផ្លូវពីស្រុកកែវសីមា ទៅស្រុកអូររាំង បានប្រទះឃើញរថយន្តល្មើសខាងលើកំពុងធ្វើដំណើរតាមផ្លូវ ក៏ស្ទាក់ចាប់បានភ្លាមៗ។លោកបន្តថា នៅពេលកម្លាំងកំពុងប្រតិបត្តិការ អ្នកបើកបររថយន្តបានរត់គេចចូលព្រៃបាត់ស្រមោល។
រថយន្តដឹកឈើខុសច្បាប់ដែលជំនាញបរិស្ថានចាបបានចៃដន្យនោះ មានផ្ទុកឈើប្រណិតប្រភេទធ្នង់ចំនួន១០កំណាត់ តែនៅមិនទាន់វាស់វែងនៅឡើយទេ។បច្ចុប្បន្នវត្ថុតាងបានរក្សាទុកនៅមន្ទីរបរិស្ថានខេត្ត ដើម្បីចាត់ការតាមនិតិវិធីច្បាប់ ៕
