បន្ទាយមានជ័យ ៖ កម្លាំងអាវុធហត្ថក្រុងប៉ោយប៉ែត បានយកគ្រឿងអាហារបរិភោគ និងថវិកាមួយចំនួន ជូនដល់ប្រជាពលរដ្ឋដែលប្រទះឃើញអាវុធAK47 មួយដើមគុណភាពនៅ៩០ភាគរយ ពុំមានបង់ និងគ្រាប់ឡើយ ។ ជាក់ស្តែងកម្លាំងអាវុធហត្ថ ក្រុងប៉ោយប៉ែតបានលើកទឹកចិត្តនិងយកអំណោយជូនដល់ពលរដ្ឋ នៅព្រឹកថ្ងៃទី១៦ ខែមិថុនា ឆ្នាំ២០១៦ ដឹកនាំដោយ លោកវរ:សេនីយ៍ឯក បោន ប៊ិន មេបញ្ជាការរងអាវុធហត្ថខេត្ត លោកវរ:សេនីយ៍ត្រី ជា ដា មេបញ្ជាការមូលដ្ឋានអាវុធហត្ថក្រុងប៉ោយប៉ែត ។
លោកវរ:សេនីយ៍ឯក បោន ប៊ិន មេបញ្ជាការរងកងរាជអាវុធហត្ថខេត្ត បានមានប្រសាសន៍ថា ជានិច្ចជាកាលកម្លាំងអាវុធហត្ថតែងតែយកចិត្តទុកដាក់ដល់ សុវត្ថិភាព ស្ថេរភាព សន្តិសុខ និងបង្ក្រាបរាល់បទល្មើសជាក់ស្តែងជាបន្តបន្ទាប់ ទាំងអស់នេះជាការដឹកនាំ និងបទបញ្ជាដ៏តឹងរឹងរបស់លោកឧត្តមសេនីយ៍ត្រី ឱ បូរិន្ទ មេបញ្ជាការកងរាជអាវុធហត្ថខេត្ត ។
ក្នុងឱកាសនោះ លោកវរ:សេនីយ៍ឯក បោន ប៊ិន ក៏បានផ្តាំផ្ញើ ដល់ប្រជាពលរដ្ឋទាំងអស់ប្រសិនបើប្រទះឃើញ អាវុធយុទ្ធភ័ណមិនទាន់ផ្ទុះត្រូវរាយការណ៍ ជូនកងកម្លាំងប្រដាប់អាវុធគ្រប់លំដាប់ថ្នាក់ អាជ្ញាធរ ដែលនៅជិតលំនៅដ្ឋានរបស់បងប្អូនយើង។
អ្នករើសអេតចាយម្នាក់ប្រទះឃើញអាវុធនោះមានឈ្មោះ ទឹម ហន ភេទប្រុស អាយុ៥៦ឆ្នាំ រស់នៅភូមិ-សង្កាត់ ផ្សារកណ្តាល ក្រុងប៉ោយប៉ែត បានឲ្យដឹងថា អាវុធប្រភេទ AK47 នេះខណះពេលគាត់ទៅរើសអេតចាយ នៅគំនរសំរាមស្រាប់តែឃើញក្រណាត់ភួយរុំ ក៏សង្ស័យ យកមកហែកមើលក៏ឃើញអាវុធ រួចក៏រាយការណ៍ជូនសមត្ថកិច្ចភ្លាមៗតែម្តង ។ការលើកទឹកចិត្តដល់គាត់ដូចជា អំណោយដែលទទួលបាន អង្ករ៥០គីឡូក្រាម ទឹកត្រី ទឹកស៊ីអីុវ ៥យួរ ទឹកសុទ្ធ៥កេស មី៥កេស និងថវិកាចំនួន២០ម៉ឺនរៀល៕
