ខេត្តរតនៈគីរី ៖ ប្រភពពីមន្ត្រីអាជ្ញាធរក្រុងបានលុង ខេត្តរតនគិរី បានឲ្យដឹងថា ឈ្មួញពីរនាក់ប្ដីប្រពន្ធឈ្មោះ ទូច និងចែណាត ដែលមានទីលំនៅក្នុងភូមិថ្មី សង្កាត់ឡាបានសៀក ក្រុងបានលុង នៅតែបន្តប្រើប្រាស់រថយន្ត៣គ្រឿងដឹកជញ្ជូនឈើឆ្លងកាត់ក្រុងបានលុង យ៉ាងអនាធិបតេយ្យ។
សមត្ថកិច្ចតូចតាចមួយចំនួនក៏បាន បញ្ជាក់ដែរថាឈ្មួញឈ្មោះ ទូច និងចែណាត បានដឹកឈើពីស្រុកវ៉ឺនសៃ តំបន់អភិរក្សសត្វទោច និងឧទ្យានជាតិវីរៈជ័យ ចូលមកចែកចាយតាមរោងសិប្បកម្មក្នុងក្រុងបានលុង និងដឹកទៅលក់នៅស្រុកយួនដោយគ្មានញញើតអ្វីទាំងអស់។
ឈ្មួញរកស៊ីដឹកជញ្ជូនឈើក្នុងខេត្តរតនគិរី មួយចំនួនបានបង្ហើបឲ្យដឹងថាឈ្មួញឈ្មោះ ទូច និងចែណាត មានទំនាក់ទំនងយ៉ាងជិតស្និទ្ធជាមួយមន្ត្រីរដ្ឋបាលព្រៃឈើគ្រប់លំដាប់ថ្នាក់ក្នុងខេត្តរតនគិរី ក៏ដូចជាសមត្ថកិច្ចពាក់ព័ន្ធជាច្រើនស្ថានប័នទៀត ទើបអាចគេចផុតពីការបង្ក្រាប។ ដោយសារតែឈ្មួញឈ្មោះ ទូច និងចែណាត អាចបន្តដឹកជញ្ជូនឈើពីស្រុកវ៉ឺនសៃ តំបន់អភិរក្សសត្វទោច និងឧទ្យានជាតិវីរៈជ័យ តាមអំពើចិត្តបែបនេះហើយ ទើបបទល្មើសកាប់ឈើប្រណីតនិងឈើប្រភេទលេខ១ក្នុងតំបន់នោះបន្តកើតឡើងយ៉ាងរាលដាល។ លោក កែប កត់ នាយខណ្ឌរដ្ឋបាលព្រៃឈើខេត្តរតនគិរី និងប្រធានមន្ទីរបរិស្ថានខេត្តរតនគិរី មិនដែលចាត់វិធានការបង្ក្រាបឈ្មួញឈ្មោះ ទូច និងចែណាត នោះទេព្រោះខ្លាចបាត់បង់ផលប្រយោជន៍ផ្ទាល់ខ្លួន ហើយបណ្ដោយឲ្យបទល្មើសនៅតែរាលដាលឥតឈប់ឈរ។
ឈ្មួញរកស៊ីឈើក្នុងខេត្តរតនគិរី មួយចំនួនបានឲ្យដឹងថា ការដែលមន្ត្រីជំនាញនិងសមត្ថកិច្ចពាក់ព័ន្ធមិនបង្ក្រាបឈ្មួញឈ្មោះ ទូច និងចែណាត គឺដោយសារឈ្មួញពីរនាក់ប្ដីប្រពន្ធនេះ បង់លុយឲ្យមន្ត្រីជំនាញនិងសមត្ថកិច្ចពាក់ព័ន្ធជាច្រើនស្ថាប័នតាមលំដាប់លំដោយ។ ប្រភពបានឲ្យដឹងទៀតថា មន្ត្រីពាក់ព័ន្ធនិងសមត្ថកិច្ចខ្លះទទួលបាន៥០០០ដុល្លារ ៣៥០០ដុល្លារ ២០០០ដុល្លារ និង១៥០០ដុល្លារ ជាប្រចាំខែទើបមិនចាត់វិធានការបង្ក្រាបឈ្មួញឈ្មោះ ទូច និងចែណាត ដែលកំពុងប្រើរថយន្ត៣គ្រឿងដឹកជញ្ជូនឈើខុសច្បាប់យ៉ាងពេញបន្ទុក ។ បញ្ហានេះលោក ឆេង គឹមស៊ុន អគ្គនាយករដ្ឋបាលព្រៃឈើ និងលោក វេង សាខុន រដ្ឋមន្ត្រីក្រសួងកសិកម្ម គួរពិនិត្យមើលខ្លះផងព្រោះបច្ចុប្បន្នបទល្មើសកាប់ឈើក្នុងស្រុកវ៉ឺនសៃ តំបន់អភិរក្សសត្វទោច និងឧទ្យានជាតិវីរៈជ័យ កំពុងកើតឡើងយ៉ាងមហន្តរាយ៕
