ខេត្តប៉ៃលិន ៖ កាលពីព្រឹកថ្ងៃទី០៩ ខែ០៦ ឆ្នាំ២០១៦ នៅសាលាខេត្តប៉ៃលិនមានរៀបចំពិធីក្រុងពលី បញ្ចុះបឋមសិលាគ្រឹះក្នុងការសាងសង់អាគាររដ្ឋបាលសាលាខេត្តថ្មី ដែលស្ថិត នៅបរិវេណសាលាខេត្តចាស់ ដោយពិធីនេះមានការអញ្ចើញចូលរួមពី ឯកឧត្តម កើត សុធា អភិបាលខេត្តប៉ៃលិននិងលោកជំទាវ ព្រមទាំងលោកជំទាវ ជា លាភ អភិបាលរងខេត្ត ប៉ៃលិន ឯកឧត្តម លោកជំទាវ អស់លោក-លោកស្រី ប្រធាន អនុប្រធានមន្ទីរ ស្ថាប័ន សមត្ថកិច្ច អង្គភាពជុំវិញខេត្ត ក្រុង ស្រុក ជាច្រើនអ្នកទៀត។
ឯកឧត្តមកើត សុធា អភិបាលខេត្តប៉ៃលិនបានមានសប្រសាសន៍ថា៖ការសាងសង់នូវអាគាររដ្ឋបាលសាលាខេត្តថ្មីនេះឡើងគឺក្នុងគោល បំណងសម្រួលសេវារដ្ឋបាលសាលាខេត្តអោយបានកាន់ទូលំទូលាយជាងមុន និងរហ័សជាងមុន ព្រោះអាគារចាស់ក៏មានភាពចាស់ទ្រុឌទ្រោម និងចង្អៀតបន្តិចហើយដែរ ម្យ៉ាងបច្ចុប្បន្ននេះតម្រូវការសេវារដ្ឋបាលមានបរិមាណច្រើនផងដែរ ដូច្នេះការសាងសង់អគាររដ្ឋបាលសាលាខេត្តថ្មីនេះនឹងជួយសម្រួលការងារថ្នាក់ខេត្តបានច្រើន។
លើសពីនោះក៏មានការបំពាក់នូវជណ្តើរយន្ត ប្រព័ន្ធសុវត្ថភាព ប្រព័ន្ធត្រួតពិនិត្យការងារដែលមានភាពងាយស្រួលជាងមុនផងដែរ។ ចំពោះគម្រោងសាងសង់អគាររដ្ឋបាលសាលាខេត្តថ្មីនេះក៏នឹងគ្រោងត្រូវចំណាយថវិការអស់ ៣ពាន់លានរៀល នឹងត្រូវសាងសង់រួចរាល់នៅដើមឆ្នាំ ២០១៨ ផងដែរ។
ឯកឧត្តមបានបញ្ជាក់បន្ថែមថា ៖ យើងដឹងហើយថា អតីតកាលខេត្តប៉ៃលិនជាខេត្តមួយដែលពីមុនជាតំបន់សមរភូមិក្តៅនិងបាតដៃទទេ តែដោយបច្ចុប្បន្នមានការយកចិត្តទុកខ្ពស់ពីរាជរដ្ឋាភិបាលទើបខេត្តប៉ៃលិនរបស់យើងបានមានការអភិវឌ្ឍនស្ទើរគ្រប់វិស្ស័យ នេះជាមោទនភាពសម្រាប់ខេត្តប៉ៃលិនទាំងមូល ហើយសមិទ្ធផលថ្មីដែលយើងនឹងទទួលបានថ្មីមួយទៀតគឺអគាររដ្ឋបាលសាលាខេត្ត។
ឯកឧត្តមបានកោតសសើរនិងជម្រុញមន្ត្រីសាលាខេត្តទាំងមូលត្រូវប្រឹងប្រែងខិតខំយកចិត្តទុកដាក់ការងារបន្ថែមទៀត ផ្តល់សេវារដ្ឋបាលអោយមានភាពរហ័សជាងមុន ក្នុងសេចក្តីថ្លៃថ្នូរ មានក្រមសីលធម៌ វិជ្ជាជីវៈ មានកិច្ចសហការ និងទំនាក់ទំនងល្អ ជាមួយថ្នាក់ដឹកនាំ និងអាជ្ញាធរដែនដី គ្រប់លំដាប់ថ្នាក់ ដើម្បីអោយសេវារដ្ឋបាលថ្នាក់ខេត្ត មានការអភិវឌ្ឍន៍ ទាំងរចនាសម្ព័ន្ធ បច្ចេកទេស និងគុណភាព ។ ហើយសូមអោយនៅតាមបណ្តាអង្គភាព មន្ទីរជំនាញនៅជុំវិញខេត្តត្រូវពង្រឹងការងារ មន្ត្រីរបស់ខ្លួន ជាពិសេសវត្តមាន ហើយអោយមានកិច្ចប្រជុំត្រួតពិនិត្យការងារ និងវត្តមានជាប្រចាំផងដែរ ៕
អ៊ុក ទូច
