(ខេត្តកំពត)៖ លោក ជាវ តាយ អភិបាលនៃគណៈអភិបាលខេត្តកំពត បានបញ្ជាក់ថា៖ គម្រោងអភិវឌ្ឍតំបន់ឆ្នេរខ្សាច់នៅភូមិកែបថ្មី ស្ថិតក្នុងឃុំបឹងទូក ស្រុកទឹកឈូ ខេត្តកំពត នឹងជួយជំរុញផ្នែកវិស័យទេសចរណ៍ក្នុងខេត្តកំពតឲ្យកាន់តែមានសក្តានុពល។
ការលើកឡើងបែបនេះ គឺលោកតែងតែលើកឡើងនៅក្នុងកិច្ចប្រជុំនានាក្នុងសាលាខេត្តកំពតកន្លងមក។
លោកថា៖ បច្ចុប្បន្នគឺជាគម្រោងមួយនេះក្រោមការផ្ដល់សិទ្ធិវិនិយោគពីរាជរដ្ឋាភិបាល ក្រុមប្រឹក្សាអភិវឌ្ឍន៍កម្ពុជាហៅថា (CDC )ជូនក្រុមហ៊ុនក្នុងស្រុកមួយឈ្មោះថា(IGB)តំណាងដោយលោក ជា សុខហេង ប្រធានក្រុមហ៊ុនយ៉ាងពិតប្រាកដក្នុងគោលបំណងដើម្បីអភិវឌ្ឍន៍បម្រើឲ្យវិស័យទេសចរណ៍ក្នុងតំបន់ នៃខេត្តកំពត។
លោក ជាវ តាយ ក៏បានរម្លឹកបញ្ជាក់ជូនថា៖ ដោយក្នុងរយៈពេលកន្លងមកនេះតែងតែមានការលេចឮ លើកឡើងខុសៗគ្នាជាច្រើន ពាក់ព័ន្ធគម្រោងអភិវឌ្ឍន៍តំបន់ឆ្នេរខ្សាច់កែបថ្មីរបស់ក្រុមហ៊ុនវិនិយោគ (IGB)ហើយនៅចុងក្រោយនេះឃើញមានការលើកឡើងប្លែកៗហើយមានការផ្សព្វផ្សាយតាមប្រព័ន្ធផ្សព្វផ្សាយមួយចំនួនដោយមិនមានភាពច្បាស់លាស់ម្ដងថាសង្ស័យរដ្ឋបាលខេត្តលក់ ម្ដងថាមានការស៊ុមគ្រលំ ម្ដងថាការអភិវឌ្ឍហ្នឹងវាអត់ស្របច្បាប់។
ដូច្នេះចំណុចខាងលើនេះ លោក ជាវ តាវអភិបាលខេត្ត បានចង់ជម្រាបបញ្ជាក់ជូនដល់អ្នកសារព័ត៌មានក្នុងឱកាសនោះឲ្យបានយល់ថារដ្ឋបាលខេត្តមិនមានបំណងណាមួយឃុបឃិតដើម្បីលក់ដីរដ្ឋទៅឲ្យបុគ្គលណាម្នាក់នោះទេ នៅក្នុងគម្រោងនោះគឺរដ្ឋបាលខេត្តមានគំនិតចង់អភិវឌ្ឍន៍ដើម្បីធ្វើយ៉ាងណាឲ្យខេត្តទទួលបាននូវភ្ញៀវទេសចរណ៍ហើយបម្រើសេវាជូនប្រជាពលរដ្ឋមកកម្សាន្ដសំដៅកាត់បន្ថយភាពក្រីក្ររបស់ប្រជាពលរដ្ឋនេះហើយដែលស្របតាមបំណងរាជរដ្ឋាភិបាលចង់បាន។
លោកអភិបាលខេត្តបន្តជំរាបជូនថា កន្លងមកនេះរដ្ឋបាលខេត្តតែងបានលើកឡើងជូនក្នុងអង្គប្រជំុជាច្រើនដងរបស់រដ្ឋបាលខេត្តថាតំបន់កែបថ្មីនេះជាតំបន់មួយមានការវិនិយោគ ហើយមានច្បាប់ទម្លាប់ដោយមានការសម្រេចរបស់ក្រុមប្រឹក្សាអភិវឌ្ឍកម្ពុជា(CDC)នៅក្នុងនោះគឺមានទំហំដី២០០ហិកតាគឺរដ្ឋបាលខេត្តទទួលបាន៤០ភាគរយអ្នកវិនិយោគទទួលបាន៦០ភាគរយ មានន័យថារដ្ឋបាលខេត្តទទួលបានដី៨០ហិកតាអ្នកវិនិយោគទទួលបាន១២០ហិកតា។
ប៉ុន្តែរឿងរ៉ាវទាំងនេះយើងដឹងហើយថា ការវិនិយោគនេះគឺមិនទើបតែមានពេលនេះទេ គឺមានយូរហើយដែលមានឈ្មោះក្រុមហ៊ុនកែវ ជា បន្ទាប់មកក្រុមហ៊ុនកែវជា ក៏បានផ្ទេរឲ្យមកក្រុមហ៊ុន(IGB)ជាសុខហេងនេះវិញ។ហើយបច្ចុប្បន្ននេះរដ្ឋបាលខេត្តក៏បានជំរុញឲ្យក្រុមហ៊ុននេះអនុវត្តគោលការណ៍របស់រាជរដ្ឋាភិបាលដើម្បីជាចំណែករបស់រដ្ឋបាលខេត្តយកទៅធ្វើការអភិវឌ្ឍឆ្នេរមួយដ៏ស្រស់ស្អាតដើម្បើបម្រើវិស័យទេសចរណ៍ឲ្យបានលឿនឆាប់រហ័សយ៉ាងហោចនៅចុងឆ្នាំ២០១៩នេះក៏ត្រូវឲ្យមានឆ្នេរខ្សាច់សម្រាប់បម្រើភ្ញៀវទេសចរណ៍មកកម្សាន្ដបានមួយចំណែកផងដែរ។
លោកអភិបាលខេត្តក៏បានជម្រាបជូនដែរថា រដ្ឋបាលខេត្តគឺជាសេនាធិការ ឫតំណាងរាជរដ្ឋាភិបាល តែបើអ្វីមានជាច្បាប់ ជាបទដ្ឋានគតិយុត្តិទាំងឡាយណាគឺរដ្ឋបាលខេត្តត្រូវតែអនុវត្តតាមអ្វីដែលមាននៅក្នុងច្បាប់និងរបស់រាជរដ្ឋាភិបាល។
ជាមួយគ្នានេះ លោកឧញ៉ា ជា សុខហេង ម្ចាស់គម្រោងអភិវឌ្ឍន៍កែបថ្មី បានបញ្ជាក់ប្រាប់កម្ពុជាថ្មី នៅរសៀលថ្ងៃទី០៣ ខែឧសភា ឆ្នាំ២០១៩ថា ការបង្កើតតំបន់ទេសចរណ៍ថ្មីនៅទីនេះ នឹងជួយទាក់ទាញក្រុមអ្នកទេសចរឲ្យមកលម្ហែ កម្សាន្តកាន់តែច្រើនឡើងៗ ពិសេសបានបង្កើននូវមុខរបរ អាជីវកម្មដល់បងប្អូនប្រជាពលរដ្ឋក្នុងខេត្តកំពត បានប្រកបការងាររកសីុកាន់តែច្រើន និងជួយកាត់បន្ថយភាពក្រីក្រដល់ពួកគាត់ផងដែរ។
លោកឧញ៉ា ជា សុខហេង បានបន្ថែមថា គម្រោងអភិវឌ្ឍន៍កែបថ្មី នឹងត្រូវចាប់ផ្តើមអនុវត្តជាបណ្តើរៗទៅតាមគោលការណ៍ ដោយក្រុមហ៊ុនទទួលបាន៦០ភាគរយ ចំណែក៤០ភាគរយទៀតជារបស់រដ្ឋបាលខេត្ត ពោលគឺក្នុងចំណោមផ្ទៃដី២០០ហិកតា ក្រុមហ៊ុនទទួលបាន១២០ហិកតា ឯរដ្ឋបាលខេត្តកំពតមានចំណែក ៨០ហិកតា៕ សេង ណារិទ្ធ
