(ខេត្តកែប)៖ នៅព្រឹកថ្ងៃសៅរ៍១កើត ខែពិសាខ ឆ្នាំកុរ ឯកស័ក ព.ស ២៥៦២ ត្រូវនឹងថ្ងៃទី០៤ ខែឧសភា ឆ្នាំ២០១៩ លោក កែន សត្ថា អភិបាល នៃគណៈអភិបាលខេត្តកែប និងប្រធានគណៈកម្មាធិការសាខាកាកបាទក្រហមកម្ពុជាខេត្ត រួមដំណើរដោយ លោក លោកស្រីជាសមាជិក សមាជិកាគណៈកម្មាធិការសាខាកាកបាទក្រហមខេត្ត អនុសាខាកាកបាទក្រហមក្រុង ក្រុមប្រឹក្សាក្រុង សង្កាត់ អញ្ជេីញចូលរួមបុណ្យសព កញ្ញា ជីវ អីុញ អាយុ ២២ ឆ្នាំ ដែលបានទទួលមរណៈភាពដោយជំងឺប្រចាំកាយ ព្យាបាលមិនជា។
ក្នុងឱកាសនោះដែរ លោក កែន សត្ថា ប្រធានគណៈកម្មាធិការសាខាកាកបាទក្រហមខេត្ត ក៏បានមានប្រសាសន៍ចូលរួមរំលែកទុក្ខនិងលើកទឹកចិត្តដល់ក្រុមគ្រួសារសព ពិសេសបានពាំនាំការផ្តាំផ្ញើ ចូលរួមរំលែកទុក្ខពីសំណាក់សម្តេចប្រធាន និងបាននាំយកអំណោយរបស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា រួមមានគ្រឿងឧបភោគ បរិភោគ ជាអង្ករពីបាវស្មើ ១០០ គ.ក្រ ទឹកបរិសុទ្ធ០២កេះ ទឹកក្រូច ១កេះ មី ០២កេះ ទឹកត្រី០១យួរ នឹងថវិកា ១.២០០.០០០ រៀល ប្រគល់ជូនដល់ក្រុមគ្រួសារសពទុក្ខចាត់ចែងធ្វេីបុណ្យតាមប្រពៃណីយ៍នៅគេហដ្ឋាននៃសព ស្ថិតក្នុងភូមិកែប សង្កាត់កែប ក្រុងកែប។
ជាមួយគ្នានេះ ក្រុមគ្រួសារនៃសព កញ្ញា ជីវ អិុញ ក៏សូមថ្លែងអំណរគុណយ៉ាងជ្រៀលជ្រៅបំផុត ចំពោះអាជ្ញាធរគ្រប់លំដាប់ថ្នាក់ ដូចជាក្រុមការសាខាកាកបាទក្រហមខេត្ត ជាពិសេសសម្តេចទាំងទ្វេរដែលជានិច្ចកាលតែងរួមសុខរួមទុក្ខជាមួយប្រជាពលរដ្ឋគ្រប់មូលដ្ឋាន ដោយមិនទុកឲ្យពលរដ្ឋណាម្នាក់រស់នៅឯកាឡើយ៕ សេង ណារិទ្ធ
