(ខេត្តកែប)៖ នៅរសៀលថ្ងៃទី៣០ ខែមេសា ឆ្នាំ២០១៩ មន្ទីរសេដ្ឋកិច្ច និងហិរញ្ញវត្ថុខេត្តកែប បានបើកកិច្ចប្រជុំផ្សព្វផ្សាយសារាចរណែនាំលេខ ០៥ សរណន ចុះថ្ងៃទី១០ ខែមេសា ឆ្នាំ២០១៩ ស្តីពីការរៀបចំផែនការយុទ្ធសាស្ត្រថវិកាឆ្នាំ២០២០-២០២២ ក្រោមវត្តមាន លោក អ៊ុក ថា អភិបាលរងខេត្តកែប ដោយកិច្ចប្រជុំនេះក៏មានការចូលរួមពីលោក លោកស្រីប្រធាន អនុប្រធានមន្ទីរ អង្គភាពពាក់ព័ន្ធ ប្រធានគណនេយ្យ រជ្ជទេយ្យករ ភ្នាក់ងារបើកផ្តល់។
កិច្ចប្រជុំនេះត្រូវបានរៀបចំ ដោយមន្ទីរសេដ្ឋកិច្ច និងហិរញ្ញវត្ថុ និងប្រតិភូអគ្គនាយកដ្ឋានថវិកា នៃក្រសួងសេដ្ឋកិច្ច និងហិរញ្ញវត្ថុ។
លោក អ៊ុក ថា អភិបាលរងខេត្ត បានបញ្ជាក់ថា កិច្ចប្រជុំនេះត្រូវបានរៀបចំឡើងក្នុងគោលបំណង ផ្សព្វផ្សាយ ជំរុញ និងធានាបាននូវការរៀបចំផែនការយុទ្ធសាស្ត្រថវិកា ឆ្នាំ២០២០-២០២២ ស្របតាមស្មារតីរបស់បទដ្ឋានគតិយុត្តជាធរមាន និងការដាក់ចេញនូវការងារធ្វើបន្តជូនអង្គភាពថវិកា ដើម្បីធានាបាននូវភាពទាន់ពេលវេលានៃការរៀបចំផែនការយុទ្ធសាស្ត្រថវិកា ឆ្នាំ២០២០-២០២២។
សូមជម្រាបថា៖ កិច្ចប្រជុំនេះ បានដំណើរការតាមរបៀបវារៈ សំខាន់ៗ ចំនួន ០៣ គឺ៖
១./បទបង្ហាញអំពីសារាចរណែនាំលេខ ០៥ សរណន ស្តីពី ការរៀបចំផែនការយុទ្ធសាស្ត្រថវិកា ឆ្នាំ២០២០-២០២២ ដោយមន្ត្រីជំនាញតំណាងអគ្គនាយកដ្ឋានថវិកា ដោយផ្តោតសំខាន់លើ៖
– ក្របខណ្ឌគោលនយោបាយម៉ាក្រូសេដ្ឋកិច្ចនិងហិរញ្ញវត្ថុសាធារណៈ
– រចនាសម្ព័ន្ធ និងគោលការណ៍នៃការរៀបចំផែនការយុទ្ធសាស្ត្រថវិកាឆ្នាំ២០២០-២០២២
២/ បទបង្ហាញដោយមន្ត្រីជំនាញតំណាងអគនាយកដ្ឋានថវិកាក្រសួង ដោយផ្តោតសំខាន់លើ៖
– សេចក្តីព្រាងបឋមនៃផែនការយុទ្ធសាស្ត្រថវិកា ឆ្នាំ ២០២០-២០២២ របស់មន្ទីរជំនាញជុំវិញខេត្ត.។
៣/ ផ្សេងៗ ដោយផ្តោតសំខាន់លើ៖
– ការគ្រោងចំណាយបន្ទុកបុគ្គលិកក្នុងផែនការយុទ្ធសាស្ត្រថវិកា ឆ្នាំ២០២០-២០២២ របស់អង្គភាព ថវិកាទើបទទួលបានការផ្ទេរសិទ្ធិលើប្រតិបត្តិការចំណាយបន្ទុកបុគ្គលិក ចាប់ពីឆ្នាំ២០១៩ តទៅ
– ការកំណត់ការិយបរិច្ឆេទប្រមូលឯកសារផ្លូវការ នៃផែនការយុទ្ធសាស្ត្រថវិកា ឆ្នាំ២០២០-២០២២ ពីបណ្តាអង្គភាពថវិកា៕ សេង ណារិទ្ធ
