ខេត្តសៀមរាប ៖ នៅក្នុងរដូវបិទនេសាទនេះ គេសង្កេតឃើញបទល្មើសនេសាទប្រើឧបករណ៍ខុសច្បាប់ក្នុងខេត្ត សៀមរាបកំពុងកើតឡើងយ៉ាងអនាធិបតេយ្យមានដូចជា ការដាក់សាច់ដៃក្រឡាញឹក ២ ទៅ ៣ហ៊ុន, សម្រុងសាច់ ជើងរ៉ាវមានប្រវែងពី ៦ ទៅ ៧ម៉ែត្រចុះក្រោម និងបណ្តោយប្រវែងរាប់ពាន់ម៉ែត្រដាក់ខ្វាត់ខ្វែង តាមមាត់ព្រែក ដងព្រែកនៅចំណុចបាត់កាំបិតនៅខាងកើតមាត់ស្ទឹងអូរធំ ស្ថិតក្នុងឃុំប្ញស្សីកែវ ស្រុកជីក្រែង ខេត្តសៀមរាប ហើយក៏ជាតំបន់អភិរក្សផងដែរ ។
លោក ព្រិន សុវិន នាយខណ្ឌរដ្ឋបាលជលផលខេត្តសៀមរាប ត្រូវបានប្រជាពលរដ្ឋរិះគន់ថា លោកមិនបានយកចិត្ត ទុកដាក់បង្ក្រាប និងជាអ្នកបើកដៃឱ្យមានបទល្មើសនេសាទទាំងនេះ កើតឡើងយ៉ាងអនាធិបតេយ្យទំនងជាទទួល បានលាភសក្ការៈពីក្រុមឈ្មួញនេសាទខុសច្បាប់ទាំងនោះហើយមើលទៅ ទើបបទល្មើសនេសាទកើតឡើងពាសពេញ ផ្ទៃបឹងទន្លេសាបយ៉ាងដូច្នេះ ។
តាមប្រភពព័ត៌មានពីប្រជានេសាទតូចតាចបានឱ្យដឹងថា មុខរបរនេសាទលក្ខណៈគ្រួសាររបស់ពួកគាត់ដូចជា ដាក់មង, ចងសន្ទូច ស្ទើរតែមិនអាចរកលុយទិញអង្ករច្រកឆ្នាំងបានទៀតទេ ដោយសារសព្វថ្ងៃមានបទល្មើសនេសាទ ដាក់សាច់ដៃក្រឡាញឹក កំពុងកើតឡើងយ៉ាងពេញបន្ទុក និងប៉ះពាល់ធ្ងន់ធ្ងរដល់ការរស់នៅរបស់ពួកគាត់ថែមទៀត ផង ។
ប្រភពដដែលបន្តទៀតថា ពួកគាត់ទទួលស្គាល់ថា មន្ត្រីជំនាញពាក់ព័ន្ធធ្លាប់បានចាត់វិធានការបង្ក្រាបម្តងម្កាលដែរ ប៉ុន្តែហាក់បីដូចមិនមានប្រសិទ្ធភាពនោះទេ ។
ទាក់ទិននឹងបញ្ហាចោទប្រកាន់ទាំងនេះ នាយរដ្ឋបាលជលផលស្រុកជីក្រែង លោក ជុំ ភាព បានប្រាប់អ្នកយកព័ត៌មាន ឱ្យដឹងថា ខាងជំនាញរបស់ពួកលោក ធ្លាប់ចុះត្រួតពិនិត្យ និងបង្ក្រាបផងដែរ ។ ដូច្នេះ ឯកឧត្តម អេង ជាសាន អគ្គនាយករដ្ឋបាលជលផល និង ឯកឧត្តម ឃឹម ប៊ុនសុង អភិបាលខេត្តសៀមរាប គួរចាត់វិធានការទប់ស្កាត់បទ ល្មើស នេសាទជាបន្ទាន់ ដើម្បីកុំឱ្យមន្ត្រីជំនាញជលផលអសមត្ថភាពប្រព្រឹត្តអំពើជាលក្ខណៈប្រព័ន្ធ បើកដៃឱ្យឈ្មួញ នេសាទខុសច្បាប់ទាំងនេះ ធ្វើអ្វីៗតាមអំពើចិត្តតទៅទៀត ។
ជុំវិញបញ្ហានេះដែរ អ្នកសារព័ត៌មានយើងបានទូរស័ព្ទទៅកាន់លោក ព្រិន សុវិន នាយខណ្ឌរដ្ឋបាលជលផលខេត្ត សៀមរាប ដើម្បីសុំការបំភ្លឺជុំវិញការចោទប្រកាន់ទាំងនេះ នៅពេលទូរស័ព្ទបានលើក ម្ចាស់ទូរស័ព្ទក៏បាននិយាយថា គាត់ជាជំនួយការរបស់លោក ព្រិន សុវិន លោកនឹងជូនដំណឹងនេះទៅនាយខណ្ឌរដ្ឋបាលជលផលសិន ដោយមិនឃើញ ទូរស័ព្ទត្រឡប់មកវិញ ។ សារព័ត៌មានយើងក៏បានព្យាយាមទូរស័ព្ទទៅកាន់ ព្រិន សុវិន ម្តងទៀត ទូរស័ព្ទបានចូល ប៉ុន្តែពុំមានអ្នកលើកសោះ ៕
