មណ្ឌលគិរី ៖ ប្រភពព័ត៌មានពីមន្ត្រីតូចតាចនៅស្រុកពេជ្រាដាបានបង្ហើបថា ក្នុងអំឡុងថ្ងៃបុណ្យភ្ជុំបិណ្ឌកន្លងទៅប៉ុន្មានថ្ងៃមុននេះ មានថៅកែជាជនជាតិវៀតណាមនឹងឈ្មួញជាជនជាតិខ្មែរ បានលួចនាំឈើចម្រុះរាប់រយម៉ែត្រគូបចេញ ពីទឹកដីស្រុកពេជ្រាដា ចូលទៅដីវៀតណាមតាមចន្លោះច្រករបៀងប៉ុស្តិ៍៥នឹងប៉ុស្តិ៍៦ ។
បើតាមសេចក្តីរាយការណពីប្រជាសហគម៏នឹងពលរដ្ឋរស់ នៅស្រុកពេជ្រាដាខេត្តមណ្ឌលគីរីក្នុងរយៈពេល7ថ្ងៃគិ តចាប់ពីរថ្ងៃទី៨ តុលា ២០១៥ មកដល់ថ្ងៃទី១៥ តុលា ២០១៥ នេះយ៉ាងហោចណាស់ក្នុងមួយថ្ងៃៗមានត្រាក់ទ័រវៀតណាមពី១០ទៅ១៥គ្រឿង ហើយក្នុងមួយគ្រឿងអាចដឹកបានយ៉ាងហោចណាស់៣ទៅ៥ម៉ែត្រគូប ចូលមកកាប់ឈើនៅទឹកដីខ្មែរត្រង់ចំណុចចន្លោះប៉ុស្តិ៍5នឹងប៉ុស្តិ៍6ដែលគេហៅថា (ប៉ុស្តិ៍ដាក់ជម)ស្ថិតនៅឃុំត្រង់តេះ ស្រុកពេជ្រាដាខេត្តមណ្ឌលគីរី។
ជាក់ស្ដែងនៅល្ងាចថ្ងៃទី១២ តុលា វេលាម៉ោង៣រសៀល ប្រជាពលរដ្ឋចំនួនពីរនាក់ដែលបានចូលទៅចំណុចខាងលើនោះ គ្រាន់តែទៅដល់ពាក់កណ្ដាលផ្លូវ នៅចំណុចដែលគេហៅថា(ពាមអូរ៉ែត)ពួកគាត់បានយកម៉ាស៊ីនថតៗរូបភាពត្រាក់ទ័រវៀតណាមដែលកំពុងដឹកនឹងអូសឈើចេញពីដីខ្មែរ។ក៏ស្រាប់តែមានទាហ៊ានមួយក្រុមមកធ្វើការគំរាមគំហែងនឹងចាប់ដកយកម៉ាស៊ីនថតលុបរូបភាពទាំងអស់ចោល ហើយបានគំរាមថា ត្រូវឈប់មកថតនៅកន្លែងនេះទៀតព្រោះកន្លែងនេះ ក្រោមការគ្រប់គ្រងរបស់«អាញ់»បើមានមុខមកថ្ងៃក្រោយទៀត ពួកឯងចាំមើលទៅថាយ៉ាងម៉េចនឹងដឹងហើយ។
ប្រជាពលរដ្ឋបានបញ្ជាក់ថាក្រុមទាហ៊ាននោះមានគ្នាបីនាក់ ទីមួយឈ្មោះត្រា ទីពីរឈ្មោះថាត ទីបីឈ្មោះវាន់ សុណូ ជាទាហ៊ានវរៈការពារព្រំដែនគោកលេខ១០៣ ប្រចាំព្រំដែនស្រុកពេជ្រាដា។
ជុំវិញបញ្ហានេះ លោក អ៊ុំ សុវណ្ណ មេបញ្ជាការវរៈ១០៣ នៅពេលដែលអ្នកសារព័ត៌មានទូរស័ព្ទទៅសុំការបំភ្លឺពីលោកៗឆ្លើយថា អ្នកណាហ្នឹង…ស្ដាប់មិនបានទេ…ខ្ញុំជាប់រវល់នៅប្រជុំឯវៀតណាម… រួចក៏បិទទូរស័ព្ទតែម្ដង។ចំណែកក្រុមទាហ៊ានដែលរងការចោតប្រកាន់ពីប្រជាពលរដ្ឋថា បានចាប់ដកម៉ាស៊ីនថតលុបរូបចោលនោះ ក៏មិនអាចសុំការបំភ្លឺបានដែរ ព្រោះអត់ស្គាល់លេខទូរស័ព្ទ។
សូមរំឭកថា នាពេលកន្លងមករដ្ឋមន្ត្រីក្រសួងមហាផ្ទៃ សម្តេចក្រឡាហោម ស ខេង បានប្រកាសឲ្យមន្ត្រីក្រោមបង្គាប់អនុវត្តការបិទច្រករបៀង និងបញ្ឈប់ការជួលដីឲ្យជនជាតិវៀតណាមនៅតាមព្រំដែន ជៀសវាងបទល្មើសនិងជម្លោះពេលអនាគត។
សម្តេចក្រឡាហោម ស ខេង លើកឡើងបែបនេះក្នុងកិច្ចប្រជុំផ្សព្វផ្សាយអំពីបច្ចុប្បន្នភាពការងារ កំណត់បង្គោលខណ្ឌសីមា និងបោះបង្គោលព្រំដែនរវាងប្រទេសកម្ពុជានិងវៀតណាម។ សម្តេចមានប្រសាសន៍ថា កម្ពុជាមានច្រកអន្តរជាតិធំៗគ្រប់គ្រាន់ហើយ ដូច្នេះមិនចាំបាច់មានច្រករបៀងដែលអាចមានការប្រព្រឹត្តបទល្មើស ជាច្រើនឆ្លងកាត់នោះទេ។
សម្តេចបន្ថែមថា បញ្ហាចម្បងមួយទៀតដែលសមត្ថកិច្ចត្រូវយកចិត្តទុកដាក់ គឺត្រូវទប់ស្កាត់ជនអន្តោប្រវេសន៍ខុសច្បាប់ដែលហូរចូលមកកម្ពុជា និងបញ្ឈប់ការជួលដីដល់ជនជាតិវៀតណាមសម្រាប់ធ្វើស្រែចម្ការ ឬស៊ីឈ្នួលច្រូតស្រូវឲ្យជនជាតិវៀតណាមដែលបានជួលដីខ្មែរ ដែលបញ្ហាទាំងនេះនឹងបង្កឲ្យក្លាយជាវិវាទព្រំដែនក្នុងពេលអនាគត ៕
