លោក ឆេង សុវត្ថិ គ្រាន់តែឡើងកាន់តំណែងថ្មីៗ ជានាយការិយាល័យនគរបាលប្រឆាំងបទល្មើស សេដ្ឋកិច្ចនៃស្នង ការដ្ឋាននគរបាលខេត្តបន្ទាយមានជ័យ មិនទាន់បានប៉ុន្មានខែផង ស្រាប់តែឮថា លោក ឆេង សុវត្ថិ ប្រើអំណាចទារ លុយយកធ្វើមានធ្វើបានយ៉ាងត្រជាក់ចិត្តបំផុត ។
មន្ត្រីនគរបាលខេត្តបន្ទាយមានជ័យបានឱ្យដឹងថា លោក ឆេង សុវត្ថិ ដែលចូលកាន់តំណែងថ្មីៗ ជំនួសលោក ចាប សុផារិទ្ធ កាលពីថ្ងៃទី២៣ ខែកញ្ញា ឆ្នាំ២០១៥ កំពុងធ្វើសកម្មភាពមិនខុសពីលោក ចាប សុផារិទ្ធ នោះទេ។
ប្រភពពីមន្ត្រីនគរបាលខេត្តបន្ទាយមានជ័យ បានឱ្យដឹងថា ក្រោយពេលទទួលបានតំណែងជានាយការិយាល័យប្រឆាំងបទល្មើសសេដ្ឋកិច្ចរួចមក លោក ឆេង សុវត្ថិ ដាក់ពង្រាយកម្លាំងក្រោមឱវាទតាមគោលដៅជាច្រើនកន្លែង ដើម្បីប្រមូលលុយធ្វើមានធ្វើបានផ្ទាល់ខ្លួន។ ដោយឡែកគោលដៅទាំងនោះមានដូចជា ចំណុចសាលាក្រហមលើផ្លូវជាតិលេខ៥ តាមបណ្តោយផ្លូវជាតិលេខ៦ ពីខេត្តបន្ទាយមានជ័យទៅខេត្តសៀមរាប ច្រកព្រំដែនស្រុកម៉ាឡៃ ច្រកបឹងត្រកួន និងច្រកអន្តរជាតិប៉ោយប៉ែត ជាដើម។
ឈ្មួញនិងក្រុមអាជីវករដឹកជញ្ជូនទំនិញបានឱ្យដឹងថា បើទោះជាបីបង់ពន្ធតាមច្បាប់ យ៉ាងណាក៏ដោយ ក៏ជៀសមិនផុតពីត្រូវបង់លុយឱ្យកូនចៅលោក ឆេង សុវត្ថិ តាមគោលដៅនិមួយៗដែរ។ ដូច្នេះ លោក អាត់ ខែម ស្នងការនគរបាលខេត្តបន្ទាយមានជ័យ គួរទប់ស្កាត់សកម្មភាពដ៏អាក្រក់របស់លោក ឆេង សុវត្ថិ ជាបន្ទាន់ ដើម្បីកុំឱ្យប៉ះពាល់ដល់កេរ្តិ៍ឈ្មោះស្ថាប័ននគរបាលជាតិទាំងមូល។
ប្រភពព័ត៌មានពីមន្ត្រីនគរបាលខេត្តបន្ទាយមានជ័យ បានឱ្យដឹងថា លោក ឆេង សុវត្ថិ កំពុងចាត់តាំងមន្ត្រីនគរបាល ក្រោមឱវាទរបស់ខ្លួន ឱ្យឃ្លាំមើលឈ្មួញ ដឹកទំនិញគេចពន្ធ និងទំនិញស្របច្បាប់ ដើម្បីប្រមូលផលប្រយោជន៍ចែកគ្នា យ៉ាងសុខស្រួលបំផុត។
តាមពិនិត្យជាក់ស្តែងសកម្មភាពរបស់លោក ឆេង សុវត្ថិ មិនខុសពីជំនាន់លោក ចាប សុផារិទ្ធ នៅកាន់តំណែងជា នាយការិយាល័យប្រឆាំងបទល្មើសសេដ្ឋកិច្ចនៃស្នងការដ្ឋាន នគរបាលខេត្តបន្ទាយមានជ័យនោះទេ។
បញ្ហានេះហើយដែលឈ្មួញនិងអាជីវកររកស៊ីដឹកជញ្ជូនទំនិញរិះគន់ យ៉ាងខ្លាំង ទៅលើសកម្មភាពមន្ត្រីនគរបាល ប្រឆាំងបទល្មើសសេដ្ឋកិច្ចខេត្តបន្ទាយមានជ័យ នៅក្រោមការគ្របគ្រងរបស់លោក ឆេង សុវត្ថិ។ ដូច្នេះលោក គោស៊ុំ សារឿត អភិបាលខេត្តបន្ទាយមានជ័យ និងជាគណៈបញ្ជាការឯកភាពខេត្ត ព្រមទាំងលោក អាត់ ខែម ស្នងការនគរបាលខេត្តបន្ទាយមានជ័យ ទប់ស្កាត់អំពើអាក្រក់របស់លោក ឆេង សុវត្ថិ និងបក្ខពួកជាបន្ទាន់ ។
សារព័ត៌មានយើងបានទំនាក់ទំនងដើម្បីសុំការបំភ្លឺពីលោក ឆេង សុវត្ថិ នាយការិយាល័យនគរបាលប្រឆាំងបទល្មើស សេដ្ឋកិច្ចនៃស្នងការដ្ឋាននគរបាលខេត្តបន្ទាយមានជ័យដែរ ព្រោះមិនស្គាល់លេខទូរស័ព្ទ ៕
