(ខេត្តកំពត) ៖ ដោយសារការបម្រែបម្រួលអាកាសធាតុ បានធ្វើឲ្យពពួកសត្វក្រៀលមានការផ្លាស់ប្តូរពេលវេលានៃការមកដល់រមណីយដ្ឋានធម្មជាតិបឹងអន្លង់ព្រីងស្ថិតក្នុងស្រុកកំពង់ត្រាច ខេត្តកំពត ដើម្បីស្នាក់នៅ និងរកចំណី ដែលធ្លាប់តែមានភាពទៀងទាត់នាបណ្តាឆ្នាំកន្លងមកនោះ។ គិតត្រឹមចុងខែកុម្ភៈ វត្តមានសត្វកម្រនេះទើបតែ បានប្រមាណជិត១៣០ក្បាលប៉ុណ្ណោះ តែមន្ត្រីជំនាញអះអាងថាបរិមាណសត្វក្រៀលនឹងមិនថយចុះជាងឆ្នាំមុន ឡើយ ខណៈដែលពេញមួយនៃរដូវកាលមុនមានចំនួន២៥៧ក្បាល។
លោក ស៊ុយ ធា ប្រធានមន្ទីរបរិស្ថានខេត្តកំពតបានប្រាប់ឲ្យដឹងថាគិតត្រឹមថ្ងៃទី០៣ ខែមីនា ឆ្នាំ២០១៩ វត្តមានសត្វក្រៀលនៅរមណីយដ្ឋានធម្មជាតិបឹងអន្លង់ព្រីងទើបតែមាន១២៨ក្បាលប៉ុណ្ណោះ។ ឆ្នាំនេះការមក ដល់របស់ពពួកសត្វក្រៀលមានភាពយឺតយ៉ាវជាងបណ្តាឆ្នាំមុនៗ ពោលគឺរហូតដល់ចុងខែមករាទៅហើយទើប មានវត្តមានប្រមាណ៦ទៅ៧ក្បាល។ បញ្ហានេះអាចបណ្តាលមកពីបម្រែបម្រួលអាកាសធាតុទើបធ្វើឱ្យការមកដល់របស់ពពួកសត្វក្រៀលត្រូវផ្លាស់ប្តូរពេលវេលា។
លោកប្រធានមន្ទីរបានបញ្ជាក់ថា ជាធម្មតាសត្វក្រៀលតែងមកដល់តំបន់អន្លង់ព្រីងដែលសម្បូរចំណីប្រភេទរុក្ខជាតិផ្លុងនេះចាប់ពីខែវិច្ឆិការហូតដល់ខែឧសភានៃឆ្នាំបន្ទាប់ទើបត្រឡប់ទៅវិញ។ ប៉ុន្តែទោះជាបែបនោះក្តី លោកសង្ឃឹមថាចំនួនសត្វក្រៀលរដូវកាលនេះនឹងមិនថយចុះជាងឆ្នាំមុនទេ ព្រោះជាធម្មតានៅចន្លោះខែមីនា ដល់ចុងខែមេសា សត្វក្រៀលតែងតែពពាក់ពពូនមកច្រើនធ្វើឱ្យបរិមាណកើនពីចន្លោះ២៥០ក្បាល ទៅ៣០០ក្បាល។ ឆ្នាំមុនពេញមួយរដូវកាល សត្វក្រៀលមានចំនួន២៥៧ក្បាលប៉ុណ្ណោះ។
លោកម៉ម រិន ប្រធានសហគមន៍ការពារតំបន់អន្លង់ព្រីងបានរៀបរាប់ថាពីមុនសត្វក្រៀលចាប់ផ្តើមមាន វត្តមានចាប់ពីខែវិច្ឆិកាដល់ខែឧសភា តែឆ្នាំនេះរហូតដល់ចុងខែមករាទើបចាប់ផ្តើមមាន។ ជារៀងរាល់ឆ្នាំ សត្វក្រៀលតែងធ្វើដំណើរវិលជុំគឺចេញពីតំបន់ព្រែកល្ពៅ ខេត្តតាកែវ ចូលមកអន្លង់ព្រីងខេត្តកំពត រួចបន្តទៅអាងត្រពាំងថ្ម ខេត្តបន្ទាយមានជ័យ ហើយឆ្ពោះទៅតំបន់ត្មាតប៉ើយ ខេត្តព្រះវិហារដើម្បីពងកូន។ លោកប្រធានសហគមន៍បានបញ្ជាក់ថាក្នុងតំបន់ការពារអន្លង់ព្រីងនៅមានសត្វស្លាបប្រមាណជិត១០០ប្រភេទទៀតដែល សូម្បីពពួកខ្លះស្ទើរផុតពូជក៏បានបង្ហាញខ្លួនដែរ ដូចជាសត្វគ្រលេងគ្រលោងជាដើម។ ប៉ុន្តែប្រភេទសត្វដែលភ្ញៀវបរទេសចូលចិត្តទស្សនា និងផ្តិតយករូបថតជាងគេគឺពពួកសត្វក្រៀលតែម្តង។
លោកម៉ម រិនបានបន្តថា មានតែភ្ញៀវបរទេសប៉ុណ្ណោះដែលតែងមកកម្សាន្ត និងផ្តិតយករូបភាពល្អៗនៅរមណីយដ្ឋានធម្មជាតិមួយនេះ ឯទេសចរជាតិហាក់ដូចជាមិនបានចាប់អារម្មណ៍ក្នុងការលម្ហែកម្សាន្តឡើយ។ ដូច្នេះ ក្នុងនាមសហគមន៍ លោកសូមអំពាវនាយដល់ភ្ញៀវជាតិបង្វែទិសនាំកូនចៅមកគយគន់ពពួកក្រៀលដែល ប្រភេទសត្វកម្រ ហើយមានវត្តមានរយៈពេលខ្លីបំផុតក្នុងមួយឆ្នាំៗដើម្បីឱ្យពួកគេបានស្គាល់ និងផ្សាភ្ជាប់មនោសញ្ចេតនាជាមួយធម្មជាតិផង។
សូមបញ្ជាក់ថាតំបន់ការពារសត្វស្លាបអន្លង់ព្រីងមានទីតាំងស្ថិតក្នុងភូមិសាស្ត្រនៃឃុំព្រែកក្រឹស និងឃុំបឹងសាលាខាងត្បូងដោយពលរដ្ឋបីភូមិចូលរួមអភិរក្ស ក៏ដូចជាជួយដល់កិច្ចការទាំងឡាយ។ ដើម្បីបានដល់រមណីយដ្ឋានមួយនេះ អ្នកដំណើរលើដងផ្លូវជាតិលេខ៣៣ ក្នុងទិសដៅកំពត-កំពង់ត្រាច ត្រូវបន្តភ្ជាប់ជាមួយផ្លូវ ជាតិលេខ៣១ រួចបង្ហួសតាមផ្លូវទៅច្រកទ្វារទាន់ហន់ប្រហែល៥០០ម៉ែត្រ បត់ចុះខាងស្តាំ។ ធ្វើដំណើរលើផ្លូវលំ ក្រួសក្រហមប្រមាណប្រាំបីគីឡូម៉ែត្រ ភ្ញៀវទាំងឡាយនឹងប្រទះឃើញផ្ទៃបឹងល្ហល្ហេវដែលស្ថិតក្រោមការមើលថែពីសំណាក់ហគមន៍ការពារអន្លង់ព្រីង និងគ្រប់គ្រងដោយមន្ទីរបរិស្ថានខេត្តកំពត៕
សេង ណារិទ្ធ
