ខេត្តព្រះវិហារ ៖ ព្រះគ្រូ រស់ សុខរាជ ឧត្តមទីប្រឹក្សាផ្ទាល់សម្តេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជនៃព្រះរាជាណាចក្រកម្ពុជា និងជាព្រះចៅអធិការវត្តព្រហ្មវិហារធម៌តេជោជប់រង្សីសារា រាម (ហៅវត្តអង្គការអេដស៍)ស្ថិតនៅភូមិស្រអែមខាងត្បូង ឃុំកន្ទួត ស្រុកជាំក្សាន្ត ខេត្តព្រះវិហារ និងអាចារ្យគណៈ កម្មាធិការពុទ្ធបរិស័ទ សូមថ្លែងអំណរគុណ ឯកឧត្តម ឧត្តមសេនីយ៍ត្រី ហ៊ុន សុខា នាយករងមជ្ឈមណ្ឌលស្រាវជ្រាវ នឹងបណ្ណាល័យ និងជាជំនួយការអមទីស្តីការគណៈរដ្ឋមន្ត្រី ដែលបានជួយវត្តក្រីក្រ ដែលមានការខ្វះខាតយ៉ាងខ្លាំង ដែលជាវត្តនៅចុងកាត់មាត់ញក ប្រជាជនក្រីក្រ សង់ទីលំនៅថ្មីជំនាន់វាយប្រយុទ្ធប្រាសាទព្រះវិហារខ្មែរ-ថៃ ហើយវត្ត ទើបកើតថ្មីជំនាន់នោះដែរ ពុំទាន់មានវត្តសាលាឆាន់សមរម្យនៅឡើយ មិនទាន់មានកុដិសមរម្យមិនទាន់មានព្រះវិហារ នៅឡើយ វត្តមានការខ្វះខាតទាំងស្រុង ។
កាលពីពេលថ្មីៗកន្លងទៅនេះ ឯកឧត្តម ឧត្តមសេនីយ៍ត្រី ហ៊ុន សុខា បានអញ្ជើញទៅសម្ពោធកុដិបន្ទប់ទឹក អាងទឹកនៅវត្តអង្គការអេដស៍ ទន្ទឹមនឹងនោះដែរ ឯកឧត្តម បានចូលរួមប្រគេនបច្ច័យសងថ្លៃឈើសាងសង់កុដិ ដែលធ្វើរួចហើយចំនួន ២០០០ដុល្លារ (ពីរពាន់ដុល្លារអាមេរិក)ចែកអំណោយដល់លោកយាយលោកតា សារុងមួយម្នាក់ ឧបត្ថម្ភដល់លោកគ្រូអ្នកគ្រូ នូវថវិកាចំនួន ១០ដុល្លារ ម្នាក់ ។ រីឯសិស្សានុសិស្សបានទទួលថវិកាបន្តិចបន្តួច សៀវភៅ ប៉ិច និងកូនសិស្សរៀនពូកែ ស្រីមួយ និងប្រុសមួយ នូវម៉ូតូចំនួន ២គ្រឿង ព្រមទាំងតម្លើងទូរទស្សន៍ប្រគេនវត្ត ១គ្រឿងទុកសម្រាប់លោកតាលោកយាយមើលព័ត៌មាន និងស្តាប់ធម៌អាថ៌ ។
ឯកឧត្តម ហ៊ុន សុខា បានសន្យាថា និងជួយទ្រទ្រង់វត្តនេះមិនចោលជាដាច់ខាត ស្របតាមគោលនយោបាយ របស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជានាយករដ្ឋមន្ត្រីតម្រង់ទិសថា វិស័យអាណាចក្រ និងវិស័យពុទ្ធចក្រ គឺមានការអភិវឌ្ឍន៍ដើរទន្ទឹមគ្នា ។
ឯកឧត្តម ហ៊ុន សុខា មានប្រសាសន៍ផ្សព្វផ្សាយបន្តទៀតថា សូមប្រជាពលរដ្ឋកុំជឿតាមការញុះញង់បំបែក បំបាក់ពីសំណាក់ជនអគតិមួយចំនួនតូច ហើយសូមបងប្អូនទាំងអស់បន្តគាំទ្រគណបក្សប្រជាជនកម្ពុជា ដែលបានរំដោះ ប្រជាពលរដ្ឋឱ្យរួចផុតពីបនប្រល័យពូជសាសន៍ប៉ុលពត នៅថ្ងៃទី ០៧ ខែមេសា ឆ្នាំ១៩៧៩ ឱ្យយើងមានជីវិតរស់រាន ឡើងវិញ រហូតមកដល់ថ្ងៃនេះ ដែលមានការអភិវឌ្ឍន៍លើគ្រប់វិស័យ មានសុខសន្តិភាព និងការរីកចំរើន ហើយទីណា មានទុក្ខលំបាក មានសម្តេចទាំងពីរ គឺសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជួយបងប្អូនគ្រប់គ្រាទាំងអស់ ។
ក្រោមការដឹកនាំរបស់រាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី ប្រទេសជាតិទាំងមូលមានការអភិវឌ្ឍន៍រីកចំរើនលើគ្រប់វិស័យក្នុងនោះវិស័យព្រះពុទ្ធសាសនា ដែលជាសាសនារបស់រដ្ឋ ត្រូវបានលើកកម្ពស់តាមរយៈការកសាងសមិទ្ធផលនានាក្នុងវត្តអារាម ដែលសឱ្យឃើញថា ព្រះពុទ្ធសាសនា នៅកម្ពុជានាពេលបច្ចុប្បន្នគឺមានការរីកចំរើន ដែលបានធ្វើឱ្យថ្នាក់ដឹកនាំ មន្ត្រីរាជការសប្បុរសជន ពុទ្ធបរិស័ទ ប្រជាពលរដ្ឋជ្រះថ្លាជាមួយ និងសទ្ធាក្នុងការធ្វើបុណ្យទានផ្សេងៗ ៕
