(ខេត្តកំពត)៖ នៅព្រឹកថ្ងៃសៅរ៍ ១១រោច ខែមាឃ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០២ ខែមីនា ឆ្នាំ២០១៩ លោក ជាវ តាយ អភិបាល នៃគណៈអភិបាលខេត្តកំពត បានដឹកនាំថ្នាក់ដឹកនាំមន្ទីរ អង្គភាពជំនាញជុំវិញខេត្ត អញ្ជើញចុះពិនិត្យអំពីស្ថានភាពនៃការធ្វើស្រែប្រាំងរបស់បងប្អូនប្រជាកសិករនៅភូមិអូរ ឃុំត្រពាំងរាំង ស្រុកជុំគិរី ខេត្តកំពត។
មានប្រសាសន៍ទៅកាន់បងប្អូនប្រជាកសិករក្នុងឱកាសនេះ លោកអភិបាលខេត្ត បានបញ្ជាក់ថា ដោយអនុវត្តតាមប្រសាសន៍ណែនាំដ៏ថ្លៃថ្លា របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការត្រៀមគ្រប់មធ្យោបាយជួយអន្តរាគមន៍ដល់បងប្អូនប្រជាពលរដ្ឋដែលជួបការលំបាក ថ្ងៃនេះក្នុងនាមរដ្ឋបាលខេត្តកំពត បានដឹកនាំមន្ទីរ អង្គភាពជំនាញដើម្បីពិនិត្យពីស្ថានភាពនៃការធ្វើស្រែប្រាំងរបស់បងប្អូនប្រជាកសិករនៅភូមិអូរតូច ឃុំត្រពាំងរាំង ស្រុកជុំគិរី ខេត្តកំពត នាពេលនេះ ដើម្បីស្វែងរកវិធីសាស្ត្រដោះស្រាយការខ្វះខាតទឹកធ្វើស្រែប្រាំង។ ឆ្លៀតក្នុងឱកាសនោះ ផងដែរ លោកក៏បានទទួលយកសំណូមពររបស់សហគមន៍ដែលបានសំណូមពរឲ្យក្រុមផលិតទឹកស្អាត បង់វិភាគទាន១០ម៉ឺនរៀលក្នុងមួយខែដើម្បីទ្រទ្រង់ដល់ដំណើរការរបស់សហគមន៍ដោយអនុវត្តចាប់ពីខែមីនា ឆ្នាំ២០១៩នេះតទៅ។
ជាមួយនេះ លោកបានសំណូមពរដល់បងប្អូនប្រជាកសិករឲ្យផ្លាស់ប្តូរផ្នត់គំនិតក្នុងការចេះទទួលយកបច្ចេកទេសថ្មីៗ និងប្រភេទដំណាំ ដែលប្រើប្រាស់ទឹកតិច ទទួលផលច្រើន និងមានចំណូលខ្ពស់ ដើម្បីផ្គុតផ្គង់ជីវភាពប្រចាំថ្ងៃ ដោយមិនត្រូវពឹងផ្អែកទៅលើការធ្វើស្រែតែមួយមុខប៉ុណ្ណោះទេ។ លើសពីនោះ លោកក៏បានណែនាំដល់មន្ទីរកសិកម្មខេត្តកំពត ធ្វើការសិក្សាពិនិត្យលទ្ធភាពផ្តល់បច្ចេកទេសដល់ប្រជាកសិករនឹងប្តូរប្រភេទដំណាំដើម្បីទប់ទល់គ្រោះរាំងស្ងួតផងដែរ។ ចំពោះការជួសជុលអាងទំនប់ទឹក លោកបានឯកភាពឲ្យប្រធានមន្ទីរធនធានទឹក និងឧតុនិយមខេត្តធ្វើការស្តារនិងជួសជុលក្នុងខែមេសាខាងមុននេះហើយ៕
សេង ណារិទ្ធ
