(ខេត្តកំពត)៖ នៅព្រឹក.ថ្ងៃសុក្រ ១០រោច ខែមាឃ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី ០១ ខែ មីនា ឆ្នាំ២០១៩ នេះ លោក ជាវ តាយ អភិបាល នៃគណៈអភិបាលខេត្ត អញ្ជើញជាអធិបតីក្នុងកិច្ចប្រជុំរៀបចំអនាម័យក្នុងក្រុងកំពត ត្រៀមរៀបចំអបអរសាទរបុណ្យកំពតសង្ក្រាន ឆ្នាំ២០១៩ ចូលឆ្នាំថ្មី ប្រពៃណីខ្មែរដែកឈានចូលមកដល់នាពេលខាងមុខនេះ។
សមាសភាពអញ្ជើញក្នុងកិច្ចប្រជុំនេះរួមមាន នាយករដ្ឋបាលសាលាខេត្ត ប្រធានមន្ទីរទេសចរណ៍ខេត្ត ប្រធានមន្ទីរសាធារណការ និងដឹកជញ្ជូនខេត្ត ប្រធានមន្ទីរបរិស្ថានខេត្ត អភិបាលក្រុងកំពត ចៅសង្កាត់ទាំង៥ និងមន្ត្រី សរុប ២១នាក់។
ក្នុងកិច្ចប្រជុំ លោក ជាវ តាយ បានជំរុញឲ្យមន្ទីរពាក់ព័ន្ធ សាលាក្រុង សង្កាត់ទាំង៥ធ្វើការផ្សព្វផ្សាយអនុវត្ត ដល់ប្រជាពលរដ្ធចូលរួមសម្អាតអនាម័យ រៀបចំលំនៅដ្ឋាន តុបតែងលម្អឲ្យមានសោភណ្ឌភាព ហើយរដ្ឋបាលក្រុងកំពត ត្រូវណែនាំឲ្យក្រុមហ៊ុន Gaea ប្រមូលសំអាតឲ្យបានទៀងទាត់ សម្អាតតាមដងផ្លូវក្នុងក្រុងកំពតឲ្យបានល្អប្រសើរ មានគុណភាព ដើម្បីត្រៀមរៀបចំ កំពតសង្ក្រាន ឆ្នាំ២០១៩ខាងមុខនេះ៕ សេង ណារិទ្ធ
