នៅថ្ងៃអង្គារ ទី២៦ ខែសីហា ឆ្នាំ២០២៥នេះ ឧត្តមសេនីយ៍ឯក អ៊ុំ សុខ អគ្គលេខាធិការរង សមាគមអតីតយុទ្ធជនកម្ពុជា បានចុះពិនិត្យបច្ចុប្បន្នភាពបងប្អូនគ្រួសារពលីមរណៈ អតីតយុទ្ធជននៅផ្ទះ៤០០ខ្នង ស្ថិតក្នុងភូមិជីកដី ឃុំអណ្តូងត្របែក ស្រុករមាសហែក ខេត្តស្វាយរៀង និងមានការចូលរួមពីលោក ម៉ែន អេង អភិបាលរងខេត្ត លោកស្នងការរងខេត្ត លោកប្រធានមន្ទីរសង្គមកិច្ចខេត្ត លោកប្រធាន-អនុប្រធានមន្ទីរនានាជុំវិញខេត្ត និងអាជ្ញាធរពាក់ព័ន្ធមួយចំនួនទៀត។
លោកបានលើកឡើងថា ការចុះពិនិត្យនេះដើម្បីធ្វើបច្ចុប្បន្នភាពបងប្អូនគ្រួសារអតិតយុទ្ធជន ដែរបានមករស់នៅជាប្រចាំ និងមានបងប្អូនខ្លះទៀតមិនបានមករស់នៅ និងរកមូលហេតុដែលគាត់មិនមករស់នៅ ដើម្បីក្រុមការងាររកដំណោះស្រាយជូនពួគាត់ ដោយមិនចង់អោយបងប្អូនគ្រួសារអតីតយុទ្ធជន ពលី ណាម្នាក់ជួបការលំបាកឡើយ។
លោកបានបញ្ជាក់ទៀតថា អតីតយុទ្ធជន គឺជាគំរូវីរភាពដ៏មោះមុត និងគុណបំណាច់ដ៏ធំធេង របស់វីរយុទ្ធជន យុទ្ធនារី នៃកងកម្លាំងប្រដាប់អាវុធ និងប្រជាពលរដ្ឋគ្រប់ស្រទាប់ ដែលបានពលិកម្មយ៉ាង អង់អាចក្លាហាន បូជាសាច់ស្រស់ ឈាមស្រស់ ដើម្បីបុព្វហេតុជាតិមាតុភូមិជាទីស្នេហានៃយើង។ ពលិកម្ម ប្រកបដោយស្មារតីស្នេហាជាតិរបស់វីរអតីតយុទ្ធជន យុទ្ធនារី និងប្រជាពលរដ្ឋយើងនៅគ្រប់ដំណាក់កាល នៃប្រវត្តិសាស្ត្រ គឺបានរួមចំណែកយ៉ាងសំខាន់ក្នុងកិច្ចការពារបូរណភាពទឹកដី ការកសាងសុខសន្តិភាព និងស្ថិរភាពសង្គមសម្រាប់ព្រះរាជាណាចក្រកម្ពុជា សំដៅធានាឱ្យមានការអភិវឌ្ឍសេដ្ឋកិច្ច និងសង្គម ដើម្បីជាឧត្តមប្រយោជន៍សម្រាប់ជាតិមាតុភូមិ និងប្រជាជនកម្ពុជា។
លោកក៍បានថ្លែងអំណរគុណ ដល់មន្ទីរអង្គភាព ស្ថាប័នពាក់ព័ន្ធ រដ្ឋបាលខេត្ត ក្រុង-ស្រុក និងកងកម្លាំងប្រដាប់អាវុធគ្រប់ ប្រភេទ ចូលរួមក្នុងការជួយឧបត្ថម្ភ គាំទ្រដល់អតីតយុទ្ធជន ជាពិសេសត្រូវយកចិត្តទុកដាក់ជួយឧបត្ថម្ភគាំ ទ្រដល់គ្រួសារអតីតយុទ្ធជនដែលកំពុងជួបប្រទះការលំបាក និងខិតខំកៀរគរសប្បុរសជនជំរុញការអនុវត្ត គម្រោងសាងសង់ផ្ទះជូនអតីតយុទ្ធជនដែលនៅសេសសល់៕
