(ខេត្តពោធិ៍សាត់)៖ នៅរសៀលថ្ងៃសុក្រ ទី២២ ខែសីហា ឆ្នាំ២០២៥ ឯកឧត្តម ខូយ រីដា អភិបាល នៃគណៈអភិបាលខេត្តពោធិ៍សាត់ បានអញ្ជើញជាអធិបតីក្នុង ពិធីប្រគល់-ទទួលឧបករណ៍សង្គ្រោះទារក ដល់មន្ទីរពេទ្យ និងមណ្ឌលសុខភាព ក្នុងខេត្ដពោធិ៍សាត់។
ឧបករណ៍សង្គ្រោះទារក រួមទាំងការឧបត្ថម្ភការបណ្តុះបណ្តាលដល់មន្ត្រីមូលដ្ឋានសុខាភិបាល ដែលជាអំណោយ និងជាទឹកចិត្តដ៏ថ្លៃថ្លា របស់ឯកឧត្តម ជិត ប៉ុណ្ណារ៉ា និងលោកជំទាវ យូ ស្រីលាភ មានតម្លៃជាង១១ម៉ឺនដុល្លារ ត្រូវបានប្រគល់ជូនរដ្ឋបាលខេត្តពោធិ៍សាត់ បានបន្តបែងចែកដល់មន្ទីរពេទ្យបង្អែក និងមណ្ឌលសុខភាពក្នុងខេត្ត ដែលកំពុងត្រូវការជាចាំបាច់ ក្នុងការផ្តល់សេវាសង្គ្រោះ ដល់ម្តាយ ទារក និងកុមារ ដើម្បីឱ្យការផ្តល់សេវា កាន់តែមានភាពប្រសើរឡើងបន្ថែមទៀត។
ឯកឧត្តម ខូយ រីដា អភិបាលខេត្តពោធិ៍សាត់ បានថ្លែងអំណរគុណយ៉ាងជ្រាលជ្រៅ ជូនចំពោះ ឯកឧត្តម ជិត ប៉ុណ្ណារ៉ា និងលោកជំទាវ យូ ស្រីលាភ ដែលបានឧបត្ថម្ភការបណ្តុះបណ្តាលដល់មន្ត្រីមូលដ្ឋានសុខាភិបាល និងបានផ្តល់នូវឧបករណ៍សង្គ្រោះទារក (NeoLife Ventilator) ចំនួន១៧ឈុត សរុបជាទឹកប្រាក់ ១១៩,០០០ដុល្លារ តាមរយៈការកៀរគរ របស់លោកបណ្ឌិត ប្រាំង ជលសា ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកអគ្គិសនីកម្ពុជា បានផ្តល់ជូនដល់មន្ទីរពេទ្យបង្អែក និងមណ្ឌលសុខភាព ក្នុងខេត្តពោធិ៍សាត់ សម្រាប់ប្រើប្រាស់ជាប្រយោជន៍ ក្នុងការផ្តល់សេវាជូនអ្នកជំងឺ។
ពិធីប្រគល់-ទទួលឧបករណ៍សង្គ្រោះទារកខាងលើនេះ ត្រូវបានធ្វើឡើង នៅសាលប្រជុំមន្ទីរសុខាភិបាល នៃរដ្ឋបាលខេត្តពោធិ៍សាត់ ដោយមានការចូលរួម ឯកឧត្តមបណ្ឌិត ប្រាំង ជលសា ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកអគ្គិសនីកម្ពុជា ព្រមទាំងក្រុមការងារ ថ្នាក់ដឹកនាំមន្ទីរពាក់ព័ន្ធ និងមន្ត្រីសុខាភិបាលមួយចំនួនទៀត៕
