កែប៖ លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា និងជាអនុប្រធានប្រចាំការគណៈកម្មាធិការពិសេសដើម្បីជំរុញការអនុវត្តគម្រោងព្រែកជីកហ្វូណនតេជោ នាព្រឹកថ្ងៃទី២៥ ខែកក្កដា ឆ្នាំ២០២៥នេះ បានដឹកនាំក្រុមការងារ ដោយមានការចូលរួមពីលោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានលេខាធិការដ្ឋានគណៈកម្មាធិការពិសេស និងមានថ្នាក់ដឹកនាំក្រសួង-ស្ថាប័នពាក់ព័ន្ធ ចុះពិនិត្យផ្ទៀងផ្ទាត់ និងបោះបង្គោលបញ្ចប់ការងារកំណត់និយាមកានៃគម្រោងព្រែកជីកហ្វូណនតេជោ ក្នុងភូមិសាស្ត្រខេត្តកែប។
នាឱកាសនោះលោកឧបនាយករដ្ឋមន្ត្រី ស៊ុន ចាន់ថុល បានឱ្យដឹងថា បង្គោលនិយាមទាំងអស់ដែលបានបោះមាន ១ ៩២០បង្គោល ហើយមកដល់ពេលនេះការបោះបង្គោលនិយាមការនេះបានរួចរាល់ទាំងស្រុងហើយ ដែលបានបែកចែងជា ៤ខេត្ត មានខេត្តកណ្តាល ៣៨៧បង្គោល តាកែវ ៥៥២បង្គោល ខេត្តកំពត ៨០១បង្គោល និងខេត្តកែប ១៨០បង្គោល បានបោះរួចរាល់ទាំងស្រុងហើយ។
បើតាមលោកឧបនាយករដ្ឋមន្ត្រី ស៊ុន ចាន់ថុល បន្ទាប់ពីបានបោះបង្គោលបញ្ចប់ការងារកំណត់និយាមកានេះរួចរាល់ ក្រសួងសេដ្ឋកិច្ច និងហិរញ្ញវត្ថុ និងបន្តវាស់វែង ដើម្បីដោះស្រាយពីផលប៉ះពាល់ជូនប្រជាពលពលរដ្ឋ ហើយនឹងរៀបចំដាក់គ្រឿងចក្រចូលកសាងជីកហ្វូណនតេជោនេះតែម្តង ខណៈការសាងសង់និងចាប់ផ្តើមនៅចុងឆ្នាំនេះផងដែរ៕
