សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជាមានប្រសាសន៍ថា ស្ថាបនិកអង្គការមូលនិធិកុមារកម្ពុជាលោក Scott Neeson គឺជាមនុស្សធ្វើការដោយបេះដូងដើម្បីប្រជាជនកម្ពុជា ជាពិសេសដើម្បីកុមារកម្ពុជា ដោយបានចូលរួមជាមួយរាជរដ្ឋាភិបាលក្នុងប្រតិបត្តិការថែទាំ គាំពារ ការពារ និងស្តារនីតិសម្បទាជូនដល់ជនរងគ្រោះដោយសារអំពើរំលោភបំពាន សំដៅផ្តល់ក្តី សង្ឃឹមក្នុងជីវិតរបស់ពួកគេឡើងវិញ ជាពិសេសសម្រាប់កុមារដែលងាយរងគ្រោះបំផុត។ ការថ្លែងបញ្ជាក់របស់សម្តេចធិបតី នាយករដ្ឋមន្ត្រីយ៉ាងដូច្នេះ ធ្វើឡើងក្នុងពិធីសម្ពោធដាក់ឱ្យប្រើប្រាស់ជាផ្លូវការមជ្ឈមណ្ឌលផ្កាឈូក អង្គភាពការពារកុមារ នៃអង្គការមូលនិធិកុមារកម្ពុជា ស្ថិតនៅសង្កាត់ព្រែកហូរ ក្រុងតាខ្មៅ ខេត្តកណ្តាល នាព្រឹកថ្ងៃទី២៣ ខែកក្កដា ឆ្នាំ២០២៥នេះ។
សម្តេចនាយករដ្ឋមន្ត្រីបានបន្តថា លោក Scott Neeson គឺជាអតីតបុគ្គលិកជាន់ខ្ពស់នៃក្រុមហ៊ុនផលិត ភាពយន្តហូលីវូតរបស់សហរដ្ឋអាមេរិក ដែលលោកទទួលបាននូវប្រាក់កម្រៃប្រចាំខែយ៉ាងសន្ធឹកសន្ធាប់ តែបែរជាលោកបានលះបង់ការងារ និងប្រាក់កម្រៃដ៏ច្រើននៅទីនោះមកធ្វើការងារមនុស្សធម៌ដើម្បីប្រជា ជន និងដើម្បីកុមារកម្ពុជាទៅវិញ ដែលជាការធ្វើការងារដោយបេះដូងរបស់លោក Scott Neeson នេះគឺជាឧទាហរណ៍មួយធំណាស់ ដោយការងាររបស់លោកគឺនៅតំបន់ស្ទឹងមានជ័យ ដែលមានការលំបាក និងមានប្រជាជនក្រីក្រច្រើនលោក Scott បានផ្តល់នូវភាពកក់ក្តៅជាខ្លាំងដល់ពួកគេ លោកបានបង្ហាញ នូវលទ្ធផលការងារជាក់ស្តែងជាបន្តបន្ទាប់ នេះហើយគឺជាដៃគូដ៏ល្អរបស់រាជរដ្ឋាភិបាល ដែលសម្តេចតេ ជោអតីតនាយករដ្ឋមន្ត្រីនៃកម្ពុជា សម្តេចបានយកចិត្តទុកដាក់ខ្លាំងណាស់ចំពោះដៃគូនៃអង្គការក្រៅរដ្ឋា ភិបាលដែលជាអ្នកធ្វើការដោយពិតប្រាកដ ដើម្បីរួមគ្នាក្នុងការជួយទៅដល់ប្រជាពលរដ្ឋកម្ពុជា នេះគឺជា ការគិតគូរបស់រាជរដ្ឋាភិបាល ខណៈដែលយើងមានដៃគូជាអង្គការក្រៅរដ្ឋាភិបាលរាប់រយ រាប់ពាន់នៅ ក្នុងប្រទេស។
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី មានប្រសាសន៍ថា ដោយសារការជួយទំនុកបម្រុង និងការបណ្តុះបណ្តាលពីអង្គការមូលនិធិកុមារកម្ពុជារបស់លោក Scott Neeson មានយុវជនកម្ពុជា ដែលជាអតីតក្មេងក្រីក្រនៅតំបន់ស្ទឹងមានជ័យខ្លះទទួលបានអាហរូបករណ៍ទៅបន្តការសិក្សានៅក្រៅ ប្រទេសមាននៅប្រទេសអូស្ត្រាលីជាដើម ហើយចំពោះអ្នកបញ្ចប់ការសិក្សាខ្លះក៏មានការងារធ្វើថែម ទៀតផង។
សម្តេចបានគូសបញ្ជាក់ថា បើនិយាយពីកម្ពុជា គឺមានការអភិវឌ្ឍច្រើន ការកែលម្អជីវភាពរស់នៅរបស់ប្រជាពលរដ្ឋក៏មានច្រើន តែយើងក៏ត្រូវទទួលស្គាល់មិនមែនគ្រប់គ្នាសុទ្ធតែជោគជ័យនោះទេ គ្រប់ប្រទេសទាំងអស់សុទ្ធតែមានអ្នកជោគជ័យ និងអ្នកមិនជោគជ័យ ជីវភាពអ្នកខ្លះត្រូវការអ្នកជួយ ជាពិសេសគឺកុមារ និងចាស់ជរានៅតាមសហគមន៍ក្រីក្រនានា ដែលសម្តេចសូមអរគុណចំពោះរដ្ឋបាលមូលដ្ឋានដែលមានកិច្ចសហការល្អជាមួយអង្គការជាតិ និងអន្តរជាតិ ដែលជាដៃគូរបស់យើងដែលបាន និងកំពុងជួយទៅដល់កុមារ និងស្ត្រី រួមទាំងជនងាយរងគ្រោះផ្សេងៗ តួយ៉ាងអង្គការសម្រាប់ជនពិការគឺមានអ្នកដែលកំពុងត្រូវការការជួយច្រើនណាស់ ដែលរាជរដ្ឋាភិបាលបានលើកទឹកចិត្តចំពោះការធ្វើសកម្មភាពរបស់អង្គការជាដៃគូជានិច្ច ដើម្បីជួយទៅដល់ប្រជនកម្ពុជា ជាពិសេសនៅតាមសហគមន៍ ដែលកំពុងត្រូវការជំនួយ៕ ដោយ៖ ចាន់ សុភឿន
