ខេត្តបន្ទាយមានជ័យ៖ លោកឧត្តមសេនីយ៍ទោ សិទ្ធិ ឡោះ ស្នងការ នៃស្នងការដ្ឋាននគរបាលខេត្តបន្ទាយមានជ័យ បានដាក់ចេញនូវបទបញ្ជា និងផែនការ ដល់កងកម្លាំងគ្រប់ផ្នែកពាក់ព័ន្ធត្រូវពង្រឹងបច្ចេកទេសជំនាញ និងត្រូវបន្តយកចិត្តទុកដាក់ពាក់ព័ន្ធការវិវត្តន៍ថ្មីៗរបស់បច្ចេកវិទ្យា ដើម្បីធ្វើយ៉ាងណាឱ្យការងារប្រចាំថ្ងៃកាន់តែប្រសើរឡើងរហ័ស និងមានប្រសិទ្ធភាព បន្តគ្រប់គ្រងព័ត៌មានសន្តិសុខសង្គម និងសន្តិសុខតាមព្រំដែន ប្រឆាំងរាល់បទល្មើសបច្ចេកវិទ្យា ទប់ស្កាត់រាល់ព័ត៌មានក្លែងក្លាយ សំដៅធ្វើយ៉ាងណាឱ្យខេត្តបន្ទាយមានជ័យ ទាំងមូល ប្រកបដោយសន្តិសុខ សណ្តាប់ធ្នាប់ និងសុវត្ថិភាពល្អ។
ការដាក់បទបញ្ជារបស់លោកឧត្តមសេនីយ៍ទោ សិទ្ធិ ឡោះ នៅព្រឹកថ្ងៃពុធ ទី២៣ ខែកក្កដា ឆ្នាំ២០២៥ ក្នុងកិច្ចប្រជុំពង្រឹងបច្ចេកទេសជំនាញ និងផ្សព្វផ្សាយផែនការការងារចាំបាច់ ដល់កងកម្លាំងនគរបាលក្រោមឱវាទ។
កិច្ចប្រជុំនេះដែរ ក៏មានការអញ្ជើញចូលរួមពី លោក លោកស្រី ឧត្តមសេនីយ៍ វរសេនីយ៍ ស្នងការរង លោកនាយ ការិយាល័យជំនាញ លោកអធិការនគរបាលក្រុង ស្រុកទាំង៩ លោកមេបញ្ជាការវរសេនាតូចនគរបាល ការពារព្រំដែនគោកទាំង៤ ក្រុមការងារអ្នកនាំពាក្យ និងប្រតិកម្មរហ័ស និងក្រុមការងារបច្ចេកវិទ្យាឌីជីថល (Digital Technology Team) ផងដែរ៕
