អភិបាលខេត្តរតនគិរី លើកពីគម្រោងធំៗ ដែលកំពុងដំណើរការសិក្សា និងសាងសង់នៅក្នុងខេត្ត, មានគម្រោងព្រលានយន្តហោះលើផ្ទៃដីជិត ២ពាន់ហិកតា និងការបើកច្រកព្រំដែនជាមួយឡាវ និងវៀតណាមបន្ថែម

(រតនគិរី)៖ លោក ញ៉ែម សំអឿន អភិបាលនៃគណៈអភិបាលខេត្តរតនគិរី បាននៅព្រឹកថ្ងៃទី៧ ខែមិថុនា ឆ្នាំ២០២៥នេះ បានលើកឡើងអំពីគម្រោងធំៗ និងសំខាន់ៗជាច្រើន ដែលខេត្តរតនគិរីកំពុងដំណើរការសិក្សា និងសាងសង់ ដើម្បីជំរុញដល់ការរីកម្រើនក្នុងខេត្ត ងាយស្រួលបម្រើសេវាជូនប្រជាពលរដ្ឋ និងរួមចំណែកដល់កំណើនសេដ្ឋកិច្ចកម្ពុជា។

លោក ញ៉ែម សំអឿន បានបញ្ជាក់ថា គម្រោងដែលកំពុងដំណើរការសិក្សា និងសាងសង់រួមមានផ្លូវក្រវ៉ាត់ព្រំដែន, អាកាសយានដ្ឋានលំផាត់ ស្ថិតក្នុងភូមិសាស្ត្រស្រុកលំផាត់លើផ្ទៃដី ១ ៩០៥ហិកតា, គម្រោងវិនិយោគវារីអគ្គីសនី ស្រែពកក្រោម៣ និងស្ថានីយ៍ថាមពលដើរ ដោយពន្លឺព្រះអាទិត្យ ដែលមានសមត្ថភាពផលិតថាមពល សរុប ៨០០មេហ្កាវ៉ាត់, ការកសាងហេដ្ឋារចនាសម្ព័ន្ធ ច្រកទ្វារព្រំដែនអន្តរជាតិអូរយ៉ាដាវ និងការបង្កើតច្រកទ្វារព្រំដែន ជាមួយខេត្តអត្តពឺ ប្រទេសឡាវ និងច្រកទ្វារព្រំដែនជាមួយខេត្តកន្ទូម ប្រទេសវៀតណាម។

គម្រោងផ្សេងៗទៀតរួមមាន៖ គម្រោងសាងសង់អគារសាលាខេត្តថ្មី ដែលស្ថិតនៅបរិវេណអតីតព្រលានយន្តហោះខេត្ត, គម្រោងពង្រឹងផ្លូវជាតិលេខ៧៨ និងបច្ចុប្បន្នរដ្ឋបាលខេត្តកំពុងអនុវត្តយ៉ាងសកម្មនូវកម្មវិធីពិសេសជំរុញការវិនិយោគខេត្តភូមិភាគឦសាន ដោយបានពិនិត្យផ្ទៀងផ្ទាត់ និងធ្វើបច្ចុប្បន្នភាព ទិន្នន័យ សក្តានុពល ផ្ទៃដីកសិកម្ម កសិ-ឧស្សាហកម្មនិងទេសចរណ៍ ដើម្បីបង្កលក្ខណៈងាយស្រួល ដល់អ្នកវិនិយោគ និងដើម្បីឆ្លើយតប ចំពោះកម្មវិធីពិសេស ជំរុញការវិនិយោគខេត្តទាំងបួន ភូមិភាគឦសាន (២០២៥-២០២៨) របស់រាជរដ្ឋាភិបាលឱ្យសម្រេចបានប្រសិទ្ធផល និងមានប្រសិទ្ធភាពខ្ពស់។

ការលើកឡើងរបស់លោក ញ៉ែម សំអឿន ធ្វើឡើងក្នុងឱកាសចូលរួមក្នុងពិធីសម្ពោធអគារសិក្សា អគារទីចាត់ការ អគារសយនដ្ឋាន អគារពិសោធន៍ និងសមិទ្ធផលនានាក្នុងវិស័យអប់រំខេត្តរតនគិរី ក្រោមអធិបតីភាពសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។

លោកអភិបាលខេត្តបានលើកឡើងផងដែរ សមិទ្ធផលមួយចំនួនដែលខេត្តសម្រេចបានរួមមាន​ ការសាងសង់វិមានឯករាជ្យ សម្រេចបាន៨០%, ការសាងសង់ផ្លូវបេតុង និងផ្លូវកៅស៊ូ នៅជុំវិញបឹងកន្សែង, ការសាងសង់អគារមន្ទីរសុខាភិបាលខេត្ត នៅក្នុងបរិវេណអតីតព្រលានយន្តហោះខេត្ត ដែលជាអំណោយរបស់សម្តេចមហាបវរធិបតី នាយករដ្ឋមន្ត្រី ក្នុងទឹកប្រាក់ជាង ៣លានដុល្លារ, ការកសាងរូបសំណាកគ្រួសារដំរី រូបសំណាកសត្វអក, ការសាងសង់អាស្រមលោកតា ប៊ូ ជួង លោកតា ខាំឡែន, បន្តសាងសង់បណ្ណាល័យសាធារណៈ នៅបរិវេណណបឹងកន្សែង ដែលជាអំណោយឧបត្ថម្ភរបស់សម្តេចមហាបវរធិបតីនាយករដ្ឋមន្ត្រី និងសម្តេចអគ្គមហាសេនាបតីតេជោ ប្រធានព្រឹទ្ធសភា និងការតម្លើងទូរទស្សន៍ LED នៅបរិវេណនៅបឹងកន្សែង ដើម្បីចាក់ផ្សាយព្រឹត្តិការណ៍ផ្សេងៗរបស់ថ្នាក់ដឹកនាំ។

លោកអភិបាលខេត្តបានឱ្យដឹងទៀតថា ខេត្តរតនគិរីមានក្រុមហ៊ុនសម្បទានដីសេដ្ឋកិច្ចសរុបចំនួន ២៧ក្រុមហ៊ុន ក្នុងនោះវិនិយោគដោយក្រុមហ៊ុនវៀតណាមចំនួន១៣ ក្រុមហ៊ុនចិន៣ ក្រុមហ៊ុនឥណ្ឌា ១ និងក្រុមហ៊ុនក្នុងស្រុកចំនួន១០។

សម្រាប់វិស័យកសិកម្ម ខេត្តនេះមានដំណាំកៅស៊ូ ៧០ ៩៩៦ហិកតា, ដំណាំស្វាយចន្ទី៩៨ ៤៣៦ហិកតា, ដំណាំដំឡូងមី ១៨ ៣០៨ហិកតា, ដំណាំទុរេនជាង ១ ២០០ហិកតា, ដំណាំចេកអំបូងលឿងជាង ៤ ០០០ហិកតា និងមានកសិដ្ឋានចិញ្ចឹមគោចំនួន ២៨ ៦៤២ក្បាល។

សម្រាប់វិស័យទេសចរណ៍ ក្នុងខេត្តមានរមណីដ្ឋាន និងតំបន់ទេសចរណ៍ជាច្រើន សម្រាប់បម្រើសេវាកម្ម ការកម្សាន្ត និងសម្រាកលំហែរបស់ភ្ញៀវទេសចរជាតិ និងអន្តរជាតិ មានដូចជារមណីដ្ឋានបឹងកន្សែង, បឹងយក្សឡោម, បឹងលម្កុដ, បឹងយក្សម៉ាយ, ទឹកធ្លាក់កាចាញ, ទឹកធ្លាក់កាទៀង, ទឹកធ្លាក់ចាអ៊ុង, ទឹកធ្លាក់អូរស៊ិនលែ និងរមណីដ្ឋានផ្សេងៗជាច្រើនទៀត។ ដើម្បីបង្កើនការចាប់អារម្មណ៍ពីភ្ញៀវទេសចរ រដ្ឋបាលខេត្តបានតុបតែងភ្លើងលម្អ និងបានបំពាក់បន្ថែមបង្គោលភ្លើងបំភ្លឺ នៅតាមដងផ្លូវក្នុងក្រុងបានលុង កាន់តែលើកកម្ពស់សោភ័ណភាព និងសុវត្ថិភាពនាពេលរាត្រីផងដែរ៕