នៅថ្ងៃទី០១ ខែមិថុនា ឆ្នាំ២០២៥ គេបានឃើញ លោកឧត្តមសេនីយ៍ឯក រ័ត្ន ស៊្រាង បានសរសេរក្នុងហ្វេសប៊ុកផ្ទាល់ខ្លួនរបស់លោក ដោយរៀបរាប់អំពី វីរភាពដ៏ខ្ពង់ខ្ពស់ របស់សម្តេចអគ្គមហាសេនាបតី តេជោ ហ៊ុន សែន ក្នុងការរំដោះប្រជាជន ការពារជាតិ ដឹកនាំនិងអភិវឌ្ឍន៍ជាតិ ដោយភ្ជាប់ជាមួយបទបចម្រៀងដែលលោកឧត្តមសេនីយ៍ បានផ្តួចផ្តើមនិពន្ធនិងផលិតឡើង ជិត២០ឆ្នាំមកហើយ ថាជាភស្តុតាងមួយផ្នែក បញ្ជាក់ថាក្រោមស្នាដៃសមិទ្ធផល របស់សម្តេចតេជោ ហ៊ុន សែន កម្ពុជាពិតជាមានសន្តិភាព ការអភិវឌ្ឍ និងកិច្ចសហប្រតិបត្តិការអន្តរជាតិ រហូតមកពិតប្រាកដមែន។
សូមអានសំណេរទាំងស្រុង ដែលដកស្រង់ចេញពីហ្វេសប៊ុកផេកផ្លូវការ របស់លោកឧត្តមសេនីយ៍ឯក រ័ត្ន ស៊្រាង ព្រមជាមួយការទស្សនាវីដេអូបទចម្រៀងដែលផលិតឡើងជិត២០ឆ្នាំដូចខាងក្រោម៖
“សម្តេចអគ្គមហាសេនាបតី តេជោ ហ៊ុន សែន គឺជាអច្ឆរិយបុគ្គលដ៏ខ្ពង់ខ្ពស់អស្ចារ្យ សម្រាប់កម្ពុជា ចារទុកជាប្រវត្តិសាស្ត្រ។ សម្តេច ជាមេទ័ពដ៏អង់អាចក្លាហានប្រកបដោយអំណាចតេជៈនិងរិទ្ធីបារមីដ៏ខ្ពង់ខ្ពស់ ដែលហ៊ានយកជីវិតធ្វើដើមទុនស្វែងរកការរំដោះជាតិ រំដោះប្រជាជនកម្ពុជាឲ្យរួចផុតពីរបបខ្មៅងងឹតប្រល័យពូជសាសន៍ ប៉ុល ពត។ សម្តេច ជាមេដឹកនាំប្រទេសដ៏ប៉ិនប្រសព្វប្រកបដោយបញ្ញាញាណឈ្លាសវាងវៃនិងមានទស្សនៈវិស័យវែងឆ្ងាយ ដែលបានកសាងប្រទេសពីចំណុចសូន្យ រហូតរីកចម្រើនស្មើមុខស្មើមាត់ជាមួយបណ្តាប្រទេសក្នុងតំបន់និងពិភពលោក។ សម្តេច ជាមគ្គុទ្ទេសក៍ឯក ដែលបាននាំមកនូវ សន្តិភាពនិងការឯកភាពជាតិពេញលេញ ជូនកម្ពុជា ដែលពុំធ្លាប់មានក្នុងប្រវត្តិសាស្ត្រជាង៥០០ឆ្នាំក្រោយសម័យអង្គរ។ សម្តេច ជាបិតាសន្តិភាព ដែលមានការទទួលស្គាល់ជាអន្តរជាតិ (ទទួលបាន មេដាយសន្តិភាពពិភពលោក និង ពានរង្វាន់ មេដាយសន្តិភាព ដើម្បីមនុស្សជាតិនិងភពផែនដី)។
និយាយដល់អច្ឆរិយភាពដ៏ខ្ពង់ខ្ពស់ របស់សម្តេច តេជោ ហ៊ុន សែន ខ្ញុំក៏នឹកដល់បទចម្រៀងមួយបទ ដែលខ្ញុំបានផ្តួចផ្តើមនិពន្ធនិងផលិតឡើង កាលខ្ញុំនៅជាមេបញ្ជាការកងរាជអាវុធហត្ថខេត្តបន្ទាយមានជ័យ ដើម្បីរៀបរាប់អំពី វីរភាពរបស់សម្តេចអគ្គមហាសេនាបតី តេជោ ហ៊ុន សែន និង សម្តេចកិត្តិព្រឹត្តបណ្ឌិត ប៊ុន រ៉ានី ហ៊ុន សែន ក្នុងកាលៈទេសៈដែលកម្ពុជា មានការប៉ះទង្គិចគ្នា ជាមួយអ្នកជិតខាង នៅតំបន់ប្រសាទព្រះវិហារ ហើយលោកទាំងទ្វេ បានចុះដល់ព្រំដែនផ្ទាល់ផងដែរ។ បើទោះបីជា ក្នុងបទចម្រៀង ខ្ញុំពុំអាចរៀបរាប់អស់ អំពីវីរភាពនិងគុណូបក្ការៈរបស់ សម្តេចទាំងទ្វេបាន ប៉ុន្តែបទចម្រៀងដែលផលិតមកជិត២០ឆ្នាំហើយនេះ ក៏ជាភស្តុតាងមួយផ្នែក បញ្ជាក់ថាក្រោមស្នាដៃសមិទ្ធផល របស់សម្តេចតេជោ ហ៊ុន សែន កម្ពុជាពិតជាមានសន្តិភាព ការអភិវឌ្ឍ និងកិច្ចសហប្រតិបត្តិការអន្តរជាតិ រហូតមកពិតប្រាកដមែន។
អរគុណ សន្តិភាព!”៕
