(ខេត្តកំពត)៖ នៅព្រឹកថ្ងៃទី២៣ ខែមករា ឆ្នាំ២០១៩នេះ លោក ជាវ តាយ អភិបាល នៃគណ:អភិបាលខេត្តកំពត បានដឹកនាំកិច្ចប្រជុំគណៈកម្មាធិការគ្រប់គ្រងដីរដ្ឋថ្នាក់ខេត្ត នៅសាលប្រជុំក្រុមប្រឹក្សាខេត្ត។
សមាសភាពអញ្ជើញចូលរួមមាន៖ គណអភិបាលខេត្ត នាយក នាយករងរដ្ឋបាល ប្រធានមន្ទីរ-អង្គភាពពាក់ព័ន្ធ អភិបាលក្រុង ស្រុកទឹកឈូ ស្រុកជុំគិរីនឹងស្រុកកំពង់ត្រាច ទីចាត់ការអន្តរវិស័យ ការិយាល័យភូមិបាលស្រុកឈូក ស្រុកទឹកឈូ ជុំគិរី និងស្រុកកំពង់ត្រាច មេឃុំកោះតូច តេជោអភិវឌ្ឍន៍ ត្រពាំងរាំង តាកែន និងមេឃុំកំពង់ត្រាចខាងកើត សរុប៤៥រូប។
កិច្ចប្រជុំនាព្រឹកនេះ លោក ជាវ តាយ អភិបាលខេត្តកំពត ក៏បានផ្តោតទៅលើការរំលោភបំពានដីភ្នំ ព្រែក បឹងបួ និងដីព្រៃរបស់រដ្ឋនៅតាមតំបន់មួយចំនួននៃខេត្តកំពត ពិសេសការវិវាទដីធ្លីនៅស្រុកជុំគិរី ដែលត្រូវការរកដំណោះស្រាយជាបន្ទាន់ផងដែរ។ទន្ទឹមនេះ រដ្ឋបាលខេត្តនឹងមិនអត់ឱនដល់បុគ្គលខិលខូចដែលតែងតែលួចទន្ទ្រានដីរបស់រដ្ឋយកធ្វើជាសម្បតិ្តឯកជននោះបានឡើយ។
សូមជម្រាបថា កន្លងមក លោក ជាវ តាយ អភិបាលខេត្តកំពត ធ្លាប់លើកឡើងក្នុងកិច្ចប្រជុំនានា ដោយលោកបានសង្កត់ធ្ងន់ទៅលើករណីរំលោភបំពានដីរបស់រដ្ឋ ដោយលោកអភិបាលខេត្តតែងតែក្រើនរម្លឹកថា ជនណាក៏ដោយឲ្យតែហ៊ានបំពានដីរបស់រដ្ឋ លោកនឹងចងក្រងឯកសារបញ្ជូនទៅតុលាការចាត់ការតាមផ្លូវច្បាប់មិនខាន បើទោះជាជននោះជានរណាក៏ដោយ។ជាមួយគ្នានេះ មហាជនទូទាំងខេត្តកំពតរង់ចាំមើលថា តើចំណាត់ការបែបនេះអាចមានប្រសិទ្ធភាពដែរឬទេ?៕
សេង ណារិទ្ធ
