ស្រុកសំពៅលូន,ខេត្តបាត់ដំបង ៖ នៅថ្ងៃទី១៩ ខែមេសា ឆ្នាំ២០២៥ វេលាម៉ោង ២២ និង ៣០ នាទី ជនសង្ស័យមួយរូប ពាក់ពន្ធ័ករណីហិង្សាដោយចេតនា មានស្ថានទម្ងន់ទោស(យកកាំបិតកាប់) ត្រូវបានកម្លាំងអធិការដ្ឋាននគរបាលស្រុកសំពៅលូន បានសហការជាមួយកម្លាំងជួរមុខ ចុះធ្វើការស្រាវជ្រាវ និងឃាត់ខ្លួន នៅចំណុចក្នុងព្រៃដីថៃ ជាប់មាត់អូរព្រំដែនកម្ពុជា-ថៃ ជាប់ភូមិសាស្ត្រក្រុមទី០៧ ភូមិគីឡូ១៣ ឃុំសន្តិភាព ស្រុកសំពៅលូន ខេត្តបាត់ដំបង នាំមកកាន់អធិការដ្ឋាននគរបាលស្រុកសំពៅលូន ។
ហេតុការណ៍អំពើហិង្សា បានឡើងនៅថ្ងៃទី ១៨ ខែមេសា ឆ្នាំ២០២៥ វេលាម៉ោងប្រហែល០៥និង៣០នាទី នៅចំណុចបុរីសុភមង្គលជាយដែនថ្មី (បូរីចាស់) ស្ថិតក្នុងក្រុមទី០៧ ភូមិគីឡូ១៣ ឃុំសន្តិភាព ស្រុកសំពៅលូន ខេត្តបាត់ដំបង ។
ជនសង្ស័យឈ្មោះ ស៊ាក ស៊ីនួន ហៅ ខ្មៅ ភេទប្រុស អាយុ ២២ ឆ្នាំ មានទីលំនៅភូមិវាលវង់ ឃុំតាស្តា ស្រុកសំពៅលូន ខេត្តបាត់ដំបង បានធ្វើសកម្មភាពឡើងតាមជញ្ជាំងផ្ទះពីខាងក្រោយ និងចូលទៅក្នុងផ្ទះ ធ្វើសកម្មភាព យកកាំបិតកាប់ទៅលើជនរងគ្រោះឈ្មោះ ជ្រេង សយ ភេទប្រុស អាយុ ៩០ ឆ្នាំ ដែលកំពុងមានជម្ងឺដេកលើប៉ៅអ៊ីក្រោកមិនរួច នៅក្នុងផ្ទះរបស់ជនរងគ្រោះចំណុចកើតហេតុ កាប់ចំនួន០៣កាំបិត បណ្តាលឲ្យរងរបួស មុខ ត្រង់ចង្ការខាងឆ្វេង (ធ្ងន់) ។
ក្រោយពេលធ្វើសកម្មភាពរួច ជនសង្ស័យបានរត់គេខ្លួន ឆ្លងអូរព្រំដែនចូលទៅក្នុងទឹកដីប្រទេសថៃបាត់ មូលហេតុជនសង្ស័យប្រើប្រាស់គ្រឿងញៀន ។
ក្រោយពេលទទួលបណ្តឹងពីសាច់ញាតិក្រុមគ្រួសារជនរងគ្រោះ កម្លាំងអធិការដ្ឋាននគរបាលស្រុកសំពៅលូន បានសហការជាមួយកម្លាំងជួរមុខ មានកម្លាំងវរសេនាតូចនគរបាលការពារព្រំដែនគោកលេខ៨១៧ , កម្លាំងវរៈសេនាតូច៥៥១ និងកម្លាំងវរសេនាតូច៥៣៣ ចុះធ្វើការស្រាវជ្រាវ និងឃាត់ខ្លួនជនសង្ស័យខាងលើឈ្មោះ ស៊ាក ស៊ីនួន ហៅ ខ្មៅ ភេទប្រុស អាយុ ២២ ឆ្នាំ បាននៅចំណុចក្នុងព្រៃដីថៃ ជាប់មាត់អូរព្រំដែនកម្ពុជា-ថៃ ជាប់ភូមិសាស្ត្រក្រុមទី០៧ ភូមិគីឡូ១៣ ឃុំសន្តិភាព ស្រុកសំពៅលូន ខេត្តបាត់ដំបង នៅថ្ងៃទី១៩ ខែមេសា ឆ្នាំ២០២៥ វេលាម៉ោង ២២ និង ៣០ នាទី នាំមកកាន់អធិការដ្ឋាននគរបាលស្រុកសំពៅលូន ដើម្បីចាត់ការបន្តតាមនីតិវិធីច្បាប់ ៕
