នៅសល់តែរយៈពេលប្រមាណ៣-៤ថ្ងៃទៀតប៉ុណ្ណោះ «សង្រ្កានឧត្ដរ»២០២៥ នឹងឈានចូលមកដល់ ដើម្បីជាសេចក្តីចម្រើន ជោគជ័យ សេរីមង្គល ក្នុងការទទួលទេវតាឆ្នាំថ្មី នៅល្ងាចថ្ងៃទី០៨ខែមេសាឆ្នាំ២០២៥នេះ ឯកឧត្ដម មាន ចាន់យ៉ាដា អភិបាលខេត្តឧត្ដរមានជ័យ និងឯកឧត្ដម ស៉ី ប្រសិទ្ធ ប្រធានក្រុមប្រឹក្សាខេត្ត បានដឹកនាំមន្ត្រីក្រោមឱវាទ រៀបចំពិធីបួងសួងសុំសេចក្ដីសុខសេចក្ដីចម្រើន នៅអាស្រមព្រះគណេសស្ថិតនៅបរិវេណសួនច្បារខេត្តឧត្ដរមានជ័យ។
ឯកឧត្ដម មាន ចាន់យ៉ាដា និង ឯកឧត្ដម ស៉ី ប្រាសិទ្ធ ព្រមទាំងមន្ត្រីបានបួងសួងដល់វត្ថុស័ក្តិសិទ្ធ សូមប្រសិទ្ធពរជ័យសិរីមង្គល ជូនដល់ថ្នាក់ដឹកនាំ មន្រ្តីរាជការទាំងអស់បានទទួលនូវសុខភាពល្អ សេចក្ដីសុខ សេចក្តីចម្រើន ជោគជ័យរាល់ការបំពេញភារកិច្ចក្នុងឆ្នាំថ្មីនេះ។
ព្រឹត្តិការណ៍ «សង្រ្កាន្តឧត្ដរ» ២០២៥នេះ បានបង្ហាញឲ្យឃើញពីការថែរក្សាបានប្រពៃណី ទំនៀមទំលាប់ដ៏ល្អផូរផង់របស់ខ្មែរយើង ក៏ដូចជាដើម្បីស្វាគមន៍ អបអរសាទរទេវតាឆ្នាំថ្មី ព្រះនាម «គោរាគទេវី» ដែលនឹងយាងមកគ្រង អភិបាលរក្សាលោក ក្នុងឱកាសបុណ្យឆ្នាំថ្មីប្រពៃណីជាតិខ្មែរ ឆ្នាំម្សាញ់ សប្តស័ក ព.ស.២៥៦៨ គ.ស.២០២៥ ដែលនឹងឈានចូលមកដល់នាពេលខាងមុខនេះ។
ក្នុងនាមរដ្ឋបាលខេត្ត ក៏សូមអំពាវនាវ ដល់សាធារណជនទាំងអស់ មកលេងកម្សន្ត “សង្ក្រាន្តឧត្តរ” ឲ្យបានច្រើនកុះករ ព្រោះតែឆ្នាំនេះ “សង្ក្រាន្តឧត្តរ” មានរៀបចំកិច្ចបវេណីសាសនានានា ការលេងល្បែងប្រជាប្រិយខ្មែរ ការប្រគុំតន្ត្រីសម័យ-បុរាណ ដើម្បីរាំកម្សាន្តតាមប្រពៃណីខ្មែរ រួមជាមួយនឹងការតាំងលក់ ផលិតផលប្រើប្រាស់ គ្រឿងឧបភោគ-បរិភោគ និងល្បែងកម្សាន្តកុមារផងដែរ។
គួរបញ្ជាក់ថា ព្រឹត្តិការណ៍ “សង្ក្រាន្តឧត្តរ” មានរយៈពេល ០៣ថ្ងៃ ចាប់ពីថ្ងៃទី ១៤-១៦ ខែមេសា ឆ្នាំ២០២៥ នៅបរិវេណសួនច្បារផ្លូវភ្លោះមាត់បឹងស្ទោ មុខសាលាខេត្ត៕
