ខេត្តកែប ៖ នៅព្រឹកថ្ងៃអាទិត្យ ៦រោច ខែភទ្របទ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៣០ ខែកញ្ញា ឆ្នាំ២០១៨ លោក ងួន ប៊ៀន អ្នកតំណាងរាស្ត្រមណ្ឌលខេត្តកែប តំណាងដ៏ខ្ពស់ខ្ពស់ លោក កែន សត្ថា អភិបាល នៃគណៈអភិបាលខេត្តកែប បានដឹកនាំមន្ត្រីរាជការ កងកម្លាំងប្រដាប់អាវុធ និងពុទ្ធបរិស័ទ ចូលរួមក្នុងពិធីកាន់បិណ្ឌវេនទី៦ នៅវត្តធម្មគិរីបុប្ផាចំការបី ភ្នំវល្លិ ស្ថិតក្នុងភូមិចំការបី ឃុំពងទឹក ស្រុកដំណាក់ចង្អើរ ខេត្តកែប ដោយបាននាំយកនូវទេយ្យវត្ថុមួយចំនួន ព្រមទាំងបច្ច័យចំនួនប្រមាណជាង ៣.០០០.០០០រៀលផងដែរ សម្រាប់វេរប្រគេនដល់ព្រះសង្ឃដែលគង់ចាំព្រះវស្សានៅក្នុងទីអារាមនេះ។
ក្នុងឱកាសនោះ លោក ងួន បៀន ក៏បានលើកឡើងនូវការរីកចម្រើនលើវិស័យពុទ្ធចក្រ ហើយក៏បានចាត់ទុកពិធីកាន់បិណ្ឌក្នុងពេលនេះពិតជាមានសារៈសំខាន់ សម្រាប់បំពេញកុសលផលបុណ្យដើម្បីឧទ្ទិសជូនដល់បុព្វការីជនដែលបានចែកឋានទៅកាន់បរលោក និងក៏ជាទំនៀមទម្លាប់តាំងពីយូរលង់ដែលយើងមិនអាចរំលងបានឡើយ។អ្នកតំណាងរាស្ត្រ បានបញ្ជាក់បន្ថែមទៀតថា បច្ចុប្បន្នដោយសារអាណាចក្ររុងរឿងប្រកបដោយសុខ សន្តិភាព ទើបធ្វើឱ្យវិស័យពុទ្ធចក្រមានការរីចម្រើនបែបនេះដែរ៕
