(ខេត្តកែប)៖ ជនជាប់ពាក់ព័ន្ធគ្រឿងញៀនប្រុស ស្រី ៤នាក់រួមជាមួយថ្នាំញៀនសរុបទម្ងន់២៦,១១ក្រាម ក្រោយពីសមត្ថកិច្ចប្រឆាំងគ្រឿងញៀនបង្ក្រាបបានកាលពីថ្ងៃទី២៩ខែកញ្ញា ឆ្នាំ២០១៨រួចបញ្ជូនជនសង្ស័យនិងវត្ថុតាងមកកាន់ស្នងការដ្ឋាននគរបាលខេត្តកែប បែរជាមានការឆោឡោថាបាត់ជនសង្ស័យជាស្ត្រីម្នាក់ដោយមិនដឹងមូលហេតុទៅវិញ។
ទាក់ទិននឹងការបង្ក្រាបបទល្មើសគ្រឿងញៀនឈានទៅឃាត់ខ្លួនមនុស្ស៤នាក់ ស្រាប់តែបាត់ម្នាក់ដូចខាងលើ លោកវរសេនីយ៍ឯក ងួន សាម៉េត ស្នងការរងទទួលផែនបទល្មើស មិនបានបញ្ជាក់ពីមូលហេតុពិស្តាយ៉ាងណាដល់អ្នកយកព័ត៌មាននៅឡើយទេ តែលោកសុំពន្យាពេលបន្តិចសិន។
ជាមួយនឹងករណីដដែលនេះ បើតាមប្រភពជាក់លាក់បានរាយការណ៍ថា ក្នុងប្រតិបតិ្តការបង្ក្រាបគ្រឿងញៀននេះ មិនដំបូងសមត្ថកិច្ចឃាត់ខ្លួនមនុស្សប្រុស ៣នាក់និងថ្នាំញៀនចំនួន១១កញ្ចប់ ក្នុងនោះ១កញ្ចប់ធំ។លុះសួរនាំជនសង្ស័យទាំង៣ ទើបានទៅឃាត់ខ្លួនស្ត្រីម្នាក់ទៀតដែលជាមេក្លោង ត្រង់ចំណុចហាងខារ៉ាអូខេ៩៩៩៩ ស្ថិតក្នុងភូមិថ្មី សង្កាត់ព្រៃធំ ក្រុង-ខេត្តកែប ដោយដកហូតថ្នាំញៀនបាន១កញ្ចប់ធំ ទម្ងន់ ២ក្រាម រួចបញ្ជូនទៅស្នងការដ្ឋាននគរបាលខេត្តកែបភ្លាមៗ។ប្រភពបានបន្តថា ក្រោយពីសមត្ថកិច្ចជំនាញនាំខ្លួនស្ត្រីជាមេក្លោងមកឃុំឃាំងសមត្ថកិច្ចបែរជាធ្វេសប្រហែសធ្វើឱ្យស្តីជាជនសង្ស័យម្នាក់នេះរត់បាត់នៅវេលាម៉ោង២និង៥០នាទីទៀបភ្លឺ ថ្ងៃទី៣០ខែកញ្ញា ឆ្នាំ២០១៨ ទើបនៅព្រឹកថ្ងៃដដែលនេះលោកស្នងការនគរបាលខេត្តកែប ក៏បានដាក់បញ្ជាឱ្យឃុំខ្លួនសមត្ថកិច្ចពាក់ព័ន្ធចំនួន៣នាក់ នៅក្នុងបន្ទប់ ដើម្បីសើុបអង្កេតតាមដាននិងសូរនាំតែម្តង ដោយចំណាត់ការនេះគឺប្រដូចទៅនឹងករណីចោររត់បាត់ ម្ចាស់ផ្ទះត្រូវតែមានទោស។
ជុំវិញករណីដ៏កម្រខាងលើ លោកឧត្តមសេនីយ៍ត្រី បែន តារា ស្នងការនគរបាលខេត្តកែប បានបញ្ជាក់ប្រាប់កម្ពុជាថ្មី តាមទូរស័ព្ទនៅល្ងាចថ្ងៃទី៣០ខែកញ្ញា ឆ្នាំ២០១៨នេះថា សមត្ថកិច្ចពិតជាបានបង្ក្រាបករណីគ្រឿងញៀនបានចំនួន ២៦,១១ក្រាម និងឃាត់ខ្លួនជនសង្ស័យ៤នាក់(ប្រុស៣ ស្រី១)ប្រាកដមែន ប៉ុន្តែព្រឹកឡើងបែរជាបាត់ជនសង្ស័យម្នាក់ជាមនុស្សស្រីដោយមិនដឹងមូលហេតុទៅវិញ។លោកស្នងការបានបន្តថា បើករណីបាត់ជនសង្ស័យពិតជាជាប់ពាក់ព័ន្ធនឹងការដោះលែងរបស់សមត្ថកិច្ចមែន គឺដាច់ខាតលោកមិនអត់ឱននោះឡើយ គឺត្រូវតែទទួលទោសទណ្ឌមិនអាចលើកលែង។ ដោយឡែកបើករណីនេះមិនជាប់ពាក់ព័ន្ធនឹងការដោះលែង វាគ្រាន់តែការធ្វេសប្រហែស ដែលសមត្ថកិច្ចជំនាញគ្មានទំនួលខុសត្រូវ ហើយសមត្ថកិច្ចជំនាញនេះត្រូវតែស្រឿសរសៃចេញខ្លះមិនខាន៕
សេង ណារិទ្ធ
