ខេត្តកំពត ៖ មនុស្ស៤នាក់បានរងរបួសធ្ងន់ដេករដូករណែលពេញទ្រូងផ្លូវ ខណៈយានយន្តបីគ្រឿងបានប៉ះទង្គិចគ្នាយ៉ាងដំណំ លើផ្លូវជាតិលេខ៣។
តាមសេចក្តីរាយការណ៍ពីនគរបាលការិយាល័យចរាចរណ៍ផ្លូវគោកនៃស្នងការដ្ឋាននគរបាលខេត្តបានឲ្យដឹងថា មានករណីគ្រោះថ្នាក់ចរាចរដ៏រន្ធត់មួយបានកើតឡើងកាលពីវេលាម៉ោង១៥និង០៩នាទីរសៀល ថ្ងៃទី៣០ ខែកញ្ញា ឆ្នាំ២០១៨ រវាងរថយន្តនិងម៉ូតូ២គ្រឿង បុកគ្នាយ៉ាងពេញទំហឹងក្នុងទិសដៅបញ្ច្រាសទិសគ្នា លើផ្លូវជាតិលេខ៣ត្រង់ចំណុចភូមិវត្តពោធិ៍ ឃុំថ្មី ស្រុកទឹកឈូ ខេត្តកំពត។ប្រភពដដែលបានឲ្យដឹងទៀតថា ក្នុងករណីគ្រោះថ្នាក់ចរាចរខាងលើ បណ្តាលឲ្យមនុស្ស៤នាក់រងរបួសធ្ងន់ ម៉ូតូ២គ្រឿងរងការខូចខាត និងរថយន្តម៉ាកហាយលែនឌ័រមួយគ្រឿងក្រឡាប់ផ្ងារជើងបួនឡើងលើរងការខូចខាតជាមធ្យមផងដែរ។ សមត្ថកិច្ចបានឲ្យដឹងផងដែរថាមធ្យោបាយដែលពាក់ព័ន្ធនឹងករណីគ្រោះថ្នាក់ចរាចររួមមាន៖
១/- ម៉ូតូដែលរងការខូចខាតម៉ាកសេ១២៥ ពណ៌ខ្មៅ សេរី ២០១៥ ពាក់ផ្លាកលេខកំពត 1L- 4784 បើកបរដោយឈ្មោះ វ៉ិត វង់ ភេទប្រុស អាយុ៥៧ ឆ្នាំ ជាកសិកររស់នៅភូមិទឹកក្រហម ឃុំកណ្តោល ស្រុកទឹកឈូ ខេត្តកំពត (រងរបួសធ្ងន់) អ្នករួមដំណើរម្នាក់ឈ្មោះ វ៉ិត វីត ភេទប្រុស អាយុ២៨ឆ្នាំ ជាកូន(រងរបួសធ្ងន់)។
២/- ម៉ូតូម៉ាកសេ១២៥ ពណ៌ខ្មៅ សេរី២០១៨ គ្មានផ្លាកលេខ បើកបរដោយ
ឈ្មោះ វ៉ិត វី ភេទប្រុស អាយុ២១ ឆ្នាំ (រងរបួសធ្ងន់)និងអ្នករួមដំណើរម្នាក់ឈ្មោះ វ៉ិត វឹន ភេទប្រុស អាយុ១៩ ឆ្នាំ(របួសធ្ងន់)អ្នករងរបួសទាំងអស់ រស់នៅភូមិឃុំជាមួយគ្នាខាងលើ ហើយត្រូវបានដឹកទៅសង្គ្រោះនៅមន្ទីរពេទ្យបង្អែកខេត្តកំពត។ប្រភពបន្តថា ម៉ូតូទាំងពីរគ្រឿងមានទិសដៅពីលិចទៅកើត រីឯរថយន្តម៉ាកហាយលែនឌ័រ ពណ៌ទឹកប្រាក់ ពាក់ផ្លាកលេខ ភ្នំពេញ 2AD 3862 (មានទិសដៅពីកើតទៅលិច) អ្នកបើកបរមិនស្គាល់អត្តសញ្ញាណ ក្រោយពីកើតហេតុបានរត់គេចខ្លួនបាត់ បន្សល់ទុករថយន្តនៅផ្ងាជើងបួនឡើងលើនៅកន្លែងកើតហេតុ។
បច្ចុប្បន្ន យានយន្តទាំងបីគ្រឿងសមត្ថកិច្ចជំនាញបាននាំមករក្សាទុកនៅការិយាល័យចរាចរផ្លូវគោកនៃស្នងការដ្ឋានខេត្តកំពត ដើម្បីដោះស្រាយតាមផ្លូវច្បាប់។
ទាក់ទិននឹងករណីគ្រោះថ្នាក់នេះ សមត្ថកិច្ចបានអះអាងប្រាប់អ្នកយកពត៌មាននៅចុងក្រោយថា កត្តាគ្រោះថ្នាក់ចរាចរដែលកើតឡើងខាងលើនេះ បើតាមប្រភពពីជនរងគ្រោះបានប្រាប់
សមត្ថកិច្ចថា បណ្តាលមកពីផ្លូវហុយខ្លាំងពេក ហើយផ្លូវមានជង្ហុកខ្លះផង ពេលនោះរថយន្តបើកក្នុងល្បឿនលឿន មើលម៉ូតូមិនឃើញទើបបណ្តាលឲ្យមានការប៉ះទង្គិចគ្នាយ៉ាងធ្ងន់ធ្ងរបែបនេះ៕
សេង ណារិទ្ធ
