ខេត្តកែប ៖ នៅព្រឹកថ្ងៃសុក្រ៤រោច ខែភទ្របទ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៨ ខែកញ្ញា ឆ្នាំ២០១៨ លោក កែន សត្ថា អភិបាល នៃគណៈអភិបាលខេត្តកែប បានដឹកនាំកិច្ចប្រជុំគណៈអភិបាលបើកទូលាយ ដែលមានការចូលរួមពីសំណាក់មន្ទីរ អង្គភាពជំនាញទូទាំងខេត្ត។
របៀបវារៈនៃកិច្ចប្រជុំព្រឹកនេះ៖ ១/-ពិនិត្យ និងពិភាក្សាឆ្លងរបាយការណ៍បូកសរុបលទ្ធផលការងារប្រចាំខែសីហា ឆ្នាំ២០១៨និងលើកទិសដៅអនុវត្តន៍ខែបន្ទាប់ របស់រដ្ឋបាលខេត្ត ២/-ពិនិត្យ និងពិភាក្សាឆ្លងសេចក្តីសម្រេច ស្តីពីការបង្កើតក្រុមការងាររៀបចំវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តកែប សម្រាប់៥ឆ្នាំ អាណតិ្តទី២។
ក្នុងកិច្ចប្រជុំព្រឹកនេះ លោក កែន សត្ថា អភិបាលខេត្ត ក៏បានជំរុញដល់មន្ទីរអង្គភាពជំនាញនានា ពិសេសកងកម្លាំងប្រដាប់អាវុធទាំងបី ត្រូវត្រៀមលក្ខណៈក្នុងការរក្សាសុខ សុវត្ថិភាពជូនប្រជាពលរដ្ឋ និងភ្ញៀវទេសចរជាតិនិងអន្តរជាតិដែលបានមកលម្ហែកម្សាន្តក្នុងឱកាសបុណ្យភ្ជុំបិណ្ឌ ។ ជាមួយនេះដែរ លោកអភិបាលខេត្តក៏បានផ្តោតសំខាន់ទៅលើការត្រៀមលក្ខណៈដើម្បីត្រៀមរៀបចំបុណ្យជាតិផ្សេងៗទៀត ដែលរដ្ឋបាលខេត្ត តែងតែប្រារព្វធ្វើជារៀងរាល់ឆ្នាំ ដូចជាបុណ្យឆ្លងឆ្នាំសកល ឬពិធីបុណ្យចូលឆ្នាំប្រពៃណីជាតិខ្មែរជាដើម៕
សេង ណារិទ្ធ
