ខេត្តកំពត ៖ ជនណាក៏ដោយឱ្យតែហ៊ានបំពានដីរបស់រដ្ឋ លោកនឹងធ្វើឯកសារបញ្ជូនទៅតុលាការដើម្បីចាត់ការចំពោះមុខច្បាប់ក្នុងពេលខាងមុខ។ការលើកឡើងនេះ ខណៈលោក ជាវ តាយ អភិបាល នៃគណៈអភិបាលខេត្តកំពត ទទួលបដិសណ្ឋារកិច្ច លោក ម៉ម ប៊ុននាង ប្រធានគណៈកម្មការទី១០ នៃព្រឹទ្ធសភាជាតិ ក្នុងដំណើរបំពេញបេសកកម្មការងារនៅមូលដ្ឋានខេត្តកំពត នារសៀលថ្ងៃព្រហស្បតិ៍ ៣រោច ខែភទ្របទ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៧ ខែកញ្ញា ឆ្នាំ២០១៨ នៅសាលាខេត្តកំពត។ លោក ជាវ តាយ អភិបាលខេត្តកំពត បានបញ្ជាក់ផងដែរថា ដីរដ្ឋដែលជនខិលខូចតែងតែលួចទន្ទ្រានភាគច្រើនជាដីចំណីព្រែក ដីបឹងបួ ប្រឡាយ ឬភ្នំជាដើម ហើយកន្លងមកបុគ្គលខិលខូចតែតែឆ្លៀតឱកាសខណៈពេលអាជ្ញាធរជាប់រវល់ការងារ។
ជាមួយគ្នានេះ បើតាមរបាយការណ៍របស់ លោក ជាវ តាយ ដែលបានស្វាគមន៍គណៈប្រតិភូមានខ្លឹមសារថា បច្ចុប្បន្នក្រោមការដឹកនាំរបស់រាជរដ្ឋាភិបាល ខេត្តកំពតបានវិវត្តន៍ប្រែប្រួលលើកិច្ចអភិវឌ្ឍន៍លើគ្រប់វិស័យជាបន្តបន្ទាប់ ក្នុងនោះ ការងារសន្តិសុខ សណ្តាប់ធ្នាប់ សុវត្ថិភាពជូនប្រជាពលរដ្ឋ ឥស្សរជនជាន់ខ្ពស់ព្រឹទ្ធសភា រដ្ឋសភា រាជរដ្ឋាភិបាល ពិសេសក្នុងព្រឹត្តិការណ៍សំខាន់ៗកន្លងមកបានយ៉ាងល្អប្រសើរ។
ក្នុងរយៈពេល៨ខែដើមឆ្នាំ២០១៨ រដ្ឋបាលខេត្តបានខិតខំបំពេញតួនាទី ភារកិច្ច និងធ្វើការអភិវឌ្ឍន៍ខេត្ត រីកចម្រើនខ្លាំងលើការអភិវឌ្ឍន៍គម្រោងហេដ្ឋារចនាសម្ព័ន្ធ និងការវិនិយោគផ្សេងៗ ប៉ុន្តែទោះយ៉ាងណាក៏ដោយ ក៏នៅមានការខ្វះខាត និងបញ្ហាប្រឈមខ្លះ ដែលរដ្ឋបាលខេត្តព្យាយាមដោះស្រាយ និងកាត់បន្ថយ ដើម្បីធ្វើឲ្យការដឹកនាំរបស់រដ្ឋបាលខេត្ត កាន់តែមានភាពល្អប្រសើរ និងឆ្ពោះទៅរកវឌ្ឍភាពនាពេលខាងមុខ។លោកបានបន្តថា ខេត្តកំពតនឹងមានឆ្នេរសមុទ្រមួយកន្លែងសម្រាប់ភ្ញៀវជាតិ និងអន្តរជាតិ មកកម្សាន្ត ហើយជាពិសេសសម្រាប់រៀបចំព្រឹត្តិការណ៍បុណ្យសមុទ្រនៅឆ្នាំ២០១៩ ខាងមុខនេះ។
សូមជម្រាបថា ប្រតិភូគណៈកម្មការទី១០នៃព្រឹទ្ធសភាដឹកនាំដោយ លោក ម៉ម ប៊ុននាង ជាប្រធាន នៅមូលដ្ឋានខេត្តកំពត រយៈពេល២ថ្ងៃ គឺចាប់ពីថ្ងៃទី២៧ ដល់ថ្ងៃទី២៨ ខែកញ្ញា ឆ្នាំ២០១៨៕
