(ខេត្តកំពត)៖ ក្រុមហ៊ុនផលិតស៊ីម៉ងចក្រីទីង គួរផ្តោតសំខាន់នូវការដឹកជញ្ជូនផលិតសីុម៉ង់ត៍របស់ខ្លួនឆ្លងកាត់ផ្លូវនានា ដែលធ្វើឱ្យមានផលប៉ះពាល់យ៉ាងធ្ងន់ធ្ងរដល់ហេដ្ឋារចនាសម្ព័ន្ធផ្លូវថ្នល់ជាដើម។
ការលើកឡើងបែបនេះជាប្រសាសន៍របស់ លោក ម៉ម ប៊ុននាង ប្រធានគណៈកម្មការទី១នៃព្រឹទ្ធសភា ក្នុងដំណើរទស្សនកិច្ចជាផ្លូវការ ដែលអមដំណើរដោយ លោក ជាវ តាយ អភិបាល នៃគណៈអភិបាលខេត្តកំពត និងប្រតិភូជាច្រើនរូប នៅរោងចក្រសីុម៉ង់ត៍ចក្រីទីង ក្នុងភូមិភ្នំតូច ឃុំកណ្តោល ស្រុកទឹកឈូ ខេត្តកំពត នៅព្រឹកថ្ងៃទី២៧ខែកញ្ញា ឆ្នាំ២០១៨។
លោក ម៉ម ប៊ុននាង បានបន្តទៀតថា ដោយផ្តោតសំខាន់ទៅលើហេដ្ឋារចនាផ្លូវថ្នល់ លោកតម្រូវឱ្យក្រុមហ៊ុនផលិតសីុម៉ង់ត៍មួយនេះជួយពន្លឿនក្នុងការជួសជុលផ្លូវថ្នល់ដោយទំនូលខុសត្រូវខ្ពស់ ដូចជាត្រូវរៀបចំហេដ្ឋារចនាសម្ព័ន្ធថ្មី ហើយកិច្ចការនេះចាត់ទុកជាការជួយគ្នាទៅវិញទៅមក។លោកបានបញ្ជាក់ទៀតថា ការវិយោគទន់នៅតំបន់នេះ ក្រុមហ៊ុនពិតជាមានភាពរីកចម្រើនយ៉ាងលើសលប់ ដូច្នេះក្រុមហ៊ុនគួរតែផ្តោតការយកចិត្តទុកដាក់ពីបញ្ហាប្រឈមដែលបានរៀបរាប់ខាងលើ ដោយតម្រូវឱ្យក្រុមហ៊ុនត្រូវតែប៉ះប៉ូវរាល់ការខូចខាតផ្លូវ ខណៈការដឹកជញ្ជូនសីុម៉ង់ត៍រាប់លានតោន ក្នុងមួយឆ្នាំៗឆ្លងកាត់នានា ពិសេសដងផ្លូវក្នុងខេត្តកំពត។
សូមជម្រាបថា បើតាមប្រសាសន៍របស់ លោក ជាវ តាយ អភិបាលខេត្តកំពតក៏បានលើកឡើងផងដែរពីការដឹកជញ្ជូនផលិតផលសីុម៉ង់ត៍ឆ្លងកាត់ពីតំបន់មួយទៅតំបន់មួយ ហើយក៏បានធ្វើឱ្យផ្លូវថ្នល់ត្រូវរងការខូចខាតយ៉ាងធ្ងន់ធ្ងរ។ជាមួយនេះ លោកអភិបាលខេត្តកំពតបានជំរុញដល់ក្រុមហ៊ុនផលិតសីុម៉ង់ត៍ចក្រីទីង ត្រូវតែទួលខុសត្រូវ ពិសេសត្រូវពិនិត្យស្ថានភាពផ្លូវដែលចូលទៅក្នុងរោងចក្រសីុម៉ង់ត៍ដែលកំពុងរងការខូចខាតនាពេលនេះ ហើយក្រុមហ៊ុនត្រូវតែប្រកាន់យកនូវភាពសុក្រិត្យដោយមិនអាចធ្វើព្រងើយតន្តើយនោះទេ។
ដោយឡែក បើតាមការឱ្យដឹងពីប្រធានក្រុមហ៊ុនរោងចក្រសីុម៉ង់ត៍ បានអះអាងថា រោងចក្រនេះមានសមត្ថភាពនាំចេញសីុម៉ង់ត៍ចំនួន ១២.០០០.០០០តោនក្នុងមួយឆ្នាំៗ ដោយក្រុមហ៊ុនមានបុគ្គលិកសរុបចំនួន ៣៨១នាក់។ជាមួយគ្នានេះក្នុងកិច្ចជំនួបពិភាក្សានានា ទាក់ទិនចង្វាក់ផលិតកម្មសីុម៉ង់ត៍ចក្រីទីង ភាគីទាំងពីរក៏បានព្រមព្រៀងគ្នារាល់សំណូមពរទាំងឡាយ ដែលអាជ្ញាធរខេត្តកំពតបានលើកឡើងខាងលើរួចហើយដែរ៕
សេង ណារិទ្ធ
