(ខេត្តកំពត)៖ យុវជនម្នាក់បានស្លាប់ភ្លាមៗនៅកណ្តាលវាលស្រែ និងបីនាក់ទៀតបានរងរបួសធ្ងន់ ស្រាលដោយសាររន្ទះបាញ់សម្លាប់ ខណៈពួកគេទាំង៤នាក់បាននាំគ្នាទៅឃ្វាលក្របីនៅចំណុចក្រោយផ្ទះរបស់ខ្លួន។
ហេតុការណ៍គួរឱ្យសង្វេគនេះបានកើតឡើងកាលពីវេលាម៉ោង៣និង២៥នាទីរសៀល ថ្ងៃទី២៦ខែកញ្ញា ឆ្នាំ២០១៨ ត្រង់ចំណុចវាលស្រែក្រោយផ្ទះរបស់ជនរងគ្រោះ ស្ថិតក្នុងភូមិត្រពាំងនៀល ឃុំឫស្សីស្រុកខាងលិច ស្រុកកំពង់ត្រាច ខេត្តកំពត។
តាមការរៀបរាប់ពីសំណាក់ក្រុមគ្រួសារយុវជនរងគ្រោះបានឱ្យដឹងថា មុនពេលកើតហេតុយុវជនរងគ្រោះ ព្រមទាំងយុវជនបីនាក់ផ្សេងទៀតបាននាំគ្នាទៅឃ្វាលក្របីនៅឯវាលស្រែខាងក្រោយផ្ទះ លុះបន្តិចក្រោយមកមេឃក៏ភ្លៀងនិងមានរន្ទះបាញ់ក្តុងក្តាំងនៅចំណុចនោះបណ្តាលឱ្យយុវជនម្នាក់ស្លាប់និងបីនាក់ទៀតរងរបួសធ្ងន់ ស្រាលតែម្តង។
ពាក់ព័ន្ធនឹងករណីខាងលើ សមត្ថកិច្ចមូលដ្ឋានបានឱ្យដឹងថា ជនរងគ្រោះក្នុងហេតុការណ៍រន្ទះបាញ់ខាងលើមានគ្នា៤នាក់សុទ្ធតែជាសិស្សសាលា រួមមាន៖ ទី១-ឈ្មោះ ផេង សុដា ភេទប្រុស អាយុ២៣ឆ្នាំ(ស្លាប់) ទី២-ឈ្មោះ ហួន ម៉ុក ភេទប្រុស អាយុ២១ឆ្នាំ របួសធ្ងន់ ទី៣-ឈ្មោះ លេន ចាប ភេទប្រុស អាយុ១៩ឆ្នាំ របួសស្រាល និងទី៤-ឈ្មោះ ពៅ ប៊ុនថៃ ភេទប្រុស អាយុ២២ឆ្នាំ របួសស្រាល។អ្នកទាំងអស់គ្នារស់នៅភូមិត្រពាំងនៀល ឃុំឫស្សីស្រុកខាងលិច ស្រុកកំពង់ត្រាច ខេត្តកំពត។
បច្ចុប្បន្នយុវជនដែលស្លាប់ដោយសាររន្ទះបាញ់ត្រូវបានក្រុមគ្រួសារកំពុងចាត់ចែងធ្វើបុណ្យតាមប្រពៃណី។ ដោយឡែក យុវជនដែលរងរបួសត្រូវបានបញ្ជូនទៅសង្គ្រោះនៅឯមន្ទីរពេទ្យ៕
សេង ណារិទ្ធ
