គណៈកម្មាធិការត្រួតពិនិត្យគ្រឿងញៀនខេត្តបាត់ដំបង ផ្សព្វផ្សាយបញ្ហាគ្រឿងញៀន ក្នុងពិធីប្រណាំងទូក ដែលមានអ្នកចូលរួមប្រមាណ៥០ម៉ឺននាក់

(បាត់ដំបង)៖ លោក ធូ ភា អភិបាលរង និងជាប្រធានលេខាធិការដ្ឋានគណកម្មាធិការត្រួតពិនិត្យគ្រឿងញៀនខេត្តបាត់ដំបង បានដឹកនាំកម្លាំងចុះផ្សព្វផ្សាយ បង្កើនការយល់ដឹង ដល់ប្រជាពលរដ្ឋនៅក្នុងពិធីប្រណាំងទូក ដែលមានអ្នកចូលរួមប្រមាណជាង៥០ម៉ឺននាក់ នៅថ្ងៃទី១៦ ខែតុលា ឆ្នាំ២០២៤នេះ តាមរយៈពិធីករពិធីការិនី ការចែកខិតប័ណ្ណ ការដាក់តាំងបដា និងស្ទីកឃ័រ App NoDrug :https://nodrugsnacd.com/download។

ថ្លែងក្នុងនាម លោក សុខ លូ អភិបាលខេត្ត និងប្រធានគណៈកម្មាធិការត្រួតពិនិត្យគ្រឿងញៀនខេត្តបាត់ដំបង លោក ធូ ភា បានលើកឡើងថា តាមរយៈកិច្ចសហការជាមួយអាជ្ញាធរជាតិ ប្រយុទ្ធប្រឆាំងគ្រឿងញៀនខេត្តបាត់ដំបង តែងតែចូលរួមអនុវត្តខ្ជាប់ខ្ជួននូវបទបញ្ជា លិខិតបទដ្ឋាននានាបញ្ចូលខ្លឹមសារ ក្នុងព្រឹត្តិការណ៍នានា ដូចដែលបានកំពុងធ្វើក្នុងពិធីប្រណាំងទូក ដ៏សប្បាយរីករាយនេះ ជាការដាស់តឿនដល់ប្រជាពលរដ្ឋទូទៅពិសេសយុវជនដែលជាទំពាំងស្នងឬស្សី ដែលតម្រូវឲ្យគ្រប់គ្នាត្រូវតែរក្សាគុណភាពទំពាំង ឲ្យមានសុខភាពល្អសម្រាប់ ជាធនធានបន្តវេនរបស់ប្រទេសជាតិ ទៅថ្ងៃអនាគត។

លោក ធូ ភា បានថ្លែងអំណរគុណដល់គ្រប់សមាសភាពលេខាធិការគណ:កម្មាធិការត្រួតពិនិត្យគ្រឿងញៀនខេត្តបាត់ដំបង វិស័យឯកជន ដែលបានចូលរួមការងារ ប្រយុទ្ធប្រឆាំងគ្រឿងញៀន សំដៅរក្សាបាននូវសហគមន៍ មានសុវត្ថិភាពគ្មានគ្រឿងញៀន «ភូមិអ្នក-ភូមិខ្ញុំគ្មានអ្នកញៀន សហគមន៍គ្មានគ្រឿងញៀន មានសុវត្ថិភាព»។

ជាមួយគ្នានេះ លោកឧត្តមសេនីយ៍ឯក លឹម តុងហួត ប្រធាននាយកដ្ឋានផ្សព្វផ្សាយ អប់រំ និងទំនាក់ទំនងសាធារណៈ នៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន បានគូសបញ្ជាក់ថា គណៈកម្មាធិការត្រួតពិនិត្យគ្រឿងញៀនរាជធានី ខេត្ត ក្រសួងសមាជិកអាជ្ញាធរជាតិប្រយុទ្ធប្រឆាំងគ្រឿងញៀន បានធ្វើសកម្មភាពផ្សព្វផ្សាយ ពីបញ្ហាគ្រឿងញៀនយ៉ាងផុលផុស សំដៅចូលរួមចំណែកធ្វើឲ្យបាន សម្រេចបានតាមឆន្ទៈដ៏មោះមុតរបស់រាជរដ្ឋាភិបាល ដឹកនាំដោយសម្ដេចមហាបវរធិបតី ហ៊ុន ម៉ាណែត ដែលបានដាក់ការងារប្រយុទ្ធប្រឆាំងគ្រឿងញៀន ជាការងារអាទិភាពទីមួយ ដើម្បីដោះស្រាយនូវកង្វល់របស់ប្រជាពលរដ្ឋ ពីបញ្ហាគ្រឿងញៀន។