ខេត្តប៉ៃលិន ៖ យុវជនម្នាក់រងរបួសធ្ងន់ ត្រូវបានក្រុមគ្រួសារដឹកយកទៅសង្គ្រោះនៅមន្ទីរពេ ទ្យបង្អែកខេត្ត ដោយកំពុងបើកបរត្រាក់ទ័រភ្ជួរដី ពេលមេឃកំពុងភ្លៀងរលឹមស្រិចៗ ស្រាប់តែត្រូវរន្ទះ បាញ់រងរបួសធ្ងន់តែម្តង ។ ក្រោយពីគ្រូពេទ្យនាំគ្នាសស្រាក់សស្រាំសង្គ្រោះភ្លាមៗ ជនរងគ្រោះបាន ដឹងខ្លួនឡើងវិញ តែនៅវង្វេងស្មារតីតិចៗ ។
ហេតុការណ៍នេះ បានកើតឡើងកាលពីវេលាម៉ោង៣ និង០០នាទីរសៀលថ្ងៃទី២២ ខែសីហា ឆ្នាំ២០១៨នេះ ស្ថិតនៅក្នុងភូមិសំបូរ ឃុំសាលាក្រៅ ស្រុកសាលាក្រៅ ខេត្តប៉ៃលិន ។
បើតាមប្រភពព័ត៌មានពីលោក សៅ អង អាយុ៥៤ឆ្នាំ ត្រូវជាឪពុក រស់នៅភូមិភ្នំកុយ ឃុំសាលាក្រៅ ស្រុកសាលាក្រៅ បានឲ្យដឹងថា កូនប្រុសរបស់គាត់ មានឈ្មោះ អង ចិន ភេទប្រុស អាយុ២២ឆ្នាំ ជាអ្នកបើកបរត្រាក់ទ័រ ដោយមុនពេលកើតហេតុ រូបគេបានបើកបរត្រាក់ទ័រធ្វើដំណើរ ដើម្បីទៅស៊ីឈ្នួលភ្ជួរដី ដាំដំឡូងមីឲ្យគេ នៅភូមិកើតហេតុខាងលើ ។
ប្រភពបន្តទៀតថា លុះកំពុង តែភ្ជួរសុខៗ ស្រាប់តែមេឃចាប់ផ្តើមបង្អុរភ្លៀង ហើយខណ:នៅភ្លៀងរលឹមស្រិចៗ លាយលំដោយខ្យល់រន្ទះ ក៏បាញ់ទៅលើត្រាក់ទ័រ បណ្តាលឱ្យចំកូនគាត់ធ្លាក់ពីលើត្រាក់ទ័ររងរបួសសន្លប់នៅនឹងកន្លែងតែម្តង ។ គាត់បញ្ជាក់ថា ភ្លាមនោះ ត្រូវបានម្ចាស់ចំការឃើញទាន់ ក៏នាំគ្នាលើករឹត និងដឹកយក ទៅសង្គ្រោះនៅមន្ទីរពេទ្យបង្អែកខេត្តតែម្តង ។
គាត់បញ្ជាក់ទៀតថា រហូតមកដល់ពេលនេះ ជនរងគ្រោះបានធូរស្រាលបន្តិចម្តងៗហើយ តែគ្រូពេទ្យឱ្យបន្តសម្រាក ដើម្បីតាមដានជម្ងឺផងដែរ ។
ចំណែកលោកគ្រូប្រចាំការនៅក្នុងមន្ទីរពេទ្យបានរៀបរាប់ឱ្យដឹងថា នេះសំណាងហើយដែលរន្ទះនេះជារន្ទះខ្យល់ បាញ់ចំដៃខាងឆ្វេងប៉ុណ្ណោះ ទើបធ្វើឱ្យជនរងគ្រោះសន្លប់ ។ ម្យ៉ាងទៀត ដោយ រូបគេភ័យនឹងស្នូររន្ទះលាន់ខ្លាំងពេក ទើបសន្លប់ ។
សូមបញ្ជាក់ថា នៅឆ្នាំ២០១៨នេះ ករណីរន្ទះបាញ់បានកើតឡើងចំនួន២ទៅ៣លើកដែរ តែមិនបណ្តាលឱ្យមនុស្សណាម្នាក់ស្លាប់ឡើយ គ្រាន់តែងាប់សត្វគោរបស់ប្រជាពលរដ្ឋប៉ុណ្ណោះ ៕
ដោយ ៖ នីយ៉ា
