ក្រោយអភិបាលខេត្តកំពង់ធំ ចូលកាន់តំណែងភ្លាម, សមាគមធំៗ២ ប្ដេជ្ញារួមសហការអភិវឌ្ឍវិស័យអាទិភាពទាំង៧ក្នុងខេត្ត 

(កំពង់ធំ)៖ ក្រោយលោក នួន ផារ័ត្ន ចូលកាន់តំណែងជាអភិបាលខេត្តកំពង់ធំបាន១ថ្ងៃ, សមាគមធំៗចំនួន២ មានសមាគមសហព័ន្ធវិនិយោគិនកម្ពុជា និងសមាគមសហព័ន្ធយុវជនសេដ្ឋកិច្ចកម្ពុជា ចូលជួបសម្ដែងការអបអរសាទរ និងប្ដេជ្ញាសហការជាមួយអាជ្ញាធរខេត្តកំពង់ធំ ដើម្បីចូលរួមអភិវឌ្ឍវិស័យអាទិភាពទាំង៧ ដូចជា កសិកម្ម កសិឧស្សាហកម្ម សុខាភិបាល ទេសចរណ៍ អាជីវកម្ម វិនិយោគ ក៏ដូចជាការងារពាក់ព័ន្ធនឹងជួរយុវជនផងដែរ។

គួរជម្រាបថា លោក នួន ផារ័ត្ន ត្រូវបានព្រះករុណា ព្រះបាទ សម្ដេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ចេញព្រះរាជក្រឹត្យត្រាស់បង្គាប់ជាអភិបាលខេត្តកំពង់ធំ កាលពីថ្ងៃទី២៤ ខែមិថុនា ឆ្នាំ២០២៤ ហើយនាថ្ងៃទី៨ ខែកក្កដា ឆ្នាំ២០២៤ លោក នួន ផារ័ត្ន ក៏ត្រូវបានប្រកាសចូលកាន់តំណែងជាអភិបាលខេត្តកំពង់ធំជាផ្លូវការ។

នាថ្ងៃទី៩ ខែកក្កដានេះ ឧកញ៉ាសមូហកបណ្ឌិត ឡី សុភាព ប្រធានសមាគមសហព័ន្ធវិនិយោគិនកម្ពុជា និងជាប្រធានសមាគមសហព័ន្ធយុវជនសេដ្ឋកិច្ចកម្ពុជា បានដឹកនាំប្រតិភូតាមវិស័យតាមផ្នែកទាំងអស់ ជួបសម្ដែងការអបអរ សាទរចំពោះលោក នួន ផារ័ត្ន ដែលត្រូវបានព្រះមហាក្សត្រទ្រង់ត្រាស់បង្គាប់តែងតាំងជាអភិបាលខេត្តកំពង់ធំ បន្ទាប់ពីលោក ងួន រតនៈ ដែលត្រូវមកកាន់តំណែងជារដ្ឋលេខាធិការក្រសួងមហាផ្ទៃ។

នាឱកាសនោះ ឧកញ៉ាសមូហកបណ្ឌិត ឡី សុភាព ព្រមទាំងថ្នាក់ដឹកនាំ សមាជិក-សមាជិកនៃសមាគមសហព័ន្ធវិនិយោគិនកម្ពុជា និងសមាគមសហព័ន្ធយុវជនសេដ្ឋកិច្ចកម្ពុជា ក៏បានបង្ហាញការប្ដេជ្ញាចិត្តបន្តកិច្ចសហការ ឱ្យកាន់តែជិតស្និទ្ធជាមួយលោកអភិបាលខេត្តថ្មី អាជ្ញាធរគ្រប់ជាន់ថ្នាក់នៅទូទាំងខេត្តកំពង់ធំ ដើម្បីរួមចំណែកធ្វើឱ្យវិស័យសេដ្ឋកិច្ចក្រៅប្រព័ន្ធបន្តការរីកចម្រើនថែមទៀត។ ឧកញ៉ាសមូហកបណ្ឌិត ឡី សុភាព បានសង្កត់ធ្ងន់លើវិស័យអាទិភាពមួយចំនួន ដូចជា កសិកម្ម កសិឧស្សាហកម្ម សុខាភិបាល ទេសចរណ៍ អាជីវកម្ម (អាជីវករតាមផ្សារ តាមផ្លូវ និងមូលដ្ឋានផ្សេងៗ) វិនិយោគ ក៏ដូចជាការងារពាក់ព័ន្ធនឹងជួរយុវជន។

លោកសមូហកបណ្ឌិត ឡី សុភាព ក៏បានប្ដេជ្ញាខិតខំអនុវត្តតាមការលើកទឹកចិត្តរបស់លោកអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដែលជំរុញឱ្យវិស័យឯកជនខិតខំកៀរគរវិនិយោគជាតិ-អន្តរជាតិ មកបណ្ដាក់ទុកវិនិយោគអភិវឌ្ឍនៅមូលដ្ឋានខេត្តកំពង់ធំ ដែលមានសក្ដានុពលលើវិស័យអាទិភាពខាងលើនោះ។

លោកប្រធានបានកោតសរសើរចំពោះថ្នាក់ដឹកនាំរដ្ឋបាលខេត្តកំពង់ធំ មន្ទីរ អង្គភាព និងអាជ្ញាធរគ្រប់ជាន់ថ្នាក់នៅក្នុងខេត្តកំពង់ធំ ដែលរក្សាបាននូវសាមគ្គីផ្ទៃក្នុងបន្តកិច្ចការអភិវឌ្ឍជូនប្រជាជន ធ្វើឱ្យវិស័យឯកជនរីករាយ ក្នុងការចូលរួមក្នុងកិច្ចអភិវឌ្ឍនេះ។

សមាគមសហព័ន្ធវិនិយោគិនកម្ពុជា និងសមាគមសហព័ន្ធយុវជនសេដ្ឋកិច្ចកម្ពុជា គឺជាសមាគមដ៏សំខាន់ផងដែរក្នុងការចូលរួមអភិវឌ្ឍវិស័យសេដ្ឋកិច្ចក្រៅប្រព័ន្ធ ដែលសមាគមទាំងនេះមានថ្នាក់ដឹកនាំ មានសមាជិក-សមាជិក គ្រប់រាជធានី-ខេត្តនៅទូទាំងប្រទេសកម្ពុជា ក៏ដូចជាកម្លាំងយុវជនសេដ្ឋកិច្ចក៏ច្រើនគួរសម ពិសេសការចូលរួមរបស់សមាគមទាំងនេះ គឺជាសញ្ញាដ៏ល្អនៃកិច្ចសហការជាមួយអាជ្ញាធររាជធានី-ខេត្តនីមួយៗ៕