បាត់ដំបង ៖ មន្ត្រីរាជការនិងប្រជាជនខេត្តបាត់ដំបង មានក្តីខ្សឹបខ្សួលរំជួលចិត្តយ៉ាងក្រៀមក្រំ ក្តីទុក្ខដ៏មហាជ្រាលជ្រៅបំផុត ក្តីសោកសង្វេគដ៏ធំធេង និងពោរពេញដោយក្តីសោកស្តាយស្រណោះអាឡោះអាល័យជាអនេកប្បការបានធ្វើពិធីគោរពវិញ្ញាណក្ខ័ន្ធ បង្សុកូល និងរាប់បាត្រព្រះសង្ឃចំនួន ៨៣ អង្គ ជូនសពសម្តេចអគ្គមហាធម្មពោធិសាល ជា ស៊ីម ប្រធានព្រឹទ្ធសភានិងជាប្រធានគណបក្សប្រជាជនកម្ពុជា នៅព្រឹកថ្ងៃទី០១២ ខែមិថុនា ឆ្នាំ២០១៥ សាលមហាស្រពស្ទឹងសង្កែ ភូមិព្រែកមហាទេពសង្កាត់ស្វាយប៉ោក្រុងបាត់ដំបង។
បន្ទាប់ពីលោក អ៊ុយ រី អនុប្រធានប្រចាំការគណបក្សប្រជាជនខេត្តបាត់ដំបងបានអានសារចូលរួមមរណទុក្ខរបស់ លោក អ៊ុក វង្ស ប្រធានគណកម្មាធិការបក្សខេត្ត និងលោក សុខគង់ អនុប្រធានក្រុមប្រឹក្សាខេត្ត បានអានសារចូលរួមមរណទុក្ខរបស់លោក ច័ន្ទ សុផលអភិបាលខេត្តបាត់ដំបង ថ្វាយជូនសព សម្តេចអគ្គមហាធម្មពោធិសាល ជា ស៊ីម ជាប្រធានគណបក្សប្រជាជនកម្ពុជានិងជាប្រធានព្រឹទ្ធសភានៃព្រះរាជាណាចក្រកម្ពុជាដែលបានបានទទួលមរណភាពក្នុងជន្មាយុ ៨៣ ឆ្នាំ ដោយរោគាពាធ កាលពីវេលាម៉ោង៣និង៤៥ នាទី ថ្ងៃទី០៨ ខែមិថុនា ឆ្នាំ២០១៥ភូមិគ្រឹះលេខ១២ ផ្លូវលេខ៤៦២ សង្កាត់ទន្លេបាសាក់ ខណ្ឌចំការមនរាជធានីភ្នំពេញ ។
លោក ព្រំ ស៊ីផាន ប្រធានមន្ទីរគណបក្សប្រជាជនកម្ពុជាខេត្តបាត់ដំបងបានអានជីវប្រវត្តិសម្តេចអគ្គមហាធម្មពោធិសាល ជា ស៊ីម ប្រធានព្រឹទ្ធសភានិងជាប្រធានគណបក្សប្រជាជនកម្ពុជា៖សម្តចជាស៊ីមកើតថ្ងៃទី១៥ ខែវិច្ឆិកា ឆ្នាំ១៩៣២ ភូមិពពែលឃុំអំពិលស្រុករមាសហែកខេត្តស្វាយរៀង ។ សម្តេចបានរៀបអាពាហ៍ពិពាហ៍ជាមួយជំទាវ ញ៉ែម សឿន មានបុត្រ៧ នាក់ទី១ ឈ្មោះ ជា សក្តិ ភេទប្រុសស្លាប់ ។ ទី២ ឈ្មោះ ជា សំអាត ភេទស្រី ។ ទី៣ ឈ្មោះសំអេង ភេទ ស្រី ។ ទី៤ ឈ្មោះ ជា ពីន ភេទស្រី ។ ទី៥ ឈ្មោះ ជា ធា ភេទប្រុស ។ ទី៦ឈ្មោះជា ថា ភេទប្រុស ។ ទី៧ ឈ្មោះ ជា សុមេធី ភេទប្រុស ។
ឆ្នាំ១៩៥១ ដល់១៩៥៤ សម្តេចបានចូលរួមចលនាតស៊ូខ្មែរឥស្សរៈដ់ម្បីឯករាជមាតុភូមិកម្ពុជា ។ ឆ្នាំ១៩៥៤ ដល់១៩៧០ សម្តេចបានចូលបម្រើក្នុងចលនាស្នេហាជាតិ ទទួលតួនាទីជាប្រធានឃុំ និងប្រធានស្រុក ។ ១៩៧៨ដល់១៩៧៩ មាននាទីជាអនុប្រធានរណសិរ្សសាមគ្គីសង្គ្រោះជាតិ ។ មុនថ្ងៃរំដោះ ៧ មករា ១៩៧៩ ជាថ្នាក់ដឹកនាំប្រជាជនកម្ពុជាពុះពារការពារផ្តួលរបបប្រល័យពូជសាសន៍ មិនអោយវិលត្រឡប់មកវិញ ។ ក្រោយថ្ងៃរំដោះ ៧ មករា ១៩៧៩សម្តេចមានតួនាទីជារដ្ឋមន្ត្រីក្រសួងមហាផ្ទៃ នៃសាធារណរដ្ឋប្រជាមានិតកម្ពុជា ។ ឆ្នាំ១៩៨១សម្តេច ជា ស៊ីម ត្រូវជ្រើសតាំងជាប្រធានរណសិរ្សសាមគ្គីកសាងការពារមាតុភូមិកម្ពុជាជាតំណាងប្រធានមណ្ឌលព្រៃវែង និងជាប្រធានរដ្ឋសភា នៃសាធារណរដ្ឋប្រជាមានិតកម្ពុជា ។ ថ្ងៃ១៧ តុលា ឆ្នាំ១៩៩១ សម័យប្រជុំពេញអង្គលោកលើកទី ១៤ នៃគណកម្មាធិការកណ្តាលគណបក្សប្រជាជនកម្ពុជា បានសម្រេចជ្រើសតាំងសម្តេចជាប្រធានគណបក្ស ។ ឆ្នាំ១៩៩៣ សម្តេចបានជាប់ឆ្នោតតំណាងរាស្ត្រមណ្ឌលភ្នំពេញ។ឆ្នាំ១៩៩៣សម័យប្រជុំលើកទី១នីតិកាលទី១នៃរដ្ឋសភាសម្តេចត្រូវបានជ្រើសរើសជាប្រធានរដ្ឋសភា ។ តាមរយៈការបោះឆ្នោតថ្ងៃទី២៦ ខែកក្កដា ឆ្នាំ១៩៩៨ សម្តេចបានជាប់ឆ្នោតម្តងទៀត ជាតំណាងរាស្ត្រមណ្ឌលភ្នំពេញ ។ ថ្ងៃទី១១ ខែមិនា ឆ្នាំ១៩៩៩ សម្តេច ជា ស៊ីម ត្រូវបានព្រះករុណាព្រះបាទ សម្តេច នរោត្តមសីហនុ សព្វព្រះរាជហរទ័យ តែងតាំងជាប្រធានព្រឹទ្ធសភាសម្រាប់នីតិកាលទី ១ ។ ការបោះឆ្នោតអសាកល ថ្ងៃទី២២ ខែមករា ឆ្នាំ២០០៦ ជ្រើសរើសតំណាងជាសមាជិកព្រឹទ្ធសភាភូមិភាគទី ១ ក្រុងភ្នំពេញ ។ ថ្ងៃទី២០ ខែមិនា ឆ្នាំ២០០៦ ក្នុងសម័យប្រជុំលើកទី ១ នីតិកាលលើកទី២នៃព្រឹទ្ធសភា សម្តេច ជា ស៊ីម ត្រូវបានជ្រើសតាំងប្រធានព្រឹទ្ធសភា ។ ថ្ងៃទី២៩ ខែមេសា ឆ្នាំ២០០៦ ក្នុងមហេសន្និបាតលើកទី ៥ នៃរណសិរ្សសាមគ្គីនិងអភិវឌ្ឍន៍មាតុភូមិកម្ពុជា សម្តេច ជា ស៊ីម ត្រូវបានជ្រើសតាំងប្រធានគណៈអធិបតីកិត្តិយសក្រុមប្រឹក្សាជាតិរណសិរ្ស ៕
