ខេត្តរតនគិរី ៖ ចែ រ៉ាន់ ជាមេឈ្មួញឈើប្រណិតល្បីឈ្មោះគួរសមដែរនោះ តើក្នុង១ខែបង់លុយអោយនគរបាលប្រឆាំងបទល្មើសសេដ្ឋកិច្ចខេត្ត និងក្រសួងក្នុង១ខែប៉ុន្មាន ខណៈដែលនគរបាលរូបនោះឃើញឈើប្រណិតនៅលើរថយន្តនិងនៅក្នុងផ្ទះបែរជាមិនហ៊ានបង្ក្រាប។
ហេតុការណ៍នេះបានកើតឡើងកាលពីវេលាម៉ោងជាង៥ និង១៥នាទីល្ងាច ថ្ងៃទី១០ ខែមិថុនា ឆ្នាំ២០១៥ ស្ថិតនៅតាមផ្លូវទៅកាន់សាលាឯកជនឈ្មោះគ្រូយើង ស្ថិតនៅភូមិភ្នំស្វាយ សង្កាត់បឹងកន្សែង ក្រុងបានលុងខេត្តរតនគិរី។
បើយោងតាមការអោយដឹងពីអ្នកផ្ទះជិតខាងគឺឈ្មោះ ចែ រ៉ាន់ ដែលរស់នៅភូមិឃុំ សង្កាត់ខាងលើតែងរកស៊ីឈើប្រណិតអនាធិបតេយ្យទៅលក់នៅប្រទេសវៀតណាមជាច្រើនឆ្នាំមកហើយតាមបណ្តោយផ្លូវជាតិលេខ៧៨ តាមរថយន្តពីគ្រឿង គឺរថយន្តសាំយ៉ុង ពណ៌ស ពាក់ស្លាកលេខ 7225 និងរថយន្តមួយគ្រឿងទៀតម៉ាកកូរ៉េ ពណ៌ត្រពិក គ្មានស្លាកលេខ ធ្វើការដឹកជញ្ជូនឈើប្រណិតអនាធិបតេយ្យជារៀងរាល់ថ្ងៃ។ ដោសារតែបង់លុយអោយសមត្ថកិច្ចគ្រប់ស្ថាប័ន ទើបចែ រ៉ាន់ ពេលជួបអ្នកយកពត៌មានម្តងៗតែងតែមើលងាយនិងកញ្ច្រោកបោកបាចមាននៅលើដងផ្លូវសាធារណៈ។
ជាក់ស្តែងនៅថ្ងៃកើតហេតុខាងលើ បន្ទាប់ពីទទួលពត៌មាននៅក្នុងផ្ទះរបស់ចែ រ៉ាន់ មានស្តុកឈើប្រណិត រថយន្តសាំយ៉ុងពីរគ្រឿងនៅក្នុងផ្ទះនោះ លោក វរសេនីយ៍ នូវ ដារ៉ា ប្រធានការិយាលកណ្តាលប្រឆាំងបទល្មើសសេដ្ឋកិច្ចខេត្តបានបញ្ជាឲ្យលោក ឈៀង សុភ័ក្ត្រ មន្ត្រីនគរបាលប្រឆាំងបទល្មើសសេដ្ឋកិច្ចមកបង្ក្រាប់ ប៉ុន្តែបន្ទាប់ពីឈើប្រណិតនៅក្នុងផ្ទះនិងក្នុងរថយន្តសាំយ៉ុង ហើយបែរជាធ្វើមិនដឹងមិនឮទៅវិញ ប្រហែលជាទទួលសំណូក ឫត្រូវថ្នាំសណ្តំរបស់ឈ្មួញឈើប្រណិត ហើយមើលទៅទើបភ្លេចអនុវត្តច្បាប់។
មជ្ឈដ្ឋានទូទៅ គេរង់ចាំមើលតើ ចែ រ៉ាន់ ឈ្មួញឈើប្រណិតអនាធិបតេយ្យ នៅចិញ្ចឹមសមត្ថកិច្ចនគរបាល ប្រឆាំងបទល្មើសសេដ្ឋកិច្ចខេត្ត និងក្រសួង មេព្រៃ កងកម្លាំងតាមដងផ្លូវជាតិលេខ៧៨ដល់ពេលណាទៀត។ បើគិតពីកម្លាំងដែលបង្ក្រាបឈើនៅខេត្តរតនគិរីមិនក្រោមពី១០០អង្គភាពទេ ប៉ុន្តែបទល្មើសនៅតែមាន ៕
ជីវ៉ា
