កំពង់ធំ ៖ ប្រាក់បេឡាសង្ក្រោះចំនួ ១ ២ លានរៀល ត្រូវបាន ឯកឧត្តម លឹម ឆាយ អនុរដ្ឋលេខាធិការ ក្រសួងសង្គមកិច្ច អតីតយុទ្ធជន និងយុវនីតិសម្បទា ប្រគល់ជូនដល់គ្រួសារសពចំនួន៣នាក់ កាលពីព្រឹកថ្ងៃទី៨ ខែមិថុនា ឆ្នាំ២០១៥ នៅក្នុងមន្ទីរសង្គមកិច្ច អតីតយុទ្ធជន និងយុវនីតិសម្បទា ខេត្តកំពង់ធំ។
លោក អ៊ាក ឈុនស្រៀង អនុប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តកំពង់ធំ បានអានរបាយការណ៍ថា មន្ទីរបានស្នើឡើងទៅក្រសួងមានចំនួនសរុប២៣៥នាក់ គិតមកដល់ថ្ងៃនេះ គឺបានប្រគល់ជូនចំនួន១៨៥នាក់ នៅសល់៥០នាក់ទៀត ក្នុងនោះមានឆ្នាំ២០១៣ នៅសល់ម្នាក់ ឆ្នាំ២០១៤ នៅសល់៣១នាក់ និងនៅឆ្នាំ២០១៥ នៅសល់១៨នាក់។
ឯកឧត្តម លឹម ឆាយ អនុរដ្ឋលេខាធិការ មានប្រសាសន៍ថា ចំពោះប្រាក់សង្ក្រោះជូនគ្រួសារសពសមាជិកសមាគមអតីតយុទ្ធជនកម្ពុជា នេះ បើទោះបីជាមានការយ៉ឺតយ៉ាវបន្តិច មិនបានទាន់ពេលវេលាទៅតាមសេចក្តីត្រូវការរបស់បងប្អូនយ៉ាងណាក្តី ក៏សូមអភ័យទោស! ទំរាំតែប្រាក់ធ្លាក់មក ទើបយកមកប្រគល់ជូនបងប្អូន! បន្ទាប់ពីបានទទួលថវិកាទាំងអស់នេះហើយ សូមយកទៅចាយវាយឲ្យចំគោលដៅ ដើម្បីជួយសម្រួលដល់ជីវីភាពក្នុងគ្រួសារ សូមកុំយកទៅប្រព្រឹត្តល្បែងផ្សេងៗ ជាពិសេស គឺចាក់កន្ទុយលេខតែម្តង ដែលក្នុង១គ្រួសារៗ ទទួលបានថវិកាចំនួន៤លានរៀល៕
