ខេត្ដក្រចេះ ៖ កាលពីព្រឹក ថ្ងៃទី៤ ខែមិថុនា ឆ្នាំ២០១៥ ដោយមានការដឹកនាំ ពីតំណាងអយ្យការ អម សាលាដំបូងខេត្ដក្រចេះ ចុះបង្ក្រាបរថយន្ដយីឌុបមួយគ្រឿង ផ្ទុកឈើពេញប្រៀប ជារបស់ ឧកញ៉ា ឆាយ ជ្រាយ ត្រូវបានសមត្ថកិច្ច និងមន្ដ្រីជំនាញ រដ្ឋបាលព្រៃឈើ ។ បន្ទាប់ពីសង្ស័យថា រថយន្ដខាងលើនេះ ដឹកជញ្ជូនឈើ ដោយគ្មានច្បាប់អនុញ្ញាត នៅចំណុចកំពង់ផែ កំពង់គឆ្លូង ស្ថិតក្នុង ភូមិកំពង់គ ឃុំ-ស្រុកព្រែកប្រសព្វ ខេត្ដក្រចេះ។
សមត្ថកិច្ចជំនាញបានបង្ហើបថា ឧកញ៉ា ឆាយ ជ្រាយ គឺជាឈ្មួញ រកស៊ីឈើល្មើសច្បាប់ ក្នុងទ្រង់ទ្រាយធំ នៅតំបន់ព្រំប្រទល់ ខេត្ដកំពង់ធំ ខេត្ដក្រចេះ និងខេត្ដកំពង់ចាម។ បើទោះជាសមត្ថកិច្ច បានបង្ក្រាប រថយន្ដដឹកឈើ មួយគ្រឿង និងឃាត់ខ្លួន មនុស្ស ៧នាក់ ក៏ដោយ ប៉ុន្ដែរថយន្ដយីឌុប ចំនួន ៣គ្រឿងទៀត បានលាក់ខ្លួន នៅក្នុងព្រៃមិនឆ្ងាយពី កន្លែងបង្ក្រាបនោះឡើយ។ សមត្ថកិច្ចបានបង្ហើបថា ឧកញ៉ា ឆាយ ជ្រាយ គឺជាកំពូលអ្នករកស៊ីដឹកឈើ លោតឆត្រ និងមានជំនាញ បោកប្រាស់ ភូតកុហក់ ១០០ជំពូក។
ដូច្នេះការបង្ក្រាបឈើ របស់ឧកញ៉ា ឆាយ ជ្រាយ នាពេលនេះ មិនមែនជាសកម្មភាព ល្មើសច្បាប់ជាលើកទី១ នោះទេ តែឧកញ៉ា ឆាយ ជ្រាយ នៅមិនរាងចាល ចំពោះបទល្មើស ដឹកជញ្ជូនឈើល្មើសច្បាប់ រហូតដល់សមត្ថកិច្ចឱ្យឈ្មោះថា ឧកញ៉ាកំពូលល្បិច ដឹកឈើលោតឆត្រ។ ឧកញ៉ា ឆាយ ជ្រាយ បានដាក់ទុនប្រមូលទិញឈើធ្នង់ ឈើសុក្រំ ស្ថិតនៅចំណុចមុំ៣ ក្នុងទឹកដីខេត្តកំពង់ធំ ខេត្តក្រចេះ និងខេត្តព្រះវិហារ ស្ថិតនៅក្នុងឃុំមានរិទ្ធ ស្រុកសណ្តាន់ ខេត្តកំពង់ធំ ដឹកឆ្លងកាត់ស្រុកព្រែកប្រសព្វ និងខេត្តកំពង់ចាម ឆ្ពោះទៅប្រទេសវៀតណាម គ្មាននរណាហ៊ានប៉ះពាល់នោះទេ ៕
