កាលពីរសៀលថ្ងៃទី ២២ ខែឧសភា ឆ្នាំ២០១៥ នៅស្នងការដ្ឋាននគរបាលរាជធានីភ្នំពេញ ក្រោមអធិបតីភាព នាយឧត្តមសេនីយ៍ ចាន់ អ៊ាន អគ្គស្នងការរងនគរបាលជាតិ លោកស្រី ម៉ក់ វណ្ណស៊ីថា អភិបាលរង រាជធានីភ្នំពេញ និងលោកឧត្តមសេនីយ៍ឯក ជួន សុវណ្ណ ស្នងការនគរបាលរាជធានីភ្នំពេញ ។
មន្ត្រីនគរបាលជាតិដែលត្រូវបានប្រកាសផ្ទេរភារកិច្ច និងតែងតាំងមុខតំណែងថ្មីនេះ មានចំនួន ២០រូប ក្នុងនោះថ្នាក់នាយការិយាល័យចំនួន ២រូប ថ្នាក់អធិការ ១រូប និងថ្នាក់អធិការរងចំនួន ៣រូប ។ ដោយឡែកមន្ត្រីដែលត្រូវបំពាក់ឋានន្តរស័ក្តិ មានចំនួន ១២រូប គឺថ្នាក់ឧត្តមសេនីយ៍ត្រី ២រូប ថ្នាក់វរសេនីយ៍ឯក ១រូប ថ្នាក់វរសេនីយ៍ទោ ៥រូប ថ្នាក់វរសេនីយ៍ត្រី ៥រូប និងថ្នាក់អនុសេនីយ៍ ២រូប ។
នៅក្នុងឱកាសនោះដែរ លោក ជឹម ស៊ីថា ត្រូវបានតម្លើងឋានន្តរស័ក្តិពីវរសេនីយ៍ត្រី ទៅវរសេនីយ៍ទោ និងផ្ទេរតំណែងពីអធិការរងនគរបាលខណ្ឌមានជ័យ ទៅជាអធិការនគរបាលខណ្ឌដង្កោ ជំនួសលោកវរៈសេនីយ៍ឯក យឹម សុជាតិ ដែលត្រូវផ្ទេរភារកិច្ចទៅកាន់ជានាយការិយាល័យប្រឆាំងបទល្មើសសេដ្ឋកិច្ច រាជធានីភ្នំពេញ ។
គួរបញ្ជាក់ថា លោក ជឹម ស៊ីថា បានចូលបម្រើការជាមន្ត្រីនគរបាលជាតិតាំងពីឆ្នាំ ១៩៨៥ លុះដល់ឆ្នាំ ១៩៨៩ ជាមន្ត្រីនគរបាលព្រហ្មទណ្ឌខេត្តសៀមរាប នៅឆ្នាំ១៩៩៤ ជាអនុប្រធានផ្នែកក្នុងការិយាល័យព្រហ្មទណ្ឌ រាជធានីភ្នំពេញ ដល់ឆ្នាំ ១៩៩៧ ជានាយរងប៉ុស្តិ៍នគរបាលរដ្ឋបាលទួលស្វាយព្រៃ ២ ខណ្ឌចំការមន នៅឆ្នាំ១៩៩៩ ជានាយប៉ុស្តិ៍រដ្ឋបាលទួលស្វាយព្រៃ ១ ខណ្ឌចំការមន នៅឆ្នាំ២០០៥ ជានាយប៉ុស្តិ៍នគរបាល សង្កាត់បឹងទំពុន ខណ្ឌមានជ័យ ដល់ឆ្នាំ២០០៦ ជាអធិការរងនគរបាលខណ្ឌមានជ័យ និងត្រូវបានតែងតាំងមុខតំណែងថ្មី ជាអធិការនគរបាលខណ្ឌដង្កោចាប់ពីថ្ងៃទី ២២ ខែឧសភា ឆ្នាំ២០១៥ ។
លោក ជឹម ស៊ីថា បានប្តេជ្ញាថា ការពារសុខសុវត្ថិភាព និងបម្រើប្រជាពលរដ្ឋ តាមអនុសាសន៍របស់សម្តេច តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នូវគោលនយោបាយ ៩ចំណុចភូមិ-ឃុំមានសុវត្ថិភាពឱ្យ មានប្រសិទ្ធិខ្ពស់ ៕
