សាខាកាកបាទក្រហមកម្ពុជាខេត្តប៉ៃលិន បានប្រមូលថវិកាបានជិត ២២ម៉ឺនលាន ពីសប្បុរសជនក្នុង និងក្រៅប្រទេស សម្រាប់សកម្មភាពមនុស្សធម៌ ក្នុងពិធីពិធីអបអរសាទរខួបលើកទី ១៥២ ទិវាពិភពលោក កាកបាទក្រហម អឌ្ឍចន្ទក្រហម ៨ ឧសភា ឆ្នាំ២០១៥ នៅខាងមុខសាលាខេត្តប៉ៃលិន ។
លោក សៅ សារ៉ាត់ អនុប្រធានសាខាកាកបាទក្រហមកម្ពុជាខេត្តប៉ៃលិន បានមានប្រសាសន៍ថា សាខាកាក បាទក្រហមកម្ពុជាខេត្តប៉ៃលិនបានមានប្រសាសន៍ថា សាខាកាកបាទក្រហមកម្ពុជាខេត្តប៉ៃលិន បានឆ្លើយតបតម្រូវ ការជាក់ស្តែងនៃភាពងាយរងគ្រោះ បម្រើសេវាកម្មមនុស្សធម៌ ដើម្បីអនុវត្តសកម្មភាពមនុស្សធម៌ទាំងសាខា និងអនុសាខាចុះជួយពលរដ្ឋរងគ្រោះដោយធម្មជាតិ ឬគ្រោះថ្នាក់ផ្សេងៗមានប្រសិទ្ធភាព តម្លាភាព បានកាន់តែប្រសើរឡើង ។ លោកបានលើកឡើងអំពីលទ្ធផលដែលសាខាកាកបាទក្រហមកម្ពុជាខេត្តប៉ៃលិន អនុវត្តបាននៅឆ្នាំ២០១៤ ក្នុងការជួយសង្គ្រោះប្រជាពលរដ្ឋរងគ្រោះដោយគ្រោះធម្មជាតិ និងឧប្បត្តិហេតុផ្សេងៗ ។
លោកបានបញ្ជាក់ថា ក្នុងដើមឆ្នោំ២០១៥ ចាប់ពីខែមករាដល់ខែឧសភានេះ សាខាកាកបាទក្រហមកម្ពុជាបានចុះ ចែកអំណោយដល់ប្រជាពលរដ្ឋដែលរងគ្រោះដោយសារខ្យល់កន្ត្រាក់ចំនួន ៣១១គ្រួសារ រងគ្រោះដោយសារភ្លើងឆេះផ្ទះចំនួន ១៦គ្រួសារ និងបានជួសជុលផ្ទះជូនប្រជាពលរដ្ឋចំនួន ២៧ខ្នងផ្ទះ ។
លោកជំទាវ បាន ស្រីមុំ ប្រធានគណៈកម្មាធិការ សាខាកាកបាទក្រហមកម្ពុជាខេត្តប៉ៃលិន បានបញ្ជាក់ថា ក្នុងពិធីអបអរខួបលើកទី ១៥២ ទិវាពិភពលោកកាកបាទក្រហមកម្ពុជា អឌ្ឈចន្ទក្រហម ៨ ឧសភា ឆ្នាំ២០១៥ នៅ ព្រឹកថ្ងៃទី ២៣ ខែឧសភា ឆ្នាំ២០១៥ នេះ សាខាកាកបាទក្រហមកម្ពុជាខេត្តប៉ៃលិនបានប្រមូលថវិកា ដែលសមាជិក សមាជិកា និងសប្បុរសជនក្នុង និងក្រៅប្រទេស បាន ២១៨.៥០០ដុល្លារ ដើម្បីជួយឧបត្ថម្ភគាំទ្រក្នុងការអនុវត្តសកម្មភាពមនុស្សធម៌ចុះជួយសង្គ្រោះប្រជាពលរដ្ឋទីទ័លក្រ និងជួបគ្រោះថ្នាក់ផ្សេងៗ និងគ្រោះធម្មជាតិនៅក្នុងខេត្តប៉ៃលិនទាំងអស់ ។
ឆ្លើយតបតម្រូវការរបស់ប្រជាពលរដ្ឋរងគ្រោះធម្មជាតិ និងគ្រោះថ្នាក់ផ្សេងៗ ឯកឧត្តម អ៊ី ឈាន ប្រធានកិត្តិយសសាខាកាកបាទក្រហមកម្ពុជាខេត្តប៉ៃលិន បានអំពាវនាវចំពោះព្រះសង្ឃ អាជីវករ និងសប្បុរសជន ក្នុង និងក្រៅប្រទេស បន្តជួយឧបត្ថម្ភគាំទ្រ និងបរិច្ចាគថវិកា ដោយទឹកចិត្តជ្រះថ្លា ដើម្បីអនុវត្តសកម្មភាពមនុស្សធម៌ចុះជួយដល់ប្រជាពលរដ្ឋដែលជួបការលំបាករងគ្រោះដោយសារគ្រោះធម្មជាតិ ដូចជា ទឹកជំនន់ ខ្យល់ព្យុះកន្ត្រាក់ជាដើម ៘
ជាចុងក្រោយ ពិធីអបអរខួបលើកទី ១៥២ កាកបាទក្រហមកម្ពុជា អឌ្ឍចន្ទក្រហម បានប្រព្រឹត្តឡើងយ៉ាង អធិកអធម ព្រមទាំងបានបញ្ចប់ដោយមោទនភាពក្រៃលែង ៕
